ന്യൂഡല്‍ഹി: വിവാഹം കഴിച്ചതോടെ സ്ത്രീയുടെ വ്യക്തിസ്വാതന്ത്ര്യം അവസാനിക്കുന്നില്ലെന്ന് സുപ്രീംകോടതി. ഭര്‍തൃബലാത്സംഗം ക്രിമിനല്‍ കുറ്റമായി പരിഗണിക്കണമോയെന്ന കാര്യത്തില്‍ നിലവിലുള്ള നിയമവ്യവസ്ഥ വിശദമായി പരിശോധിക്കണമെന്നും കോടതി വ്യക്തമാക്കി. ഭര്‍തൃബലാത്സംഗം കുറ്റകരമാക്കണമെന്ന് ആവശ്യപ്പെട്ടുള്ള ഹര്‍ജികള്‍ പരിഗണിക്കുന്നതിനിടെയാണ് ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്യ ബാഗ്ചി, വി. മോഹന എന്നിവരടങ്ങിയ ബെഞ്ചിന്റെ നിരീക്ഷണം. കേസില്‍ മൂന്ന് ആഴ്ചയ്ക്ക് ശേഷം അന്തിമ വാദം നടക്കും.
പുതിയ ക്രിമിനല്‍ നിയമമായ ഭാരതീയ ന്യായ സംഹിതയിലെ (ബിഎന്‍എസ്) സെക്ഷന്‍ 63, എക്‌സെപ്ഷന്‍ 2 ആണ് ഹര്‍ജികളില്‍ ചോദ്യം ചെയ്യുന്നത്. 18 വയസിന് മുകളിലുള്ള ഭാര്യയുമായി അവളുടെ സമ്മതമില്ലാതെ ഭര്‍ത്താവ് ലൈംഗികബന്ധത്തില്‍ ഏര്‍പ്പെട്ടാലും, വിവാഹിതരായ ദമ്പതികള്‍ക്കിടയിലെ ഇത്തരം ബന്ധം ബലാത്സംഗക്കുറ്റത്തിന്റെ പരിധിയില്‍ വരില്ലെന്നാണ് വ്യവസ്ഥ.
വിവാഹം വ്യക്തിസ്വാതന്ത്ര്യത്തിന്റെ അവസാനമാകുമെന്ന വാദത്തോട് യോജിക്കാനാകില്ലെന്ന് ജസ്റ്റിസ് ജോയ്മല്യ ബാഗ്ചി പറഞ്ഞു. അതേസമയം, നിലവിലുള്ള ക്രിമിനല്‍ നിയമത്തിലെ വ്യവസ്ഥകള്‍ കോടതി പരിശോധിക്കേണ്ടതുണ്ടെന്നും അദ്ദേഹം വ്യക്തമാക്കി.
ഒരു നിയമവ്യവസ്ഥ ഭരണഘടനാവിരുദ്ധമോ യുക്തിരഹിതമോ ആണെന്ന് കോടതി കണ്ടെത്തിയാല്‍ മാത്രമേ അതിനെതിരെ പ്രോസിക്യൂഷന്‍ നടപടികള്‍ സാധ്യമാകൂവെന്നും ജസ്റ്റിസ് ബാഗ്ചി നിരീക്ഷിച്ചു.
നിലവിലെ നിയമത്തിലെ ഈ ഒഴിവാക്കല്‍ നിലനില്‍ക്കെ തന്നെ പ്രോസിക്യൂഷന്‍ സാധ്യമാണോ, എക്‌സെപ്ഷന്‍ ഭരണഘടനാപരമായി സാധുതയുള്ളതാണോ തുടങ്ങിയ വിഷയങ്ങളാണ് സുപ്രീംകോടതി പരിശോധിക്കുക.
Comments