പാലക്കാട് : ജില്ലയില്‍ ഏഴു തദ്ദേശവാര്‍ഡുകളിലേക്ക് നടന്ന ഉപതെരഞ്ഞെടുപ്പില്‍ വലിയ മുന്‍തൂക്കമുണ്ടാക്കുകയാണ് എല്‍.ഡി.എഫ്. യുഡിഎഫിന്റെ രണ്ടു സിറ്റിംഗ്‌സീറ്റ് ഉള്‍പ്പെടെ കൊണ്ടുപോകുകയും ചെയ്തു. മൂന്നിടങ്ങളില്‍ അട്ടിമറിവിജയമാണ് എല്‍ഡിഎഫ് നേടിയത്.
ചിറ്റൂര്‍ മുന്‍സിപ്പാലിറ്റി 24-ാം വാര്‍ഡില്‍ നറുക്കെടുപ്പിലൂടെ യുഡിഎഫിന്റെ സീറ്റില്‍ എല്‍ഡിഎഫ് കടന്നുകയറി. എല്‍ഡിഎഫിനും യുഡിഎഫിനും തുല്യം വോട്ടുകളാണ് ലഭിച്ചത്. രണ്ടു പാര്‍ട്ടികള്‍ക്കും 423 വോട്ട് വീതം ലഭിച്ചതോടെയാണ് നറുക്കെടുപ്പിലായിരുന്നു വിജയിയെ തീരുമാനിച്ചത്.
സിറ്റിംഗ് എംഎല്‍എയുടെ സീറ്റിലാണ് തോല്‍വി. മുന്‍ കൗണ്‍സിലര്‍ ആയ സുമേഷ് അച്യുതന്‍ വന്‍ഭുരിപക്ഷത്തില്‍ കഴിഞ്ഞ തവണ ജയിച്ചുകയറിയ സീറ്റാണിത്. അദ്ദേഹം നിയമസഭയിലേക്ക് മത്സരിച്ചതോടെയാണ് ഉപതെരഞ്ഞെടുപ്പ് വേണ്ടി വന്നത്. പട്ടഞ്ചേരി പഞ്ചായത്തില്‍ 18 വോട്ടിന് എല്‍ഡിഎഫ് സ്ഥാനാര്‍ഥി ബിന്ദു കുമാരി വിജയിച്ചു. കഴിഞ്ഞ തവണ രണ്ട് വോട്ടിന് വിജയിച്ച വാര്‍ഡിലാണ് ഇത്തവണ ഭൂരിപക്ഷം 18 ആക്കിയത്.
ആലത്തൂര്‍ ബ്ലോക്ക് പഞ്ചായത്തിലെ അത്തിപ്പറ്റ ഡിവിഷനിലും എല്‍ഡിഎഫിനാണ് വിജയം. 790 വോട്ടിന് യുഡിഎഫിന്റെ സീറ്റ് പിടിച്ചെടുത്തു. അതേസമയം ശ്രീകൃഷ്ണപുരം പഞ്ചായത്തില്‍ വാര്‍ഡ് 13 രാഗം കോര്‍ണറില്‍ യുഡിഎഫ് വിജയിച്ചു. എല്‍ഡിഎഫിന്റെ സീറ്റായിരുന്നു ഇത്.
പട്ടഞ്ചേരി വാര്‍ഡ് 9 പാറക്കാട്ടുച്ചള്ള എല്‍ഡിഎഫ് നിലനിര്‍ത്തി. കരിമ്പ വാര്‍ഡ് 13 വെട്ടം യുഡിഎഫ് നിലനിര്‍ത്തി. പാലക്കാട് കരിമ്പ പതിമൂന്നാം വാർഡ് വെട്ടം യുഡിഎഫ് സ്ഥാനാർത്ഥി അബ്ദുൽ ജലീൽ 335 വോട്ടിന് വിജയിച്ചു.
യുഡിഎഫ് സ്ഥാനാർഥി അബ്ദുൽ ജലീൽ 692 വോട്ടും, എൽഡിഎഫ് സ്ഥാനാർത്ഥി മുഹമ്മദ് അഷറഫ് 357 വോട്ടും നേടി. ബിജെപി സ്ഥാനാർത്ഥി ശിവൻ ഒ ആർ 187 വോട്ടാണ് നേടിയത്.മലമ്പുഴ ബ്ലോക്ക് പഞ്ചായത്ത് ഹേമാംബിക നഗര്‍ ഡിവിഷന്‍ എല്‍ഡിഎഫ് നിലനിര്‍ത്തി.
Comments