തിരുവനന്തപുരം: തിരുവനന്തപുരത്തെ വിവാദ കൗണ്‍സിലര്‍ ആര്‍.സുഗതന് അനുകൂലമായ കത്തില്‍ നടപടിയെടുത്ത് സര്‍ക്കാര്‍. തദ്ദേശ വകുപ്പ് അണ്ടര്‍ സെക്രട്ടറി ഡോ. ചിത്രയെ സസ്പെന്‍ഡ് ചെയ്തു. കടുത്ത ഔദ്യോഗിക വീഴ്ചയും അധികാര ദുര്‍വിനിയോഗവും പെരുമാറ്റദൂഷ്യവും കണക്കിലെടുത്താണ് നടപടിയെന്ന് സസ്പെന്ഷന് ഉത്തരവില്‍ വ്യക്തമാക്കുന്നു.
കാപ്പാ കേസ് പ്രതിയായി ജയിലില്‍ കഴിയുന്ന സുഗതന് കൗണ്‍സില്‍ യോഗത്തില്‍ പങ്കെടുക്കാന്‍ അനുമതി തേടി ആഭ്യന്തരവകുപ്പിനും തദ്ദേശ വകുപ്പിനും നല്‍കിയ അപേക്ഷക്ക് ലഭിച്ച മറുപടിയാണ് വിവാദമായത്. സുഗതന് അവധി ലഭിക്കാന്‍ വേണ്ട ഉപദേശവും മറുപടി കത്തിലുണ്ടായിരുന്നു. കാപ്പ കേസില്‍ തടങ്കലില്‍ കഴിയുന്ന പ്രതിക്ക് നിയമപരമായി അര്‍ഹതയില്ലാത്ത ആനുകൂല്യങ്ങള്‍ ലഭ്യമാക്കാന്‍ തക്കവണ്ണം ബന്ധപ്പെട്ട ഫയലില്‍ മാറ്റങ്ങളും കൂട്ടിച്ചേര്‍ക്കലുകളും വരുത്തിയെന്നും അപ്രകാരം കടുത്ത ഔദ്യോഗിക വീഴ്ചയും അധികാര ദുര്‍വിനിയോഗവും പെരുമാറ്റദൂഷ്യവും നടത്തിയതായി സസ്പെന്ഷന് ഉത്തരവില്‍ പറയുന്നു.
എസ്‌കോര്‍ട്ട് പരോള്‍ അനുവദിക്കാന്‍ നിയമപരമായി വ്യവസ്ഥയില്ലെന്ന കുറിപ്പുകള്‍ നിലനില്‍ക്കേ വകുപ്പ് മന്ത്രിതല ഉത്തരവുകള്‍ മറികടന്നുകൊണ്ടാണ് സുഗതന് ആനുകൂല്യം ലഭ്യമാകുന്ന രീതിയില്‍ ഉദ്യോഗസ്ഥ ഫയലില്‍ തിരുത്തലുകള്‍ വരുത്തിയതെന്ന് കത്തില്‍ ഉത്തരവില്‍ പറയുന്നു. ഉദ്യോഗസ്ഥയുടെ പ്രവര്‍ത്തി സര്‍ക്കാരിന്റെ പ്രതിച്ഛായയ്ക്ക് മടുത്ത മങ്ങലേല്‍പ്പിക്കുന്നതെന്നും ഉത്തരവില്‍ പറയുന്നു. ഇത് കോണ്‍ഗ്രസിന്റെയും ലീഗിന്റെയും ബിജെപിയെ സഹായിക്കാനുള്ള നീക്കം എന്നായിരുന്നു ഇടത് ആരോപണം.
Comments