ന്യൂഡൽഹി: 15 വയസ്സിന് താഴെയുള്ള കുട്ടികൾക്കായുള്ള പാസ്പോർട്ട് ചട്ടങ്ങളിൽ വിദേശകാര്യ മന്ത്രാലയം ഭേദഗതി വരുത്തി. പുതിയ പാസ്പോർട്ട് (ഭേദഗതി) ചട്ടങ്ങൾ, 2026 പ്രകാരം ഈ പ്രായത്തിലുള്ള കുട്ടികൾക്ക് നൽകുന്ന സാധാരണ പാസ്‌പോർട്ടിന് ഇനി മുതൽ നൽകുന്ന തീയതി മുതൽ അഞ്ച് വർഷം വരെ അല്ലെങ്കിൽ കുട്ടിക്ക് 18 വയസ്സ് തികയുന്നത് വരെ (ഇതിൽ ഏതാണോ ആദ്യം വരുന്നത്) മാത്രമായിരിക്കും കാലാവധിയുണ്ടായിരിക്കുക.
സെപ്റ്റംബർ 17-ന് ഇന്ത്യയുടെ ഗെസറ്റിൽ പ്രസിദ്ധീകരിച്ച വിജ്ഞാപനത്തിലൂടെയാണ് ഈ മാറ്റം നിലവിൽ വന്നത്. 1980-ലെ പാസ്പോർട്ട് ചട്ടങ്ങളിലാണ് ഈ ഭേദഗതി വരുത്തിയിരിക്കുന്നത്.
ഭേദഗതി വരുത്തിയ ചട്ടം 12(1എ) പ്രകാരം, 15 വയസ്സിന് താഴെയുള്ള ഒരു കുട്ടിക്ക് അനുവദിക്കുന്ന 36 പേജുള്ള സാധാരണ പാസ്‌പോർട്ടിന് അനുവദിച്ച തീയതി മുതൽ 5 വർഷം വരെയോ അല്ലെങ്കിൽ കുട്ടിക്ക് 18 വയസ്സ് തികയുന്നത് വരെയോ ആയിരിക്കും കാലാവധി (ഏതാണ് ആദ്യം വരുന്നത് അതനുസരിച്ച്). അതായത്, കുട്ടിക്ക് 18 വയസ്സ് തികയുന്നതിന് തൊട്ടുമുമ്പാണ് പാസ്പോർട്ട് എടുക്കുന്നതെങ്കിൽ ആ അഞ്ച് വർഷം പൂർണ്ണമായി അതിന്റെ കാലാവധി ലഭിക്കില്ല. കുട്ടിക്ക് 18 വയസ്സ് തികയുമ്പോൾ ആ പാസ്‌പോർട്ടിന്റെ കാലാവധി അവസാനിക്കും. അതിനാൽ, പാസ്പോർട്ട് നൽകി 5 വർഷം അല്ലെങ്കിൽ 18 വയസ്സ് തികയുക എന്ന രണ്ട് പരിധികളാണ് പുതിയ ചട്ടത്തിലുള്ളത്. ഈ വിഭാഗത്തിൽ പെടുന്ന കുട്ടികൾക്ക് 36 പേജുള്ള സാധാരണ പാസ്പോർട്ട് മാത്രമായിരിക്കും നൽകുകയെന്നും ഭേദഗതിയിൽ വ്യക്തമാക്കുന്നുണ്ട്.
പാസ്പോർട്ട് അപേക്ഷാ ഫീസുമായി ബന്ധപ്പെട്ട ചട്ടം 8-ലും മന്ത്രാലയം ഭേദഗതി വരുത്തിയിട്ടുണ്ട്. പുതിയ വ്യവസ്ഥയനുസരിച്ച്, ഓരോ വിഭാഗത്തിലുള്ള അപേക്ഷകൾക്കും നൽകേണ്ട ഫീസ് ചട്ടങ്ങളിലെ ഷെഡ്യൂൾ IV-ൽ വ്യക്തമാക്കിയിരിക്കുന്ന പ്രകാരമായിരിക്കും.
Comments