റിയാദ്: സൗദി അറേബ്യയിലെ അഭ അന്താരാഷ്ട്ര വിമാനത്താവളത്തിലും റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിലും ഹൂതി ആ്രകമണം. 3 പേര്‍ കൊല്ലപ്പെടുകയും 36 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. യമനില്‍ ഇറാന്‍ പിന്തുണയുള്ള ഹൂതികളും സൗദി പിന്തുണയുള്ള സൈന്യവും തമ്മിലുള്ള സംഘര്‍ഷം രൂക്ഷമാകുന്ന സാഹചര്യത്തില്‍ സൗദിയിലെ രണ്ട് അന്താരാഷ്ട്ര വിമാനത്താവളങ്ങള്‍ക്ക് നേരെയാണ് ആക്രമണം ഉണ്ടായിരിക്കുന്നത്. ആക്രമണം സൗദി ജനറല്‍ അതോറിറ്റി ഓഫ് സിവിലിയന്‍ ഏവിയേഷന്‍ സ്ഥിരീകരിച്ചിട്ടുണ്ട്.
അഭ വിമാനത്താവളത്തില്‍ മൊറോക്കോ, അള്‍ജീരിയ എന്നിവിടങ്ങളില്‍ നിന്നുള്ള രണ്ട് സ്ത്രീകളും കൊല്ലപ്പെട്ടവരില്‍ പെടുന്നു. 28 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. കിംഗ് ഖാലിദ് അന്താരാഷ്ട്ര വിമാനത്താവളത്തിലുണ്ടായ ആക്രമണത്തില്‍ കൊല്ലപ്പെട്ടത് ഒരു സുഡാന്‍ പൗരനാണ്. ഇവിടെ അഞ്ച് സൗദി പൗരന്മാര്‍ ഉള്‍പ്പെടെ എട്ട് പേര്‍ക്ക് പരിക്കേല്‍ക്കുകയും ചെയ്തു.
യമനിലെ അന്താരാഷ്ട്ര അംഗീകാരമുള്ള സര്‍ക്കാരിനെ പിന്തുണയ്ക്കുന്ന സൗദി നേതൃത്വത്തിലുള്ള സഖ്യം, റിയാദില്‍ ആക്രമണത്തിന് ഉപയോഗിച്ച ബാലിസ്റ്റിക് മിസൈല്‍ പ്ലാറ്റ്ഫോം തകര്‍ത്തു. കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ ബാലിസ്റ്റിക് മിസൈല്‍ ഉപയോഗിച്ച് ആക്രമണം നടത്തിയതായി ഹൂതി സൈനിക വക്താവ് യഹ്യ സാരീ അവകാശപ്പെട്ടു. ഈ ആക്രമണം വ്യോമഗതാഗതം തടസ്സപ്പെടുത്തിയതായും അദ്ദേഹം പറഞ്ഞു. എന്നാല്‍ മിസൈല്‍ തടഞ്ഞുവെന്നാണ് സൗദി സഖ്യസേന അറിയിച്ചത്.
യമനിലെ സംഘര്‍ഷങ്ങളുടെയും സൗദി വിമാനത്താവളങ്ങള്‍ക്കും വ്യോമാതിര്‍ത്തിക്കും എതിരെയുള്ള ഹൂതികളുടെ ഭീഷണികളുടെയും പശ്ചാത്തലത്തില്‍ റിയാദിലെ യു.എസ് എംബസി സുരക്ഷാ മുന്നറിയിപ്പ് പുറപ്പെടുവിച്ചു. സൗദി അറേബ്യയിലുള്ള യു.എസ് പൗരന്മാര്‍ ജാഗ്രത പാലിക്കണമെന്ന് എംബസി ആവശ്യപ്പെട്ടു. സംഘര്‍ഷം കൂടുതല്‍ രൂക്ഷമാകാന്‍ സാധ്യതയുണ്ടെന്നും മുന്നറിയിപ്പ് നല്‍കി. വിമാന സര്‍വീസുകള്‍ റദ്ദാക്കല്‍, വ്യോമാതിര്‍ത്തി അടയ്ക്കല്‍ തുടങ്ങിയ യാത്രാ തടസ്സങ്ങള്‍ ഉണ്ടായാല്‍ യമന്‍ അതിര്‍ത്തിക്ക് സമീപത്തേക്ക് യാത്ര ചെയ്യരുതെന്നും അമേരിക്കക്കാരോട് നിര്‍ദ്ദേശിച്ചു.
നാല് വര്‍ഷത്തെ വെടിനിര്‍ത്തലിന് ശേഷം ജൂലൈയില്‍ യമനിലെ ആഭ്യന്തര യുദ്ധം പുനരാരംഭിച്ചതോടെ സംഘര്‍ഷം രൂക്ഷമായിരിക്കുകയാണ്. ചെങ്കടല്‍ തീരപ്രദേശങ്ങള്‍ ഹൂതികള്‍ പിടിച്ചെടുത്തപ്പോള്‍, അവര്‍ പിടിച്ചെടുത്ത പ്രദേശങ്ങള്‍ തിരിച്ചുപിടിക്കാന്‍ സൗദി അറേബ്യയുടെ പിന്തുണയോടെ സര്‍ക്കാര്‍ സേന ശ്രമം ആരംഭിച്ചിട്ടുണ്ട്. പോരാട്ടം മൂലം യമനില്‍ 200,000-ത്തിലധികം ആളുകള്‍ ഭവനരഹിതരായതായി ഐക്യരാഷ്ട്രസഭ അറിയിച്ചു.
മാധ്യമങ്ങള്‍ക്ക് പ്രവേശനം ലഭിക്കാത്തതും സാഹചര്യം പെട്ടെന്ന് മാറിക്കൊണ്ടിരിക്കുന്നതും കാരണം ഇരുവിഭാഗങ്ങളുടെയും അവകാശവാദങ്ങള്‍ സ്വതന്ത്രമായി സ്ഥിരീകരിച്ചിട്ടില്ല. യമനിലെയും സൗദി അറേബ്യയിലെയും വിമാനത്താവളങ്ങളെയും മറ്റ് തന്ത്രപ്രധാനമായ സ്ഥലങ്ങളെയും ലക്ഷ്യമിട്ട് ആക്രമണങ്ങള്‍ വര്‍ദ്ധിച്ചുവരുന്നത് സാധാരണക്കാരുടെ സുരക്ഷയെക്കുറിച്ചും വ്യോമഗതാഗതത്തെക്കുറിച്ചുമുള്ള ആശങ്കകള്‍ വര്‍ദ്ധിപ്പിച്ചിട്ടുണ്ട്.
Comments