മുംബൈ: ഇന്ത്യന് പതാക ഉയര്ത്തുന്നതും ദേശീയഗാനം കേള്ക്കുന്നതുമായ രംഗങ്ങള് വെട്ടിമാറ്റണമെന്ന നിര്ദേശത്തെ തുടര്ന്ന് ദംഗല് പാകിസ്താനില് റിലീസ് ചെയ്യുന്നതിന് എതിരേ ബോളിവുഡ് സൂപ്പര്താരം ആമിര്ഖാന്. ബോക്സോഫീസ് റെക്കോഡ് തകര്ത്ത ചിത്രം അടുത്തിടെയാണ് പാകിസ്താനില് റിലീസ് ചെയ്യാന് പാക് സെന്സര് ബോര്ഡ് അനുമതി നല്കിയത്. സിനിമ പാകിസ്താനിലേക്ക് അയയ്ക്കേണ്ടതില്ലെന്ന് നിര്മ്മാതാക്കളില് ഒരാളും പ്രധാന താരവുമായ ആമിര്ഖാന് തീരുമാനം എടുക്കുകയായിരുന്നു.
അതിര്ത്തി പ്രശ്നങ്ങളെ തുടര്ന്ന് ഇരുരാജ്യങ്ങളും ഉരസി നില്ക്കേ ബോളിവുഡ് സിനിമകള്ക്ക് നിരോധനം ഏര്പ്പെടുത്തിയിരുന്ന പാകിസ്താന് അടുത്തിടെയാണ് സിനിമകള്ക്ക് വീണ്ടും അനുമതി നല്കിയത്. ഇതേ തുടര്ന്നാണ് ദംഗല് കാണാന് പാകിസ്താനിലെ ബോളിവുഡ് ആരാധകര്ക്ക് അവസരം ഒരുങ്ങിയതും. എന്നാല് കഴിഞ്ഞയാഴ്ച സിനിമയില് ഇന്ത്യന് പതാക ഉയര്ത്തുന്നതിന്റെയും ദേശീയഗാനം മുഴങ്ങുന്നതിന്റെ ദൃശ്യങ്ങള് മുറിച്ചുമാറ്റണമെന്ന പാക് സെന്സര്ബോര്ഡിന്റെ നിര്ദേശത്തിനെതിരേ ആമിര് തന്നെ രംഗത്ത് വരികയായിരുന്നു. ബോളിവുഡ് സിനിമകള്ക്ക് അനേകം ആരാധകര് ഉള്ള പാകിസ്താനില് സിനിമ വിതരണം ചെയ്യാനായി അനേകം കമ്പനികളാണ് രംഗത്ത് വന്നിരുന്നത്.
ഹരിയാനയിലെ ഒരു ഗുസ്തിക്കാരനായ മഹാവീര് ഫഗോട്ടും അദ്ദേഹത്തിന്റെ ഗുസ്തിതാരങ്ങളായ ഗീത, ബബിതാ എന്നിവരുടെയും കഥ പറയുന്ന സിനിമയില് പാക് ബോര്ഡ് പറഞ്ഞ രണ്ടു രംഗങ്ങളും അവസാന രംഗങ്ങളിലാണ്. ഈ രംഗങ്ങള് സിനിമയിലെ ഏറ്റവും പ്രധാനപ്പെട്ട ഒന്നാണെന്നും മറ്റൊരു രാജ്യത്തെയോ വ്യക്തികളെയോ മോശപ്പെടുത്തുന്ന ഒന്നുമില്ലെന്നും പാക് സെന്സര്ബോര്ഡിന്റെ നിബന്ധന അകാരണമാണെന്നും ആമിറിന്റെ വക്താവ് പറഞ്ഞു.
സ്പോര്ട്സ് സിനിമകള് ജേതാവിനെയും അയാളുടെ രാജ്യത്തെയും വാഴ്ത്തുന്നവയാണെന്നും ആമിറിന്റെ വക്താവ് പറഞ്ഞു. ഇന്ത്യന് കളക്ഷന് റെക്കോഡ് ഭേദിച്ച സിനിമ ആമിറിന്റെ അഭിനയ മികവിനും സാക്ഷ്യം വഹിച്ച ചിത്രമായിരുന്നു. ബോക്സോഫീസില് ഇതുവരെ സിനിമ 385 കോടി രൂപയാണ് നേടിയത്. പാകിസ്താനില് സിനിമ റിലീസ് ചെയ്തിരുന്നെങ്കില് 10-12 കോടി രൂപ കൂടി നേടാന് കഴിയുമായിരുന്നു. എന്നിരുന്നാലും ഇത് നഷ്ടമായി കണക്കാക്കാതെയാണ് രാജ്യതാല്പ്പര്യം ആമിര്ഖാന് മുന് നിര്ത്തിയിരിക്കുന്നത്.
