ഫുട്ബോളില് ചില കളിക്കാര് റെക്കോഡുകള് സൃഷ്ടിക്കും. ചിലര് കിരീടങ്ങള് നേടും. അപൂര്വം ചിലര് ഒരു തലമുറയുടെ ഫുട്ബോള് സങ്കല്പത്തെത്തന്നെ മാറ്റിമറിക്കും. ലയണല് മെസ്സി ആ മൂന്നാമത്തെ വിഭാഗത്തില്പ്പെടുന്ന കളിക്കാരനാണ്. അര്ജന്റീനയുടെ നീലയും വെള്ളയും ജഴ്സിയില്നിന്ന് അദ്ദേഹം പടിയിറങ്ങുമ്പോള് അവസാനിക്കുന്നത് ഒരു മഹത്തായ രാജ്യാന്തര കരിയര് മാത്രമല്ല;ലോക ഫുട്ബോളിന്റെ ഒരു യുഗം കൂടിയാണ്.
2026 ലോകകപ്പ് ഫൈനലില് സ്പെയിനോട് അധികസമയത്ത് 1-0ന് തോറ്റതിനു പിന്നാലെയാണ് 39 വയസ്സുകാരനായ മെസ്സി അര്ജന്റീനയ്ക്കുവേണ്ടിയുള്ള തന്റെ രാജ്യാന്തര കരിയറിന് വിരാമമിട്ടത്. പക്ഷേ, ഇത് ഫുട്ബോളില്നിന്നുള്ള വിരമിക്കലല്ല. ക്ലബ് ഫുട്ബോളില് അദ്ദേഹം തുടരുകയാണ്. അര്ജന്റീനയ്ക്കായി 207 മത്സരങ്ങളില് 125 ഗോളുകള് നേടിയ റെക്കോഡ്, എട്ട് ബാലണ് ദ് ഓര് പുരസ്കാരങ്ങള്, ലോകകപ്പ് കിരീടം, രണ്ട് കോപ്പ അമേരിക്ക കിരീടങ്ങള് എന്നിവയുമായി അദ്ദേഹം ദേശീയ ടീമിനോട് വിടപറയുന്നു.
എന്നാല്, മെസ്സിയുടെ കഥയെ കണക്കുകളിലേക്ക് ചുരുക്കുന്നത് അദ്ദേഹത്തോട് ചെയ്യുന്ന വലിയ അനീതിയായിരിക്കും. കാരണം മെസ്സിയുടെ ഏറ്റവും വലിയ നേട്ടം അദ്ദേഹം നേടിയ കിരീടങ്ങളല്ല;പരാജയങ്ങള്ക്കുശേഷവും തിരിച്ചുവരാന് കാണിച്ച അസാധാരണമായ ശേഷിയാണ്.
ഒരുകാലത്ത് അര്ജന്റീനയില്ത്തന്നെ മെസ്സി വിമര്ശിക്കപ്പെട്ടു. ക്ലബ് ഫുട്ബോളില് ബാഴ്സലോണയ്ക്കായി അത്ഭുതങ്ങള് സൃഷ്ടിച്ച താരം ദേശീയ ടീമിന്റെ ജഴ്സിയില് അതേ മികവ് ആവര്ത്തിക്കുന്നില്ലെന്നായിരുന്നു വിമര്ശനം. 2014ലെ ലോകകപ്പ് ഫൈനലിലെ തോല്വിയും 2015, 2016 കോപ്പ അമേരിക്ക ഫൈനലുകളിലെ പരാജയങ്ങളും വിമര്ശനത്തിന് ആക്കം കൂട്ടി. 2016ലെ കോപ്പ അമേരിക്ക ഫൈനലിനുശേഷം മെസ്സി ദേശീയ ടീമില്നിന്ന് വിരമിക്കല് പ്രഖ്യാപിച്ച നിമിഷം പോലും ലോകം കണ്ടു. പക്ഷേ അദ്ദേഹം മടങ്ങിവന്നു. അത് പിന്നീട് ഫുട്ബോള് ചരിത്രത്തിലെ തിരിച്ചുവരവിന്റെ അസാധാരണ അധ്യായമായി
2021ലെ കോപ്പ അമേരിക്ക കിരീടം ആ കാത്തിരിപ്പിന് ആദ്യ വലിയ മറുപടിയായി. 2022ലെ ഫൈനലിസിമ കിരീടം ആത്മവിശ്വാസം ഉറപ്പിച്ചു. അതിനുശേഷം ഖത്തറില് നടന്ന ലോകകപ്പ്. ഫ്രാന്സിനെതിരായ ഫൈനലില് രണ്ട് ഗോളുകള് നേടി, ഷൂട്ടൗട്ടിലും തന്റെ കടമ നിര്വഹിച്ച് അര്ജന്റീനയെ ലോകചാമ്പ്യന്മാരാക്കിയപ്പോള്, മെസ്സി തന്റെ കരിയറിലെ ഏറ്റവും വലിയ കാത്തിരിപ്പിന് വിരാമമിട്ടു. 2024ലെ കോപ്പ അമേരിക്ക കിരീടവും അതിനുശേഷം 2026 ലോകകപ്പ് ഫൈനലിലേക്കുള്ള അര്ജന്റീനയുടെ യാത്രയും ആ കഥയെ കൂടുതല് സമ്പൂര്ണമാക്കി.
മെസ്സിയുടെ മഹത്വം മറ്റൊന്നിലാണ്. അദ്ദേഹം ഫുട്ബോളിനെ ശക്തിയുടെ കളിയില്നിന്ന് ബുദ്ധിയുടെയും സൃഷ്ടിപരതയുടെയും കളിയാക്കി മാറ്റിയവരില് ഒരാളാണ്. ഉയരമോ പേശീബലമോ വേഗമോ മാത്രം മഹത്വത്തിന്റെ അളവുകോലെല്ലന്ന് അദ്ദേഹം തെളിയിച്ചു. ഒരു നിമിഷത്തിന്റെ മുന്കൂട്ടിക്കാണല്, പന്തിന്റെ സ്പര്ശത്തിലെ കൃത്യത, ശരീരത്തിന്റെ ചെറിയൊരു ചലനത്തിലൂടെ എതിരാളിയെ തെറ്റിദ്ധരിപ്പിക്കാനുള്ള കഴിവ്-ഇവയെല്ലാം ചേര്ന്നാല് ഫുട്ബോള് ഒരു കലയായി മാറുമെന്ന് ലോകം അദ്ദേഹത്തിലൂടെ കണ്ടു.
അതുകൊണ്ടുതന്നെ മെസ്സി അര്ജന്റീനക്കാരുടെ മാത്രം സ്വത്തായിരുന്നില്ല. ബാഴ്സലോണയിലും അര്ജന്റീനയിലും പിന്നീട് അമേരിക്കയിലും കളിച്ചിട്ടും അദ്ദേഹത്തിന്റെ ആരാധകര് ഭൂമിശാസ്ത്രപരമായ അതിരുകള് അംഗീകരിച്ചില്ല. ഇന്ത്യയിലെ ഒരു കൊച്ചുകുട്ടി മുതല് ആഫ്രിക്കയിലെ തെരുവുകളില് പന്തുതട്ടുന്ന ബാലന്വരെ, മെസ്സിയുടെ ഇടതുകാല് കണ്ടാണ് ഒരു തലമുറ ഫുട്ബോളിനെ സ്നേഹിക്കാന് തുടങ്ങിയത്. മത്സരങ്ങള് ജയിക്കുന്നതിനേക്കാള് വലിയൊരു സ്വാധീനമാണിത്.
കുട്ടികള്ക്ക് മെസ്സിയില്നിന്ന് പഠിക്കാനുള്ളത് ഡ്രിബ്ലിങ്ങും ഗോളടിക്കലും മാത്രമല്ല. നിരന്തരമായ പരിശീലനം, പരാജയങ്ങളെ അതിജീവിക്കല്, സ്വന്തം കഴിവില് വിശ്വാസം, ടീമിനുവേണ്ടി വ്യക്തിഗത മികവിനെ സമര്പ്പിക്കല്-തുടങ്ങിയവയാണ്. ഒരിക്കല് ലോകത്തിന്റെ മുന്നില് കരഞ്ഞ മനുഷ്യനാണ് പിന്നീട് ലോകകപ്പ് ഉയര്ത്തിയത്. അതിനാല് മെസ്സിയുടെ ജീവിതം പ്രതിഭയുടെ കഥ മാത്രമല്ല;ക്ഷമയുടെയും സഹനത്തിന്റെയും തിരിച്ചുവരവിന്റെയും കഥയാണ്.
മറഡോണ അര്ജന്റീനയുടെ ഫുട്ബോള് മനസില് ഒരിക്കലും മായാത്ത അധ്യായമാണെങ്കില്, മെസ്സി അതിന്റെ മറ്റൊരു മഹത്തായ അധ്യായം എഴുതി പൂര്ത്തിയാക്കുകയാണ്. ഇനി അദ്ദേഹത്തെ പിന്തുടരുന്നവര്ക്ക് താരതമ്യം ചെയ്യാനുള്ളത് ഒരു കളിക്കാരനെയല്ല, ഒരു മാനദണ്ഡത്തെയാണ്.
ദേശീയ ജഴ്സി അഴിച്ചുവയ്ക്കാം. റെക്കോഡുകള് ഒരുനാള് തകര്ന്നേക്കാം. പുതിയ താരങ്ങള് വരും, പുതിയ ഇതിഹാസങ്ങള് പിറക്കും. പക്ഷേ പന്ത് കാലില് ഒട്ടിച്ചേര്ന്നതുപോലെ ഓടിയ ആ ചെറിയ മനുഷ്യന്റെ ദൃശ്യങ്ങള് ഫുട്ബോള് ആരാധകരുടെ ഓര്മയില്നിന്ന് മായില്ല. മെസ്സി അര്ജന്റീനയോട് വിടപറയുകയാണ്;ഫുട്ബോള് ലോകത്തോട് അല്ല. അതിനുമപ്പുറം, ഒരു തലമുറയുടെ ബാല്യത്തോടും സ്വപ്നങ്ങളോടും അദ്ദേഹം ഇതിനകം ഒരു ശാശ്വതബന്ധം സ്ഥാപിച്ചുകഴിഞ്ഞു. അതാണ് ലയണല് മെസ്സിയുടെ ഏറ്റവും വലിയ കിരീടം.
Comments