കൊച്ചി: സിഎംആർഎൽ–എക്സാലോജിക് മാസപ്പടി കേസിൽ താൻ നടത്തിയ പോരാട്ടം ഒട്ടും എളുപ്പമായിരുന്നില്ലെന്നും കുടുംബാംഗങ്ങൾക്കുൾപ്പെടെ നിരന്തരം ഭീഷണി നേരിടേണ്ടിവന്നെന്നും മാത്യു കുഴൽനാടൻ എംഎൽഎ. കേസുമായി ബന്ധപ്പെട്ട് ഒരുപാട് പ്രയാസങ്ങൾ നേരിട്ടു. ആക്ഷേപങ്ങളും പരിഹാസങ്ങളും കേൾക്കേണ്ടിവന്നു. ഈ ഘട്ടങ്ങളിലെല്ലാം തന്നെ ചേർത്തുനിർത്തിയത് കെ. സുധാകരനായിരുന്നുവെന്നും മൂവാറ്റുപുഴയിൽ നടന്ന പൊതുപരിപാടിയിൽ അദ്ദേഹം പറഞ്ഞു.
തനിക്കെതിരെ ഉയർന്ന ആക്രമണങ്ങൾ മനസ്സിലാക്കാം. കാരണം തങ്ങളെല്ലാം രാഷ്ട്രീയക്കാരാണ്. എന്നാൽ മാസപ്പടി കേസിൽ പോരാട്ടം തുടങ്ങിയതിനു പിന്നാലെ പ്രായാധിക്യമുള്ള അമ്മയുടെ ഫോണിലേക്കും ഭാര്യയുടെയും ഭാര്യാവീട്ടുകാരുടെയും ഫോണുകളിലേക്കും നിരന്തരം ഭീഷണികൾ വന്നിരുന്നുവെന്ന് മാത്യു കുഴൽനാടൻ പറഞ്ഞു. താൻ നേരിട്ട പല പ്രയാസങ്ങളും ആരോടും പറഞ്ഞിട്ടില്ലെന്നും അദ്ദേഹം വ്യക്തമാക്കി.
കണ്ടിട്ടില്ലാത്തവരും അറിയാത്തവരുമായ നിരവധി പേർ വിളിച്ച് ഭീഷണിപ്പെടുത്തിയിട്ടുണ്ട്. വഴിയിലൂടെ നടക്കുമ്പോൾ സൂക്ഷിക്കണമെന്ന് മുന്നറിയിപ്പ് നൽകിയവരുമുണ്ട്. മകനേ, എന്തിനാണ് ഇതിന്റെ പിന്നാലെ പോകുന്നതെന്നും ഇത്രയധികം അപകടസാധ്യത ഏറ്റെടുക്കുന്നതെന്നും അമ്മ ചോദിച്ചിരുന്നതായി അദ്ദേഹം പറഞ്ഞു. തങ്ങൾക്കു മുമ്പ് ഇത്തരം വിഷയങ്ങളിൽ ഇടപെട്ടവരോട് എങ്ങനെയാണ് പെരുമാറിയിട്ടുള്ളതെന്ന് കേരളം കണ്ടിട്ടുണ്ടെന്നും മാത്യു കുഴൽനാടൻ കൂട്ടിച്ചേർത്തു.
എല്ലാ ആക്ഷേപങ്ങളും പരിഹാസങ്ങളും നേരിട്ടശേഷം പിണറായി വിജയനെതിരെ വിജിലൻസ് കേസെടുക്കണമെന്ന് ഹൈക്കോടതി നിർദേശിച്ച സാഹചര്യമുണ്ടായപ്പോൾ സ്വാഭാവികമായും ആവേശം തോന്നിയെന്നും അദ്ദേഹം പറഞ്ഞു. വയലാർ രവിയാണ് തന്നെ രാഷ്ട്രീയത്തിലേക്ക് കൈപിടിച്ചുകൊണ്ടുവന്നത്. എന്നാൽ പ്രതിസന്ധികൾ നേരിട്ടപ്പോഴെല്ലാം ചേർത്തുനിർത്തി കരുത്തുപകർന്നത് കെ. സുധാകരനെന്ന നേതാവാണെന്നും മാത്യു കുഴൽനാടൻ വ്യക്തമാക്കി.
Comments