പട്ട്യാല: രാജ്പുരയിലെ ഒരു സ്വകാര്യ സർവ്വകലാശാലയിൽ പ്രേതബാധയുള്ള ഹോസ്റ്റലിനെക്കുറിച്ചും കാണാതായ രണ്ട് പെൺകുട്ടികളെക്കുറിച്ചുമുള്ള കിംവദന്തികളെത്തുടർന്ന് വെള്ളിയാഴ്ച രാത്രിയും ശനിയാഴ്ച പുലർച്ചെയുമായി വിദ്യാർത്ഥികൾ വൻ പ്രതിഷേധം നടത്തി. ഈ സംഘർഷം പിന്നീട് പൊലീസുമായുള്ള ഏറ്റുമുട്ടലിലേക്കും, രണ്ട് പൊലീസ് വാഹനം തകർക്കുന്നതിലേക്കും കാമ്പസ് വസ്‌തുക്കൾ നശിപ്പിക്കുന്നതിലേക്ക് വഴിമാറുകയും ചെയ്തു.
കാമ്പസിൽ 'പ്രേതത്തിന്റെ' സാന്നിധ്യം ഉണ്ടെന്ന് അവകാശപ്പെടുന്ന ഒരു വീഡിയോ സോഷ്യൽ മീഡിയയിൽ വൈറലായതിനെത്തുടർന്നാണ് ചിത്കാര സർവ്വകലാശാലയിൽ സംഘർഷം പൊട്ടിപ്പുറപ്പെട്ടത്. കാമ്പസിൽ ഒരു വിദ്യാർത്ഥിനി ആത്മഹത്യ ചെയ്തുവെന്നും അവളുടെ ആത്മാവ് ഇപ്പോൾ ഹോസ്റ്റൽ താമസക്കാരെ വേട്ടയാടുന്നുണ്ടെന്നും വാർത്ത പരന്നു. പെൺകുട്ടികളുടെ ഹോസ്റ്റലിൽ നിന്ന് നിലവിളികൾ കേട്ടതായും വിദ്യാർത്ഥികൾ അവകാശപ്പെട്ടു. എന്നാൽ ഈ അവകാശവാദം സർവ്വകലാശാല അധികൃതർ തള്ളി.
വീഡിയോ പ്രചരിച്ചതിന് പിന്നാലെ നൂറുകണക്കിന് വിദ്യാർത്ഥികൾ രാത്രി വൈകി തെരുവിൽ ഇറങ്ങി പ്രതിഷേധം സംഘടിപ്പിച്ചു. ചില വിദ്യാർത്ഥികൾ നടത്തിയ ഒരു പ്രാങ്ക് (തമാശ) ആണ് ഇതെന്നും ഒരു ഹോസ്റ്റലിൽ ആത്മഹത്യ ചെയ്ത മുൻ വിദ്യാർത്ഥിയുമായി ബന്ധപ്പെടുത്തി പ്രേതത്തെക്കുറിച്ചുള്ള കിംവദന്തികൾ പരന്നതാണ് സംഘർഷത്തിന് കാരണമെന്ന് ബനൂർ എസ്‌.എച്ച്.ഒ ഇൻസ്പെക്ടർ ഗുർസേവക് സിംഗ് പറഞ്ഞു. തുടർന്ന് രണ്ട് പെൺകുട്ടികളെ കാണാനില്ലെന്ന കിംവദന്തികളും പരന്നു. എന്നാൽ ഇതെല്ലാം വ്യാജമാണെന്ന് അദ്ദേഹം വ്യക്തമാക്കി. സർവ്വകലാശാലയിൽ വിദ്യാർത്ഥികളാരും ആത്മഹത്യ ചെയ്തിട്ടില്ല, ആരെയും കാണാതായിട്ടുമില്ല.
അതേസമയം നിലവിൽ കാര്യങ്ങൾ നിയന്ത്രണവിധേയമാണെന്നും അക്കാദമിക് പ്രവർത്തനങ്ങൾ പതിവുപോലെ തുടരുന്നുണ്ടെന്നും യൂണിവേഴ്സിറ്റി രജിസ്ട്രാർ കേണൽ രാകേഷ് ശർമ്മ (റിട്ട.) അറിയിച്ചു.
നൂറുകണക്കിന് ഹോസ്റ്റൽ വിദ്യാർത്ഥികൾ പൊതുസ്ഥലങ്ങളിൽ തടിച്ചുകൂടുകയും അധികൃതർക്കെതിരെ മുദ്രാവാക്യം വിളിക്കുകയും വിശദാംശങ്ങൾ ആവശ്യപ്പെടുകയും ചെയ്തു. ബനൂർ, രാജ്പുര സദർ, രാജ്പുര സിറ്റി പൊലീസ് സ്റ്റേഷനുകളിൽ നിന്നുള്ള സംഘങ്ങൾ കാമ്പസിലെത്തിയെങ്കിലും ജനക്കൂട്ടത്തിലെ ചിലർ പൊലീസ് വാഹനങ്ങൾ തകർക്കുകയും ഔട്ട്‌പോസ്റ്റ് ഇൻചാർജിനെ കയ്യേറ്റം ചെയ്യാൻ ശ്രമിക്കുകയും ചെയ്തു.
കാണാതായ പെൺകുട്ടികളെക്കുറിച്ചുള്ള കിംവദന്തികൾ അടിസ്ഥാനരഹിതമാണെന്നും അത്തരം സംഭവങ്ങളൊന്നും നടന്നിട്ടില്ലെന്ന് അധികൃതർ വിദ്യാർത്ഥികളോട് പറഞ്ഞുവെന്നും സർവകലാശാല രജിസ്ട്രാർ ശർമ്മ പറഞ്ഞു. കാണാതായ വിദ്യാർത്ഥികളുടെ വിശദാംശങ്ങൾ സ്ഥിരീകരിക്കാൻ വിദ്യാർത്ഥികളിൽ ആർക്കും കഴിഞ്ഞില്ലെന്നും അദ്ദേഹം വ്യക്തമാക്കി.
പോലീസ് പരിശോധന നടത്തുകയും, കാണാതായ വിദ്യാർത്ഥികളുടെ പേരോ ഫോട്ടോയോ റോൾ നമ്പരോ തിരിച്ചറിയുന്ന മറ്റ് വിവരങ്ങളോ നൽകാൻ പ്രതിഷേധക്കാർക്ക് കഴിഞ്ഞില്ലെന്ന് വ്യക്തമാക്കുകയും ചെയ്തു. ആരെയും കാണാതായതായി റിപ്പോർട്ട് ചെയ്തിട്ടില്ലെന്നും ആർക്കും അപായം സംഭവിച്ചിട്ടില്ലെന്നും എസ്‌.എച്ച്.ഒ ഗുർസേവക് സിംഗ് പറഞ്ഞു. കിംവദന്തികളുടെ ഉറവിടത്തെക്കുറിച്ചും അക്രമങ്ങളെക്കുറിച്ചും പട്യാല പോലീസ് അന്വേഷണം ആരംഭിച്ചിട്ടുണ്ടെങ്കിലും വിദ്യാർത്ഥികൾക്കെതിരെ കേസുകളൊന്നും രജിസ്റ്റർ ചെയ്തിട്ടില്ല. തമാശയ്ക്കും കിംവദന്തികൾക്കും പിന്നിൽ പ്രവർത്തിച്ചവരെ കണ്ടെത്താനുള്ള ശ്രമത്തിലാണ് അന്വേഷണ ഉദ്യോഗസ്ഥർ.
സ്ഥിരീകരിക്കാത്ത ഓൺലൈൻ അവകാശവാദങ്ങൾ അവഗണിക്കണമെന്ന് സർവ്വകലാശാല അധികൃതർ വിദ്യാർത്ഥികളോടും മാതാപിതാക്കളോടും അഭ്യർത്ഥിച്ചു. മുൻകരുതലിന്റെ ഭാഗമായി ശനിയാഴ്ച കാമ്പസിന് പുറത്ത് കൂടുതൽ സുരക്ഷാ ഉദ്യോഗസ്ഥരെ വിന്യവിച്ചിരുന്നു.
Comments