ആലപ്പുഴ: പോഷകാഹാരക്കുറവ് മൂലം രണ്ടു വയസ്സുള്ള കുഞ്ഞ് മരിക്കാന്‍ ഇടയായ സംഭവത്തില്‍ സംസ്ഥാന ബാലാവകാശ സംരക്ഷണ കമ്മീഷന്‍ സ്വമേധയാ കേസെടുത്തു. ജില്ലാ മെഡിക്കല്‍ ഓഫീസര്‍, കാര്‍ത്തികപ്പള്ളി ഗ്രാമ പഞ്ചായത്ത് സെക്രട്ടറി, ജില്ലാ ശിശുസംരക്ഷണ ഓഫീസര്‍, കാര്‍ത്തികപ്പള്ളി ഗ്രാമ പഞ്ചായത്ത് ഐസിഡിഎസ് സൂപ്പര്‍ വൈസര്‍ എന്നിവരോട് കമ്മീഷന്‍ വിശദീകരണം ആവശ്യപ്പെട്ടു.
മാതാപിതാക്കളുടെ ശ്രദ്ധക്കുറവിനെ തുടര്‍ന്ന് വൃത്തിഹീനമായ ചുറ്റുപാടുകളില്‍ ജീവിച്ചിരുന്ന രണ്ട് വയസുകാരന്‍ മരിച്ചത് പോഷകാഹാര കുറവിനെ തുടര്‍ന്നെന്നാണ് പോസ്റ്റ്‌മോര്‍ട്ടത്തിലെ കണ്ടെത്തല്‍. സ്ഥലത്തെ ആശാ വര്‍ക്കറോടും ജില്ലാ ശിശു സംരക്ഷണ വകുപ്പ് ഓഫീസറോടും കമ്മീഷന്‍ വിശദീകരണം തേടി. സംഭവത്തില്‍ ആഭ്യന്തരവകുപ്പും അന്വേഷണത്തിന് നിര്‍ദേശം നല്‍കിയിരിക്കുകയാണ്. തഹസീല്‍ദാരോട് അടിയന്തിരമായി അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ആവശ്യപ്പെട്ടിട്ടുള്ളതായി ആഭ്യന്തരമന്ത്രി പറഞ്ഞു.
വളരെ വൃത്തിഹീനമായ സാഹചര്യത്തിലായിരുന്നു മരിച്ച കുട്ടിയുള്‍പ്പെടെ നാലു കുട്ടികളും ജീവിച്ചിരുന്നത്. കുട്ടികള്‍ക്ക് ആവശ്യമായ പാലോ ഭക്ഷണമോ മാതാവ് കൊടുത്തിരുന്നില്ല. ഭക്ഷണം വീട്ടില്‍ പാകം ചെയ്തും നല്‍കിയിരുന്നില്ല. കുട്ടികള്‍ക്ക് പലപ്പോഴും നാട്ടുകാരാണ് ആഹാരം നല്‍കിയിരുന്നത്. മാതാപിതാക്കള്‍ മദ്യപാന ശീലരാണെന്നും കുട്ടികളെ വേണ്ടത്ര പരിപാലിച്ചില്ലെന്നും വിവരമുണ്ട്.
ഒരുകവര്‍ പാല് വാങ്ങി, അതില്‍ വെള്ളം ചേര്‍ത്ത് കുപ്പിയിലാക്കി കുഞ്ഞുങ്ങളുടെ കയ്യില്‍ കൊടുക്കും, കുടിച്ചാല്‍ കുടിച്ചു, തെയിലവെള്ളം തിളപ്പിച്ച് രണ്ട് ബിസ്‌ക്കറ്റ് കയ്യില്‍ കൊടുക്കും. കുഞ്ഞുങ്ങളെ കുളിപ്പാക്കാറുമില്ല. 9 വയസുള്ള മൂത്ത കുഞ്ഞാണ് താഴെയുള്ള നാലുപേരെ നോക്കുന്നതെന്നുമാണ് രണ്ടരവയസുകാരന്റെ മരണത്തിന് പിന്നാലെ അയല്‍വാസികള്‍ പറയുന്നത്. രാഹുല്‍ മരിച്ച ശേഷം ബന്ധു വീട്ടില്‍ എത്തിച്ച് കുഴിച്ചിടാന്‍ അച്ഛന്‍ രാജേഷ് പറഞ്ഞു. കുഞ്ഞ് മരിച്ചിട്ടും ഇന്നലെ ആശുപത്രിയില്‍ എത്തിക്കാന്‍ തയ്യാറായില്ല.
ആദ്യ കുട്ടി മരിച്ചത് ആരെയും അറിയിച്ചില്ല. അച്ഛന്റെ വീട്ടില്‍ മൃതദേഹം മറവ് ചെയ്യുകയായിരുന്നു. ആറ് കുട്ടികള്‍ക്കും മുലപ്പാല്‍ കൊടുത്തിരുന്നില്ലെന്ന് രാഹുലിന്റെ മുത്തശ്ശി പറഞ്ഞു. നേരത്തേ നാട്ടുകാര്‍ ഇടപെട്ട് കുട്ടികളെയും മാതാവിനെയും ഗാന്ധിഭവനിലേക്ക് മാറ്റിയിരുന്നെങ്കിലും കുറച്ചു ദിവസം കഴിഞ്ഞപ്പോള്‍ തന്നെ അവര്‍ ഈ വീട്ടിലേക്ക് തന്നെ തിരികെ വരികയായിരുന്നു. ഇതിനായി യുവതി ആത്മഹത്യാഭീഷണി മുഴക്കിയതായിട്ടാണ് വിവരം. പിന്നീട് നാട്ടുകാര്‍ വൃത്തിഹീനമായ ഈ വീട്ടില്‍ നിന്നും മാറ്റാന്‍ വാടകവീടുകള്‍ എടുത്തു നല്‍കിയെങ്കിലും അവിടെ നിന്നും അവര്‍ ഈ വീട്ടിലേക്ക് തന്നെ തിരിച്ചെത്തുകയായിരുന്നെന്ന് നാട്ടുകാര്‍ പറയുന്നു.
Comments