ന്യുഡല്ഹി: മലയാളി ജീവനക്കാരനെ മര്ദ്ദിച്ച പാര്ട്ടി എം.പിക്ക് യാത്രാ വിലക്ക് ഏര്പ്പെടുത്തിയ എയര് ഇന്ത്യയുടെ നടപടിക്കെതിരെ ശിവസേന. എം.പി രവീന്ദ്ര ഗെയ്ക്ക്വാദിന്റെ യാത്രാവിലക്ക് നീക്കാന് ലോക്സഭാ സ്പീക്കര് സുമിത്രാ മഹാജന് ഇടപെടണമെന്ന് ശിവസേന ആവശ്യപ്പെട്ടു. എയര് ഇന്ത്യയോട് യാത്രാ വിലക്ക് നീക്കാന് നിര്ദ്ദേശിക്കണമെന്നാണ് ആവശ്യം.
ഇക്കാര്യം ആവശ്യപ്പെട്ട് ഏതാനും ദിവസങ്ങള്ക്കുള്ളില് ഗെയ്ക്ക്വാദ് ലോക്സഭാ സ്പീക്കറെ കാണുമെന്നും ശിവസേന നേതൃത്വം വ്യക്തമാക്കി. ഗെയ്ക്ക്വാദിന്റെ യാത്രാ വിലക്ക് നീക്കാന് ബന്ധപ്പെട്ട അധികൃതര്ക്ക് നിര്ദ്ദേശം നല്കണമെന്ന് സുമിത്രാ മഹാജനോട് ആവശ്യപ്പെട്ടതായി ശിവസേനയുടെ മറ്റൊരു എം.പിയായ രാഹുല് ഷെവാലെ പറഞ്ഞു. അടുത്ത ലോക്സഭാ സമ്മേളനം തുടങ്ങുന്നതിന് മുമ്പ് യാത്രാ വിലക്ക് നീക്കുമെന്നാണ് പ്രതീക്ഷയെന്നും രാഹുല് കൂട്ടിച്ചേര്ത്തു.
രവീന്ദ്ര ഗെയ്ക്ക്വാദ് ഒരു എം.പിയാണ്. അദ്ദേഹത്തിന് യാത്രാ വിലക്ക് ഏര്പ്പെടുത്തുന്നതിലൂടെ പാര്ലമെന്ററി പ്രവര്ത്തനമാണ് തടസപ്പെടുത്തുന്നതെന്ന് ശിവസേന എം.പി വിനായക് റാവത്ത്് പറഞ്ഞു. എയര്ലൈന് കമ്പനികളുടേത് ഗുണ്ടായിസമാണെന്ന് ശിവസേനയുടെ രാജ്യസഭാംഗം സഞ്ജയ് റാവത്തും പറഞ്ഞു.
