ന്യൂയോർക്ക് സിറ്റി: ഐക്യരാഷ്ട്രസഭ ജനറൽ അസംബ്ലിയിൽ (യുഎൻജിഎ) ഇന്ത്യ-പാകിസ്ഥാൻ സംഘർഷം അവസാനിപ്പിക്കാൻ സഹായിച്ചുവെന്ന അവകാശവാദവുമായി യുഎസ് പ്രസിഡന്റ് ഡൊണാൾഡ് ട്രംപ് വീണ്ടും രംഗത്ത്. പാകിസ്ഥാൻ പ്രധാനമന്ത്രി ഷെഹബാസ് ഷെരീഫ് തനിക്ക് നന്ദി അറിയിച്ചതായും ദശലക്ഷക്കണക്കിന് ജീവൻ രക്ഷിക്കാൻ താൻ കാരണക്കാരനാണെന്ന് അദ്ദേഹം പറഞ്ഞതായും ട്രംപ് അവകാശപ്പെട്ടു. ന്യൂയോർക്കിൽ നടന്ന യുഎൻ ജനറൽ അസംബ്ലിയെ അഭിസംബോധന ചെയ്ത് സംസാരിക്കുമ്പോഴാണ് ട്രംപ് വീണ്ടും അവകാശവാദമുന്നയിച്ചത്.
താൻ അധികാരത്തിൽ തിരിച്ചെത്തിയ ശേഷം എട്ട് യുദ്ധങ്ങൾ അവസാനിപ്പിക്കാൻ സഹായിച്ചിട്ടുണ്ടെന്ന് ട്രംപ് പറഞ്ഞു. അതിൽ ഇന്ത്യയും പാകിസ്ഥാനും ഉൾപ്പെടുന്നുവെന്നും അദ്ദേഹം വ്യക്തമാക്കി. തന്നെക്കുറിച്ചുള്ള പാക് പ്രധാനമന്ത്രിയുടെ വാക്കുകൾ ഉദ്ധരിച്ച ട്രംപ്, താൻ 30 ദശലക്ഷത്തിലധികം ജീവനുകൾ രക്ഷിക്കാൻ ഉത്തരവാദിയാണെന്ന് പാക് പ്രധാനമന്ത്രി പറഞ്ഞതായി അവകാശപ്പെട്ടു.
എന്നാൽ യുഎസ് മധ്യസ്ഥതയിലൂടെയാണ് വെടിനിർത്തൽ ഉണ്ടായതെന്ന വാദത്തെ ഇന്ത്യ സ്ഥിരമായി തള്ളിക്കളഞ്ഞിട്ടുണ്ട്. ഇന്ത്യയുടെയും പാകിസ്ഥാന്റെയും മിലിട്ടറി ഓപ്പറേഷൻസ് ഡയറക്ടർ ജനറൽമാർ (ഡിജി‌എം‌ഒ) തമ്മിലുള്ള നേരിട്ടുള്ള ആശയവിനിമയത്തിലൂടെയാണ് ശത്രുത അവസാനിപ്പിക്കാനുള്ള ധാരണയിലെത്തിയതെന്നാണ് ഇന്ത്യ വ്യക്തമാക്കിയിട്ടുള്ളത്.
ഇന്ത്യയും പാകിസ്ഥാനും തമ്മിലുള്ള സംഘർഷങ്ങൾ ഉണ്ടായപ്പോഴൊക്കെ (അതിർത്തിയിലെ സംഘർഷങ്ങൾ ഉൾപ്പെടെ), ഇരുരാജ്യങ്ങളുടെയും നേതാക്കളുമായി തനിക്ക് അടുത്ത ബന്ധമുണ്ടെന്നും പ്രശ്നം പരിഹരിക്കാൻ മധ്യസ്ഥത വഹിക്കാൻ തയ്യാറാണെന്നും ട്രംപ് മുൻപും പലതവണ അവകാശപ്പെട്ടിട്ടുണ്ട്. എന്നാൽ, പാകിസ്ഥാനുമായി ഉഭയകക്ഷി വിഷയങ്ങളിൽ മൂന്നാം കക്ഷിയുടെ മധ്യസ്ഥതയോ ഇടപെടലോ ഇന്ത്യ അംഗീകരിക്കുന്നില്ല എന്നതാണ് ന്യൂഡൽഹിയുടെ പ്രഖ്യാപിത നിലപാട്. ഇരു രാജ്യങ്ങളുടെയും സൈനിക അല്ലെങ്കിൽ ഉദ്യോഗസ്ഥ തലത്തിലുള്ള നേരിട്ടുള്ള ചർച്ചകളിലൂടെയാണ് വെടിനിർത്തൽ ധാരണകളിൽ എത്തുന്നതെന്നും ഇന്ത്യ വ്യക്തമാക്കാറുണ്ട്.
Comments