തിരുവനന്തപുരം: കൈക്കൂലി ആവശ്യപ്പെട്ട് പരസ്യമായി വിലപേശുന്ന ദൃശ്യങ്ങൾ പുറത്തുവന്നതിനു പിന്നാലെ തിരുവനന്തപുരം കോർപ്പറേഷൻ കൗൺസിലർ അജിന്റെ വീട്ടിൽ വിജിലൻസ് പരിശോധന. ഭൂമി തരംമാറ്റുന്നതിനും സമീപത്തെ പുറമ്പോക്ക് ഭൂമി അനധികൃതമായി രജിസ്റ്റർ ചെയ്തു നൽകുന്നതിനുമായി പത്ത് ലക്ഷം രൂപ കൈക്കൂലി ആവശ്യപ്പെടുന്ന വീഡിയോ പുറത്തുവന്നിരുന്നു. ഇതിനു പിന്നാലെയാണ് വിജിലൻസിന്റെ നടപടി. തൃക്കണ്ണാപുരം വാർഡിലെ ഇടത് കൗൺസിലറാണ് അജിൻ.
പേയാട് സ്വദേശി സഞ്ജുവിന്റെ ഭൂമിയുമായി ബന്ധപ്പെട്ടാണ് കൈക്കൂലി ആവശ്യപ്പെട്ടതെന്നാണ് പുറത്തുവന്ന വിവരങ്ങൾ. തൃക്കണ്ണാപുരം വാർഡിൽ 19 സെന്റ് സ്ഥലം വാങ്ങി പ്ലോട്ടുകളാക്കി വിൽക്കുന്നതിനിടെ നിർമാണ പ്രവർത്തനങ്ങൾ ആരംഭിച്ചപ്പോഴാണ് കൗൺസിലർ ഇടപെട്ടത്. പത്ത് ലക്ഷം രൂപ നൽകിയാൽ സമീപത്തെ പുറമ്പോക്ക് ഭൂമി കൂടി രജിസ്റ്റർ ചെയ്തു നൽകാമെന്നായിരുന്നു വാഗ്ദാനം. കൈക്കൂലി ആവശ്യപ്പെടുന്ന ദൃശ്യങ്ങൾക്കൊപ്പം ഭീഷണിപ്പെടുത്തുന്ന ഫോൺ സംഭാഷണവും പുറത്തുവന്നിരുന്നു.
പണം നൽകിയില്ലെങ്കിൽ ഡിവൈഎഫ്ഐ പ്രവർത്തകരെ ഇറക്കി സ്ഥലത്ത് സമരം നടത്തുമെന്നും കൊടികുത്തുമെന്നും കൗൺസിലർ ഭീഷണിപ്പെടുത്തിയതായാണ് പുറത്തുവന്ന ശബ്ദസന്ദേശത്തിലുള്ളത്. ദൃശ്യങ്ങളും സംഭാഷണവും പുറത്തുവന്നതോടെ സിപിഎമ്മും പ്രതിരോധത്തിലായിരുന്നു. സംഭവവുമായി ബന്ധപ്പെട്ട് വിജിലൻസ് പരിശോധന നടത്തിവരികയാണ്.
Comments