എടത്വാ: ഇന്റര്‍നെറ്റ്‌ കവറേജ്‌ മെച്ചപ്പെടുത്തുന്നതിന്റെ ഭാഗമായി തായങ്കരിയില്‍ ബി.എസ്‌.എന്‍.എല്‍ ടവര്‍ നിര്‍മ്മാണം പുരോഗമിക്കുന്നു. കണ്ണാടിയില്‍ നിലവിലെ ടവറിന്റെ ഉയരം വര്‍ധിപ്പിക്കും. കുട്ടനാട്ടിലെ വിവിധ പ്രദേശങ്ങളില്‍ ബി.എസ്‌.എന്‍.എല്‍ മൊബൈല്‍ നെറ്റ്‌വര്‍ക്ക്‌ കവറേജും ഇന്റര്‍നെറ്റ്‌ ലഭ്യതയും മെച്ചപ്പെടു ത്തുന്നതി നായാണ്‌ പുതിയ ടവര്‍ സ്‌ഥാപിക്കുന്നത്‌.
നിലവിലുള്ള ടവറുകളുടെ ശേഷി വര്‍ധിപ്പിക്കുന്നതിനും നടപടിയായിട്ടുണ്ട്‌. മേഖലയിലെ നെറ്റ്‌വര്‍ക്ക്‌ പ്രശ്‌നങ്ങള്‍ പരിഹരിക്കണമെന്ന ആവശ്യവുമായി കൊടിക്കുന്നില്‍ സുരേഷ്‌ എം.പി ബി.എസ്‌.എന്‍.എല്‍ കേരള സര്‍ക്കിള്‍ ജനറല്‍ മാനേജര്‍ ആര്‍. സജികുമാറുമായി തിരുവനന്തപുരത്തെ ബി.എസ്‌.എന്‍.എല്‍ ആസ്‌ഥാനത്ത്‌ നടത്തിയ ചര്‍ച്ചയിലാണ്‌ വിവിധ പ്രദേശങ്ങള്‍ക്കായുള്ള നടപടികള്‍ക്ക്‌ നിര്‍ദേശം നല്‍കിയത്‌. തായങ്കരി മേഖലയില്‍ 40 മീറ്റര്‍ ഉയരമുള്ള ജി.ബി.ടി സ്‌ഥാപിക്കുന്ന പ്രവൃത്തി പുരോഗമിക്കുകയാണ്‌. രണ്ടുമാസത്തിനുള്ളില്‍ ടവര്‍ പ്രവര്‍ത്തനസജ്‌ജമാക്കാനാണ്‌ ബി.എസ്‌.എന്‍.എല്‍ ലക്ഷ്യമിടുന്നത്‌. തായങ്കരിയിലും സമീപ പ്രദേശങ്ങളിലും കൂടുതല്‍ മെച്ചപ്പെട്ട മൊബൈല്‍ സിഗ്നലും ഇന്റര്‍നെറ്റ്‌ സേവനവും ലഭ്യമാക്കുന്നതിനുള്ള പ്രധാന നടപടിയാണിത്‌.
കണ്ണാടി മേഖലയിലെ നെറ്റ്‌വര്‍ക്ക്‌ കവറേജ്‌ മെച്ചപ്പെടുത്തുന്നതിനായി കുസാറ്റ്‌ പുളിങ്കുന്ന്‌ സൈറ്റിലുള്ള നിലവിലെ ടവറിന്റെ ഉയരം വര്‍ധിപ്പിക്കാനും തീരുമാനിച്ചിട്ടുണ്ട്‌. നിലവിലുള്ള സംവിധാനത്തിന്റെ സാങ്കേതിക ശേഷി കൂടുതല്‍ ഫലപ്രദമായി ഉപയോഗപ്പെടുത്തി കവറേജ്‌ മെച്ചപ്പെടു ത്തുന്നതിനാണ്‌ ഈ നടപടി. വാലടി, കുമരങ്കരി, കാവാലം ലിസിയോ ചര്‍ച്ച്‌ പരിസരം എന്നിവിടങ്ങളില്‍ പുതിയ മൊബൈല്‍ ടവറുകള്‍ സ്‌ഥാപിക്കുന്നതിനുള്ള നടപടികളും പുതിയ പദ്ധതിയില്‍ ഉള്‍പ്പെടുത്തും. കുട്ടനാട്ടിലെ വിവിധ പ്രദേശങ്ങളിലെ ഭൂമിശാസ്‌ത്രപരമായ പ്രത്യേകതകള്‍ കണക്കിലെടുത്ത്‌ നെറ്റ്‌വര്‍ക്ക്‌ ലഭ്യത മെച്ചപ്പെടു ത്തുന്നതിനായി കൂടുതല്‍ സൈറ്റുകള്‍ ആവശ്യമായ ഇടങ്ങളില്‍ ഉള്‍പ്പെടുത്തണമെന്ന്‌ എം.പി ആവശ്യപ്പെട്ടു. കുട്ടനാട്ടിലെ ഉള്‍പ്രദേശങ്ങളില്‍ മൊബൈല്‍ സിഗ്നല്‍ ലഭ്യതക്കുറവ്‌ ജനങ്ങളുടെ ദൈനംദിന ആശയവിനിമയത്തെയും ഓണ്‍ലൈന്‍ പഠനത്തെയും ഡിജിറ്റല്‍ സേവനങ്ങളുടെ ഉപയോഗത്തെയും ബാധിക്കുന്ന സാഹചര്യം പരിഹരിക്കേണ്ടതിന്റെ ആവശ്യകത എം.പി ചര്‍ച്ചയില്‍ ചൂണ്ടിക്കാട്ടി. പുതിയ ടവറുകളുടെ നിര്‍മാണവും നിലവിലുള്ള ടവറിന്റെ ഉയരം വര്‍ധിപ്പിക്കുന്നതും സമയബന്ധിതമായി പൂര്‍ത്തിയാക്കണമെന്നും അദ്ദേഹം നിര്‍ദേശിച്ചു. കുട്ടനാട്ടിലെ എല്ലാ പ്രദേശങ്ങളിലും മെച്ചപ്പെട്ട മൊബൈല്‍ കവറേജും വിശ്വസനീയമായ ഇന്റര്‍നെറ്റ്‌ സേവനവും ഉറപ്പാക്കുന്നതിനായി ബി.എസ്‌.എന്‍.എല്‍ അധികൃതരുമായി തുടര്‍ ഇടപെടലുകള്‍ നടത്തുമെന്നും തീരുമാനിച്ച നടപടികളുടെ പുരോഗതി വിലയിരുത്തുമെന്നും കൊടിക്കുന്നില്‍ സുരേഷ്‌ എം.പി വ്യക്‌തമാക്കി.
Comments