പാരിസ്: വർദ്ധിച്ചുവരുന്ന ജീവിതച്ചെലവ്, കുറഞ്ഞ വേതനം, മോശമാകുന്ന പൊതുസേവനങ്ങൾ എന്നിവയ്‌ക്കെതിരെ ശനിയാഴ്ച ഫ്രാൻസ്, ബെൽജിയം, ഇറ്റലി, പോർച്ചുഗൽ എന്നിവിടങ്ങളിൽ ലക്ഷക്കണക്കിന് ആളുകൾ തെരുവിൽ പ്രതിഷേധിച്ചു. പല നഗരങ്ങളിലും പ്രതിഷേധങ്ങൾ അക്രമാസക്തമായി മാറി. ഫ്രാൻസിൽ നടന്ന വൻ പ്രതിഷേധത്തിൽ കലാപകാരികൾ തീയിട്ടതിനെത്തുടർന്ന് 143 വർഷം പഴക്കമുള്ള ഒരു ഫ്രഞ്ച് പൈതൃക കേന്ദ്രം തകർന്നടിയുന്നത് വീഡിയോ ദൃശ്യങ്ങളിൽ വ്യക്തമാണ്.
പ്രതിഷേധക്കാർ ലിമോഗെസിലെ ടൗൺഹാളിന്റെ പുറംഭാഗത്ത് തീയിട്ടതിനെ തുടർന്ന് അതിന്റെ മൂന്നിൽ രണ്ട് ഭാഗവും നശിച്ചതായി ലിമോഗെസിലെ പ്രാദേശിക ഉദ്യോഗസ്ഥർ പറഞ്ഞു. ഈ നാശനഷ്ടത്തെ അവർ "പൈതൃകത്തിന് ഏറ്റ വലിയ ദുരന്തം" എന്നാണ് വിശേഷിപ്പിച്ചത്. 143 വർഷത്തിലേറെ പഴക്കമുള്ള ഈ ടൗൺ ഹാൾ കെട്ടിടം ഒന്നാം ലോകമഹായുദ്ധം (1914–1918), രണ്ടാം ലോകമഹായുദ്ധം (1939–1945) എന്നീ രണ്ട് പ്രമുഖ ലോകമഹായുദ്ധങ്ങളെയും അതിജീവിച്ച ഒന്നാണ്. ഫ്രാൻസിന്റെ ചരിത്രത്തിലെ പ്രക്ഷുബ്ധമായ യുദ്ധകാലഘട്ടങ്ങളെയും ബോംബാക്രമണങ്ങളെയും അതിജീവിച്ച് നിലനിന്ന ഒരു പൈതൃക സ്മാരകമാണ് പ്രക്ഷോഭകർ തീയിട്ടതിനെ തുടർന്ന് ഭാഗികമായി തകർന്നടിഞ്ഞത്.
ഫ്രാൻസിൽ സ്കൂളുകളിലെ സാഹചര്യങ്ങൾ, ഇന്ധന വിലക്കയറ്റം, ജീവിതച്ചെലവ് എന്നിവയ്‌ക്കെതിരെയുള്ള പ്രകടനങ്ങളിൽ ഏകദേശം 5,50,000 ആളുകൾ പങ്കെടുത്തു. പാരീസ്, മാഴ്സെ, നൈസ്, നാന്റ്സ്, ബോർഡോ, ലിമോഗെസ്, ലിൽ, ടൂളൂസ്, സ്ട്രാസ്ബർഗ് എന്നിവിടങ്ങളിൽ ഡസൻ കണക്കിന് കടകൾ കൊള്ളയടിക്കപ്പെട്ടതായി എഎഫ്പി വാർത്താ ഏജൻസി റിപ്പോർട്ട് ചെയ്തു.
പ്രതിഷേധക്കാരുടെ സംഘങ്ങൾ തെരുവിൽ തീവയ്ക്കുന്ന ദൃശ്യങ്ങൾ വീഡിയോകളിൽ കാണാമായിരുന്നു. രാത്രി വൈകിയും പാരീസിൽ തീയാളിക്കൊണ്ടിരുന്നു. ആൾക്കൂട്ടത്തെ പിരിച്ചുവിടാൻ ലഹള വിരുദ്ധ പോലീസ് കണ്ണീർവാതകവും ലാത്തിച്ചാർജും പ്രയോഗിച്ചു.
പ്രക്ഷോഭങ്ങളെ നേരിടുന്നതിൽ അധികാരികൾ പരാജയപ്പെട്ടുവെന്ന വിമർശനങ്ങൾക്കിടയിൽ കുറഞ്ഞത് 195 പേരെ കസ്റ്റഡിയിലെടുത്തു. ഈ ആഴ്ചയുടെ തുടക്കത്തിൽ പോലീസ് നടപടിയിൽ 14 വയസ്സുകാരനായ ഒരു ആൺകുട്ടിയുടെ താടിയെല്ല് ഒടിഞ്ഞിരുന്നു. വടക്കുപടിഞ്ഞാറൻ ഫ്രാൻസിലെ അലൻസോണിൽ മറ്റൊരു പോലീസ് ഉദ്യോഗസ്ഥൻ ഒരു പെൺകുട്ടിയെ കഴുത്തിന് പിടിച്ചു ഞെരിക്കുന്ന ദൃശ്യങ്ങളും ക്യാമറയിൽ പതിഞ്ഞിരുന്നു. എന്നാൽ ഇത്തരത്തിലുള്ള ബലപ്രയോഗങ്ങൾ നിയമപ്രകാരം നിരോധിക്കപ്പെട്ടതാണ്.
കഴിഞ്ഞ മാസം വിദ്യാർത്ഥികളുടെ നേതൃത്വത്തിൽ നടന്ന റാലികളെത്തുടർന്ന് ആരംഭിച്ച ഈ പ്രക്ഷോഭം, തകർന്നുകൊണ്ടിരിക്കുന്ന സ്കൂളുകൾ, ജീവിതച്ചെലവ് വർദ്ധിക്കൽ, സർക്കാരിന്റെ നിസ്സംഗത എന്നിവയ്‌ക്കെതിരെയുള്ള വലിയൊരു മുന്നേറ്റമായി മാറിയിരിക്കുകയാണ്. സമാധാനപരമായ പ്രതിഷേധങ്ങളെ അട്ടിമറിച്ച "കുഴപ്പക്കാരായ വിധ്വംസകരെ" ഫ്രഞ്ച് പ്രസിഡന്റ് ഇമ്മാനുവൽ മാക്രോൺ അപലപിച്ചു. "അക്രമം അഴിച്ചുവിട്ടവരും, (പോലീസ്) പ്രിഫെക്ടറുകളും ബിസിനസ്സുകളും ആക്രമിച്ചവരും, നമ്മുടെ ടൗൺഹാളുകൾ പോലും കൊള്ളയടിച്ചവരും നിയമത്തിന് മുന്നിൽ കൊണ്ടുവരപ്പെടുകയും ശിക്ഷിക്കപ്പെടുകയും ചെയ്യും" എന്ന് അദ്ദേഹം ശനിയാഴ്ച മുന്നറിയിപ്പ് നൽകി.\
ഫ്രാൻസിലെ അശാന്തി മറ്റ് യൂറോപ്യൻ രാജ്യങ്ങളിലേക്കും വ്യാപിച്ചതോടെ യൂറോപ്യൻ യൂണിയനിലെ വിവിധ സർക്കാരുകൾ കടുത്ത സമ്മർദ്ദത്തിലായി. ബ്രസ്സൽസിൽ, പ്രതിഷേധക്കാർ ഉദ്യോഗസ്ഥർക്ക് നേരെ വസ്തുക്കൾ എറിയുകയും തീയിടുകയും ചെയ്തുവെന്നാരോപിച്ച് പോലീസ് കണ്ണീർവാതകവും ജലപീരങ്കിയും പ്രയോഗിച്ചു. ലിസ്ബണിൽ, ഉയർന്ന ജീവിതച്ചെലവ്, കുറഞ്ഞ വേതനം, പ്രധാന നഗരങ്ങളിൽ വീട് ലഭിക്കാനുള്ള ബുദ്ധിമുട്ട് എന്നിവയ്‌ക്കെതിരെ പതിനായിരക്കണക്കിന് ആളുകൾ മാർച്ച് നടത്തി. ഇറ്റലിയിലെ മിലാൻ, ബൊളോണ എന്നിവിടങ്ങളിൽ നടന്ന പ്രതിഷേധത്തിനിടയിൽ പ്രക്ഷോഭകർ കല്ലെറിയുകയും പോലീസുകാരുമായി ഏറ്റുമുട്ടുകയും ചെയ്തു.
Comments