ന്യൂഡല്‍ഹി : തിരഞ്ഞെടുപ്പ് കമ്മീഷനെതിരായ ആരോപണങ്ങളിൽ എൻഡിഎയിൽ ഭിന്നത രൂക്ഷം. കമ്മീഷൻ പരസ്യ വിശദീകരണം നൽകണമെന്ന് ഘടക കക്ഷികൾ. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഉയർന്ന ആരോപണങ്ങളിൽ തെരഞ്ഞെടുപ്പ് കമ്മീഷൻ വ്യക്തത വരുത്തണമെന്നാണ് എൻ‌ഡിഎ സഖ്യകക്ഷികൾ ആവശ്യപ്പെടുന്നത്.
വിവാദങ്ങളിൽ ജനങ്ങൾക്ക് ആശയക്കുഴപ്പമുണ്ടെന്ന് ബിഹാറിലെ രാഷ്ട്രീയ ലോക് മോർച്ച നിലപാടെടുത്തു.കമ്മീഷൻ വിശദീകരണം നൽകുന്നത് ഭരണത്തിലുള്ള ജനവിശ്വാസം കൂട്ടുമെന്ന് ടിഡിപിയും, ജനങ്ങളുടെ മനസ്സിൽ ഒരു തരത്തിലുള്ള സംശയവും ബാക്കിനിൽക്കരുതെന്ന് എൽജെപി നേതാവ് ചിരാഗ് പാസ്വാനും തുറന്നടിച്ചു.സഖ്യകക്ഷികളുടെ അതൃപ്തി നിലനിൽക്കുമ്പോഴും പ്രതിപക്ഷം തെറ്റിദ്ധാരണ പരത്തുകയാണെന്നാണ് ബിജെപിയുടെ വാദം.
അതേസമയം തിരഞ്ഞെടുപ്പ് കമ്മിഷനിൽ ഭിന്നതയെന്ന റിപ്പോർട്ടിൽ കേന്ദ്രത്തെ കടന്നാക്രമിക്കുകയാണ് പ്രതിപക്ഷം. പ്രധാനമന്ത്രി രാജ്യത്തോട് മറുപടി പറയണമെന്ന് കോൺഗ്രസ് അധ്യക്ഷൻ മല്ലികാർജുൻ ഖർഗെ ആവശ്യപ്പെട്ടു. ബിജെപിയും ആർഎസ്എസും തിരഞ്ഞെടുപ്പ് കമ്മിഷനും ചേർന്ന് രാജ്യദ്രോഹക്കുറ്റമാണ് ചെയ്തതെന്ന് പ്രതിപക്ഷ നേതാവ് രാഹുൽ ഗാന്ധി ആവശ്യപ്പെട്ടു. ഗ്യാനേഷ് കുമാറിനെ പുറത്താക്കണമെന്ന് ആവശ്യപ്പെട്ട് ഡൽഹിയിൽ യൂത്ത് കോൺഗ്രസ് പ്രതിഷേധം നടന്നു.
Comments