തിരുവനന്തപുരം: മയക്കുമരുന്നിനെതിരേ ഓപ്പറേഷന്‍ തൂഫാന്‍ അടക്കമുള്ള പദ്ധതികളുമായി ആഭ്യന്തരവകുപ്പ് മുമ്പോട്ട് പോകുമ്പോള്‍ ഓപ്പറേഷന്‍ റിലാക്‌സുമായി എക്‌സൈസ്. സാമൂഹ്യവിരുദ്ധരുടെ കേന്ദ്രങ്ങള്‍ കളിസ്ഥലങ്ങളും ഓപ്പണ്‍ ജിമ്മുകളുമാക്കി മാറ്റുന്ന പദ്ധതിക്കാണ് എക്‌സൈസ് ഒരുങ്ങുന്നത്. ലഹരിക്കപ്പുറത്ത് ആരോഗ്യജീവിതത്തിലേക്ക് പുതിയ തലമുറയെ നയിക്കാനാണ് പദ്ധതി.
സാമൂഹ്യവിരുദ്ധര്‍ ഉപയോഗിക്കുന്ന ഉപേക്ഷിക്കപ്പെട്ട സ്ഥലങ്ങള്‍ കണ്ടെത്തി മനോഹരമായ കളിസ്ഥലങ്ങള്‍ നിര്‍മ്മിക്കുകയാണ് പദ്ധതിയുടെ ഉന്നം. ഒഴിഞ്ഞുകിടക്കുന്ന സ്ഥലം കണ്ടെത്തി നവീകരിക്കും. ഇത്തരത്തില്‍ ഒമ്പത് സൈറ്റുകള്‍ ഇതിനകം എക്‌സൈസ് കണ്ടെത്തി അവിടെ പദ്ധതി ആരംഭിക്കാനുള്ള നീക്കത്തിലാണ്. തദ്ദേശ സ്വയംഭരണ വകുപ്പുകളുടെയും സന്നദ്ധ സംഘടനകളുടേയും പങ്കാളിത്തത്തോടെയാണ് പദ്ധതി നടപ്പാക്കുന്നത്. ഇതിനായി എക്‌സൈസിന്റെ തനത് ഫണ്ടും വിനിയോഗിക്കും. കളിസ്ഥലങ്ങളും ഓപ്പണ്‍ ജിമ്മും വരുന്നതോടെ ഒഴിഞ്ഞുകിടക്കുന്ന സ്ഥലങ്ങളില്‍ ജനക്കൂട്ടങ്ങള്‍ ഉണ്ടാകുമെന്നതാണ് കണ്ടെത്തല്‍.
അതിനിടയില്‍ ആഭ്യന്തരവകുപ്പ് ഓപ്പറേഷന്‍ തൂഫാനുമായി മയക്കുമരുന്ന് വേട്ട തുടരുകയാണ്. അതിനിടയില്‍ കാസര്‍ഗോഡ് എംഡിഎംഎ കേസില്‍ പ്രതികളെ സര്‍ക്കാര്‍ രക്ഷിക്കാന്‍ ശ്രമിക്കുന്നെന്ന് ആരോപിച്ച് ഡിവൈഎഫ്‌ഐ വലിയ പ്രതിഷേധത്തിലാണ്. ഡിജിപി ഓഫീസിലേക്ക് നടത്തിയ മാര്‍ച്ചില്‍ പോലീസ് ഇടപെടല്‍ ഉണ്ടായിരിക്കുകയാണ്.
Comments