ബാലതാരമായി തുടക്കം കുറിച്ച് പതിറ്റാണ്ടുകളായി മലയാള സിനിമയില്‍ തിളങ്ങി നില്‍ക്കുന്ന അതുല്യ കലാകാരിയാണ് ഉര്‍വശി. നര്‍മ്മം, കണ്ണീര്, സന്തോഷം, കുശുമ്പ്, അസൂയ, വില്ലത്തരം എന്നിങ്ങനെ ഉര്‍വശിയുടെ കൈയില്‍ ഭദ്രമാകാത്ത കഥാപാത്രങ്ങള്‍ ഇല്ലെന്നു തന്നെ പറയാം. ഒരു കാലത്ത് നായികയായി തിളങ്ങി നിന്നിരുന്നുവെങ്കില്‍ വര്‍ഷങ്ങള്‍ക്കിപ്പുറവും അമ്മ സഹോദരി കഥാപാത്രങ്ങളിലൂടെ തന്റെ പ്രകടനമികവിന്റെ മറ്റൊരു തലം തന്നെ ഉര്‍വശി തെന്നിന്ത്യയില്‍ സൃഷ്ടിക്കുകയാണ്.
ഇതിനപ്പുറത്തേക്ക് ഒരു അഭിനയപ്രതിഭ നിലവില്‍ തെന്നിന്ത്യയില്ലെന്നുള്ളത് നിസംശയം പറയാവുന്ന കാര്യമാണ്. തെന്നിന്ത്യന്‍ ലേഡി സൂപ്പര്‍സ്റ്റാര്‍ പദവി കൃത്യമായി യോജിക്കുന്ന അഭിനയപ്രതിഭയാണ് ഉര്‍വശി. താരത്തിന്റെ ഏറ്റവും പുതിയ സിനിമയായ ‘ആശ’ ഇന്നാണ് തിയേറ്ററിലെത്തിയത്. ടൈറ്റിൽ കഥാപാത്രത്തെ അവതരിപ്പിക്കുന്നത് ഉര്‍വശിയാണ്. ഉർവശി തന്റെ കരിയറിൽ ഇതുവരെ ചെയ്യാത്തൊരു കഥാപാത്രമാണ് ആശയെന്നുള്ളത് സിനിമ കണ്ടിറങ്ങുന്ന പ്രേക്ഷകരെല്ലാം ഒരേ സ്വരത്തില്‍ പറയുന്നു.
ഇപ്പോഴിതാ ഉര്‍വശിയുടെ അഭിനയമികവിനെ വാനോളം പുകഴ്ത്തുകയാണ് അഭിനേതാവും സംവിധായകനുമായ സാജിദ് യാഹിയ. അക്ഷരം തെറ്റാതെ വിളിക്കാം ലേഡി സൂപ്പര്‍സ്റ്റാര്‍ ഉര്‍വശിയെന്നും ഇവർക്കു മുകളിൽ ഒരു അഭിനേത്രി ഇന്ത്യൻ സിനിമയിൽ ഉണ്ടാവില്ലെന്നുമാണ് സാജിദ് കുറിക്കുന്നത്.
‘‘ഇവർക്കു മുകളിൽ ഒരു അഭിനേത്രി ഇന്ത്യൻ സിനിമയിൽ? ഇനി ഉണ്ടാകാൻ തന്നെ ബുദ്ധിമുട്ടാണ്...എന്ത് മികച്ച പ്രകടനമാണ്!
അക്ഷരം തെറ്റാതെ വിളിക്കാം...ലേഡി സൂപ്പർസ്റ്റാർ ഉർവശി...’’ എന്നാണ് സാജിദ് കുറിച്ചിരിക്കുന്നത്. സാജിദിന്റെ പോസ്റ്റിനു താഴെ നിരവധി ആരാധകരാണ് ഉര്‍വശിയെ ലേഡി സൂപ്പര്‍സ്റ്റാര്‍ എന്ന് സംബോധന ചെയ്ത് കമന്റുകള്‍ കുറിച്ചിരിക്കുന്നത്. ഉര്‍വശിയെന്ന അഭിനേത്രിയോടുള്ള ആരാധകരുടെ സ്നേഹം കമന്റുകളില്‍ പ്രകടമാണ്.
നവാഗതനായ സഫർ സനൽ സംവിധാനം ചെയ്ത ചിത്രത്തില്‍ ഉര്‍വശിയ്ക്കൊപ്പം കട്ടയ്ക്കുള്ള പെര്‍ഫോമന്‍സുമായി ചുരുങ്ങിയ കാലങ്ങൾ കൊണ്ടുതന്നെ വേറിട്ട ക്യാരക്ടർ റോളുകൾ ചെയ്ത് തന്റേതായ സ്ഥാനം സ്വന്തമാക്കിയ ജോജു ജോർജുമുണ്ട്. ഒപ്പം ഐശ്വര്യ ലക്ഷ്മിയും ലക്ഷ്മി മേനോനുമുണ്ട്. വാശിയും വൈരാഗ്യവും നിറഞ്ഞ, ഒപ്പം തന്റെ മക്കൾക്ക് എന്തെങ്കിലും സംഭവിച്ചാൽ എന്തും ചെയ്യാൻ മുതിരുന്നൊരു ക്യാരക്ടർ ആണ് ഉര്‍വശിയുടെ ആശയെന്ന കഥാപാത്രം. ആശയുടെ മാനസിക സംഘർഷങ്ങളും ഇടയിൽ വന്നുചേരുന്ന പ്രശ്നങ്ങളെ എങ്ങനെ അവർ നേരിടുന്നു എന്നതടക്കം സിനിമയിലെ ഏറ്റവും വലിയ ഹൈലൈറ്റും ഉർവശിയുടെ പ്രകടനം തന്നെയാണ്.
പ്രൊമോഷൻ അഭിമുഖങ്ങളിലൂടെയെല്ലാം ചിത്രം ഒരു ഫാമിലി-മിസ്റ്ററി ത്രില്ലറായിരിക്കുമെന്ന സൂചനകൾ നൽകിയിരുന്നു. അതു തന്നെയാണ് സിനിമ പ്രേക്ഷകര്‍ക്കായി നല്‍കുന്നതും. മികച്ച സ്വീകാര്യത നേടിയാണ് ചിത്രം തിയേറ്ററില്‍ കളക്ഷന്‍ നേടിക്കൊണ്ടിരിക്കുന്നത്.
Comments