നോയിഡ: ഗ്രേറ്റർ നോയിഡയിലെ റാബുപുര പ്രദേശത്തുള്ള നഗ്‌ല ശ്രീ പദം ഗ്രാമത്തിലെ വസതിയിൽ ദമ്പതികളും 3 നും 11 നും ഇടയിൽ പ്രായമുള്ള അവരുടെ മൂന്ന് കുട്ടികളും ഉൾപ്പെടെ ഒരു കുടുംബത്തിലെ അഞ്ച് പേരെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. ശനിയാഴ്ച രാവിലെയോടെയായിരുന്നു സംഭവം.
ഭക്ഷ്യവിഷബാധയാകാം മരണകാരണമെന്നാണ് പോലീസ് സംശയിക്കുന്നത്, എന്നാൽ മരണ കാരണം സംബന്ധിച്ച് ഇതുവരെ സ്ഥിരീകരണമായിട്ടില്ല. പ്രാഥമിക അന്വേഷണത്തിൽ, കുടുംബാംഗങ്ങൾ രാത്രി നൂഡിൽസ് കഴിച്ചിരുന്നതായി അയൽവാസികളും മഹേഷിന്റെ മാതാവും പോലീസിനോട് പറഞ്ഞതായി റിപ്പോർട്ടുണ്ട്. അടുത്ത ദിവസം രാവിലെ അഞ്ചുപേരെയും മരിച്ച നിലയിൽ കണ്ടെത്തുകയായിരുന്നു. വായയിൽ നിന്ന് നുരയും പതയും വന്നതായും റിപ്പോർട്ടുണ്ട്, എന്നാൽ മരണകാരണം നിർണ്ണയിക്കുന്നതിൽ ഇതിന്റെ പ്രാധാന്യം എത്രത്തോളമാണെന്ന് ഉദ്യോഗസ്ഥർ ഇതുവരെ സ്ഥിരീകരിച്ചിട്ടില്ല.
പോലീസിന്റെ വിവരമനുസരിച്ച്, ശനിയാഴ്ച രാവിലെയാണ് മരണത്തെക്കുറിച്ചുള്ള വിവരം റാബുപുര പോലീസ് സ്റ്റേഷനിൽ ലഭിക്കുന്നത്. വിവരം ലഭിച്ചയുടൻ ലോക്കൽ പോലീസും മുതിർന്ന ഉദ്യോഗസ്ഥരും ആംബുലൻസും ഫുഡ് സേഫ്റ്റി ഡിപ്പാർട്ട്‌മെന്റിന്റെ ടീമും സംഭവസ്ഥലത്തെത്തി. പ്രാഥമിക കണ്ടെത്തലുകൾ സാദ്ധ്യമായ ഭക്ഷ്യവിഷബാധയിലേക്ക് വിരൽ ചൂണ്ടുന്നുണ്ടെന്ന് പോലീസ് പറഞ്ഞു. എന്നിരുന്നാലും പോസ്റ്റ്‌മോർട്ടം പരിശോധനകൾക്കും മറ്റ് ശാസ്ത്രീയ അന്വേഷണങ്ങൾക്കും ശേഷം മാത്രമേ യഥാർത്ഥ മരണകാരണം വ്യക്തമാകൂ എന്ന് ഉദ്യോഗസ്ഥർ മുന്നറിയിപ്പ് നൽകി.
ആവശ്യമായ നിയമപരമായ നടപടിക്രമങ്ങൾ പൂർത്തിയാക്കിയ ശേഷം മൃതദേഹങ്ങൾ പോസ്റ്റ്‌മോർട്ടത്തിനായി അയക്കുകയാണ്. സംഭവത്തിൽ കൂടുതൽ അന്വേഷണം നടന്നുവരികയാണെന്നും മെഡിക്കൽ, ഫോറൻസിക് പരിശോധനാ ഫലങ്ങളുടെ അടിസ്ഥാനത്തിൽ ഉചിതമായ നിയമനടപടികൾ സ്വീകരിക്കുമെന്നും പോലീസ് അറിയിച്ചു.
Comments