യുദ്ധം, പ്രകൃതിദുരന്തം, പട്ടിണി, അഭയാര്ഥിത്വം, രോഗം തുടങ്ങിയ ദുരിതങ്ങളില് അകപ്പെട്ട മനുഷ്യര്ക്ക് സഹായമെത്തിക്കുന്ന മാനവിക പ്രവര്ത്തകരെ ആദരിക്കാനും അവരുടെ സേവനത്തിന്റെ പ്രാധാന്യം ഓര്മിപ്പിക്കാനുമാണ് ലോക മാനവികതാ ദിനം (വേള്ഡ് ഹ്യുമാനിറ്റേറിയന് ഡേ) ആചരിക്കുന്നത്. മനുഷ്യജീവന്, അന്തസ്സ്, സമത്വം എന്നിവ സംരക്ഷിക്കുക എന്നതാണ് മാനവിക പ്രവര്ത്തനത്തിന്റെ അടിസ്ഥാനലക്ഷ്യം.
2003 ഓഗസ്റ്റ് 19ന് ബാഗ്ദാദിലെ യു.എന്. ആസ്ഥാനമായ കനാല് ഹോട്ടലിലുണ്ടായ ബോംബാക്രമണത്തില് യു.എന്. പ്രതിനിധി സെര്ജിയോ വിയേര ഡി മല്ലൊ ഉള്പ്പെടെ 22 മാനവിക പ്രവര്ത്തകര് കൊല്ലപ്പെട്ടു. ഈ ദുരന്തത്തിന്റെ ഓര്മയ്ക്കായാണ് പിന്നീട് ഓഗസ്റ്റ് 19 ലോക മാനവികതാ ദിനമായി പ്രഖ്യാപിച്ചത്.
ഇന്ന് ലോകത്തിന്റെ വിവിധ സംഘര്ഷമേഖലകളിലും ദുരന്തബാധിത പ്രദേശങ്ങളിലും സ്വന്തം സുരക്ഷ പോലും അവഗണിച്ച് സഹായമെത്തിക്കുന്ന ആയിരക്കണക്കിന് മനുഷ്യരുണ്ട്. മതം, വംശം, ദേശം, രാഷ്ട്രീയം എന്നിവയുടെ അതിരുകള്ക്കപ്പുറം ദുരിതമനുഭവിക്കുന്ന മനുഷ്യന്റെ പക്ഷത്ത് നില്ക്കുക എന്നതാണ് മാനവികതയുടെ ഏറ്റവും ലളിതമായ നിര്വചനം. അതുകൊണ്ടുതന്നെ ലോക മാനവികതാ ദിനം മറ്റുള്ളവരുടെ വേദന കാണാനും അവരോടൊപ്പം നില്ക്കാനും നമ്മെ ഓര്മിപ്പിക്കുന്ന ദിനം കൂടിയാണ്. മാനവിക പ്രവര്ത്തനം ദുരന്തസമയത്തെ അടിയന്തര സഹായത്തില് മാത്രം ഒതുങ്ങുന്നതല്ല. ഭക്ഷണം, ശുദ്ധജലം, മരുന്ന്, അഭയം എന്നിവ ലഭ്യമാക്കുന്നതിനൊപ്പം യുദ്ധവും ദുരന്തവും മൂലം വിദ്യാഭ്യാസവും ഉപജീവനവും നഷ്ടപ്പെട്ടവരെ ജീവിതത്തിലേക്ക് തിരിച്ചുകൊണ്ടുവരികയും അതിന്റെ ഭാഗമാണ്. പ്രത്യേകിച്ച് കുട്ടികള്, സ്ത്രീകള്, വയോധികര്, ഭിന്നശേഷിക്കാര് തുടങ്ങിയ കൂടുതല് ദുര്ബലരായ വിഭാഗങ്ങളുടെ അവകാശങ്ങളും സുരക്ഷയും ഉറപ്പാക്കുന്നതില് മാനവിക പ്രവര്ത്തകര് നിര്ണായക പങ്കുവഹിക്കുന്നു.
ഇന്നത്തെ ലോകത്ത് യുദ്ധങ്ങളും കാലാവസ്ഥാ ദുരന്തങ്ങളും അഭയാര്ഥി പ്രതിസന്ധികളും വര്ധിക്കുമ്പോള് മാനവികതയുടെ പ്രസക്തിയും വര്ധിക്കുകയാണ്. സഹായം ആവശ്യമുള്ള ഒരാളെ മറ്റൊരാള് എന്നല്ല, നമ്മെപ്പോലെ തന്നെ അവകാശങ്ങളും അന്തസ്സുമുള്ള മനുഷ്യന് എന്ന നിലയില് കാണാന് കഴിയുന്നതാണ് യഥാര്ഥ മാനവികത. ദുരിതത്തിലായ മനുഷ്യര്ക്കു വേണ്ടി നാം എത്രത്തോളം കരുണയും ഉത്തരവാദിത്വവും പ്രകടിപ്പിക്കുന്നു എന്ന ആത്മപരിശോധനയ്ക്കുള്ള അവസരം കൂടിയാണിത്.
Comments