കോട്ടയം ജില്ലയിലെ എക്സൈസ് ഉദ്യോഗസ്ഥര്ക്കെതിരായ കൂട്ട സസ്പെന്ഷന് ഒരു വകുപ്പുതല അച്ചടക്കനടപടി മാത്രമായി കാണാനാവില്ല. നിയമം നടപ്പാക്കേണ്ടവര് തന്നെ നിയമലംഘനത്തിന് കൂട്ടുനില്ക്കുകയും ബാറുടമകളില്നിന്ന് മാസപ്പടിയും കൈക്കൂലിയും സ്വീകരിക്കുകയും ചെയ്തെന്ന കണ്ടെത്തല് ഭരണസംവിധാനത്തിന്റെ വിശ്വാസ്യതയെ നേരിട്ടു ചോദ്യം ചെയ്യുന്നതാണ്. അസമയത്ത് മദ്യവില്പ്പന അനുവദിച്ചതും പരിശോധനകള്ക്ക് നിയന്ത്രണമേര്പ്പെടുത്തിയതും ആരോപണങ്ങളുടെ ഗൗരവം വര്ധിപ്പിക്കുന്നു.
ഏറ്റവും ശ്രദ്ധേയമായത് നടപടി ഉണ്ടായ രീതി തന്നെയാണ്. മാസങ്ങളോളം നിരീക്ഷണം നടത്തി, വേഷംമാറി പരിശോധന നടത്തി, അസമയത്ത് മദ്യം വാങ്ങി തെളിവുകള് ശേഖരിച്ച്, ശബ്ദസന്ദേശങ്ങളും സി.സി.ടി വി ദൃശ്യങ്ങളും ബാങ്ക് രേഖകളും പരിശോധിച്ചാണ് കമ്മിഷണര് നടപടി സ്വീകരിച്ചത്. താഴെത്തട്ടില്നിന്ന് മേലുദ്യോഗസ്ഥന് വരെ അഴിമതിയുടെ ശൃംഖല വളര്ന്നിട്ടുണ്ടെങ്കില്, സാധാരണ മുന്നറിയിപ്പുകള് കൊണ്ട് അത് അവസാനിക്കില്ലെന്നതിന്റെ തെളിവാണിത്.
സസ്പെന്ഷന് കൊണ്ട് മാത്രം പ്രശ്നം തീരരുത്. പണമൊഴുക്ക് സമഗ്രമായി അന്വേഷിക്കണം. ഇടനിലക്കാരായ ബാര് ഉടമകള്ക്കും പങ്കുണ്ടെങ്കില് അവരെയും നിയമത്തിന്റെ പരിധിയില് കൊണ്ടുവരണം. കുറ്റം തെളിഞ്ഞാല് ക്രിമിനല് നടപടി ഉറപ്പാക്കുകയും അനധികൃതമായി ആനുകൂല്യം ലഭിച്ച സ്ഥാപനങ്ങളുടെ ലൈസന്സ് റദ്ദാക്കുകയും വേണം. ഉദ്യോഗസ്ഥരുടെ സ്വത്ത്, ബാങ്ക് ഇടപാടുകള്, ബന്ധുക്കളുടെ അക്കൗണ്ടുകള് എന്നിവയും നിയമാനുസൃതമായി പരിശോധിക്കേണ്ടതാണ്.
ജനങ്ങളുടെ സുരക്ഷ ഉറപ്പാക്കേണ്ട വകുപ്പില് അഴിമതി വേരൂന്നുമ്പോള് അതിന്റെ ഇരകള് പൊതുജനങ്ങളാണ്. നിയമവിരുദ്ധമായി മദ്യം ലഭ്യമാകുന്നത് ലഹരിയുടെ വ്യാപനം മാത്രമല്ല, റോഡപകടങ്ങള്, കുടുംബപ്രശ്നങ്ങള്, അക്രമങ്ങള് തുടങ്ങിയ സാമൂഹിക ദുരന്തങ്ങള്ക്കും വഴിയൊരുക്കും. അതിനാല് എക്സൈസിലെ അഴിമതിയെ സാമ്പത്തിക കുറ്റമായി മാത്രം കാണാതെ പൊതുസുരക്ഷയ്ക്കെതിരായ ഗുരുതര ഭീഷണിയായി കണക്കാക്കണം. ബാറുകളുടെ നിയമപാലനം പരിശോധിക്കാന് സ്വതന്ത്രവും സാങ്കേതികവിദ്യാധിഷ്ഠിതവുമായ സ്ഥിരം സംവിധാനം വേണം. പരിശോധനകള്ക്ക് മുന്കൂര് അനുമതി എന്ന പതിവ് അവസാനിപ്പിക്കണം.
ഈ സംഭവത്തില്നിന്ന് സര്ക്കാര് വ്യക്തമായ പാഠം ഉള്ക്കൊള്ളേണ്ടതുണ്ട്. പരാതികള് ഫയലുകളില് അടച്ചുവയ്ക്കുന്ന സംസ്കാരം അവസാനിക്കണം. പരാതിക്കാരുടെ വിവരങ്ങള് സംരക്ഷിച്ചുകൊണ്ട്, രഹസ്യാന്വേഷണത്തിന് സ്ഥാപനപരമായ സ്വാതന്ത്ര്യം നല്കണം. അഴിമതി പുറത്തുകൊണ്ടുവരുന്ന സത്യസന്ധരായ ഉദ്യോഗസ്ഥര്ക്ക് സംരക്ഷണവും പ്രോത്സാഹനവും ഉറപ്പാക്കണം.
ബാര് ലൈസന്സ് അനുവദിക്കുന്നതുമുതല് ദിവസേനയുള്ള പ്രവര്ത്തനം വരെ ഡിജിറ്റല് നിരീക്ഷണത്തിലാക്കാം. വില്പനയുടെ സമയക്രമം, നികുതി വിവരങ്ങള്, പരിശോധനാ റിപ്പോര്ട്ടുകള് എന്നിവ പരസ്പരം ബന്ധിപ്പിച്ചാല് കൃത്രിമം കണ്ടെത്താന് എളുപ്പമാകും. പരിശോധനകള്ക്ക് ബോഡി ക്യാമറ ഉപയോഗിക്കുന്നതും സുതാര്യത കൂട്ടും.
ജനങ്ങളും ജാഗ്രത പുലര്ത്തണം. നിയമവിരുദ്ധ മദ്യവില്പ്പനയെക്കുറിച്ചുള്ള പരാതികള് അധികാരികളെ അറിയിക്കണം. മദ്യവ്യാപാരത്തിലെ നിയമലംഘനം ചെറിയ കുറ്റമായി കാണുന്ന സമീപനം സമൂഹത്തിന് അപകടകരമാണ്. നിയമത്തെ പണവും സ്വാധീനവും ഉപയോഗിച്ച് മറികടക്കാമെന്ന ധാരണ ശക്തമായാല്, ഒടുവില് അതിന്റെ ആഘാതം കുടുംബങ്ങളിലും യുവാക്കളിലും പൊതുസുരക്ഷയിലുമാകും.
കോട്ടയത്തെ നടപടി ഒരു തുടക്കമാകണം. എക്സൈസ് വകുപ്പില് അഴിമതിക്ക് വേരൂന്നിയ ഇടനില ശൃംഖലകള് തകര്ക്കുകയും നിയമപാലനത്തെ സ്ഥാപനത്തിന്റെ അടിസ്ഥാന മൂല്യമായി പുനഃസ്ഥാപിക്കുകയും വേണം. അധികാരം ജനസേവനത്തിനുള്ളതാണ്; സ്വകാര്യ ലാഭത്തിനുള്ള ഉപകരണമല്ല.
Comments