ന്യൂഡല്ഹി: മഹാരാഷ്ട്ര സര്ക്കാരിന്റെ 'മീശനയ' ത്തില് തട്ടി ഒരു മുസ്ളീം പോലീസ് കോണ്സ്റ്റബിര് സസ്പെന്ഷനില് വീട്ടില് ഇരിക്കാന് തുടങ്ങിയിട്ട് അഞ്ചു വര്ഷം. മഹാരാഷ്ട്ര സ്റ്റേറ്റ് റിസര്വ് പോലീസിലെ സഹീറുദ്ദീന് ഷംസുദ്ദീന് ബദാദേയ്ക്കാണ് ഈ വിധി. പോലീസുകാര് 'താടിമീശ' വെയ്ക്കേണ്ടതില്ലെന്ന് നയത്തില് മഹാരാഷ്ട്ര ഷംസുദ്ദീനെ താടി വെയ്ക്കാന് അനുവദിക്കാത്തതും മതാചാരങ്ങളുടെ കാലത്ത് ഒഴികെ താടി വടിക്കാമെങ്കില് ജോലി അനുവദിക്കാമെന്ന സുപ്രീംകോടതി നിര്ദേശം ഷംസുദ്ദീന് തള്ളുക കൂടി ചെയ്തപ്പോള് അഞ്ചു വര്ഷം തീര്ന്നു.
2008 ജനുവരി 16 നായിരുന്നു ഷംസുദ്ദീന് മഹാരാഷ്ട്ര പോലീസില് ചേര്ന്നത്. 2012 ഫെബ്രുവരിയില് ജല്നയില് നിയോഗിച്ചത് മുതലാണ് കാര്യങ്ങള് കുഴഞ്ഞത്. താടി വെച്ച് ജോലി ചെയ്യാന് ഇദ്ദേഹം കമാന്റന്റിന് അപേക്ഷ സമര്പ്പിച്ചു. 2012 മെയ് യില് അനുവാദം കിട്ടുകയും ചെയ്തു. എന്നാല് അഞ്ചു മാസം കഴിഞ്ഞപ്പോള് ഈ അനുമതി മഹാരാഷ്ട്രാ ആഭ്യന്തര വകുപ്പിന്റെ നിര്ദേശപ്രകാരം പിന്വലിക്കപ്പെടുകയും മീശവടിക്കാന് ഷംസുദ്ദീനെ നിര്ബ്ബന്ധിക്കുകയും ചെയ്തു.
ഇതിനെ വെല്ലുവിളിച്ച് ബോംബെ ഹൈക്കോടതിക്ക് മുന്നിലാണ് ഷംസുദ്ദീന് എത്തിയത്. എന്നാല് മതാചാരമുള്ള താല്ക്കാലിക കാലത്ത് മാത്രം താടി വെയ്ക്കാന് അനുവദിച്ചാല് മതിയെന്നായിരുന്നു ഇക്കാര്യത്തില് ബോംബെ ഹൈക്കോടതിയിലെ ഔറംഗാബാദ് ബഞ്ചിന് മുന്നില് സംസ്ഥാനത്തിന്റെ നിലപാട്. ഇത് സ്വീകരിച്ച ഹൈക്കോടതി ബദാദേയുടെ ഹര്ജി 2012 ഡിസംബറില് തള്ളുകയും ചെയ്തു. തുടര്ന്ന് ബദാദേ 2013 ല് ഹൈക്കോടതി വിധി വെല്ലുവിളിച്ച് സുപ്രീംകോടതിയില് എത്തി.
കേസ് നേരത്തേ പരിഗണിക്കാന് കഴിയുമോയെന്ന് ചോദിച്ച് വ്യാഴാഴ്ച ബദാദേയുടെ അഭിഭാഷകന് സുപ്രീംകോടതിയില് എത്തിയപ്പോള് ജസ്റ്റീസുമാരായ ജെഎസ് ഖേഹര്, ഡി വൈ ചന്ദ്രചുഡ്, സഞ്ജയ് കിഷന് കൗള് എന്നിവര് ഉള്പ്പെട്ട ബഞ്ച് ഇക്കാര്യം മറ്റുള്ളവരുമായി ചര്ച്ച ചെയ്ത ശേഷം മതപരമായ കാലത്ത് ഒഴികെയുള്ള സമയത്ത് താടി വടിക്കാമെന്നുണ്ടെങ്കില് ജോലിയില് തിരികെ പ്രവേശിക്കാന് അനുവാദം നല്കാമെന്ന് പറഞ്ഞെങ്കിലും താടി ഷേവ് ചെയ്യാന് കഴിയില്ലെന്നാണ് ബദാദേയുടെ നിലപാടെന്നായിരുന്നു അഭിഭാഷകന് പറഞ്ഞതോടെ തങ്ങള്ക്ക് സഹായിക്കാന് കഴിയില്ലെന്നും കേസ് നേരത്തേ പരിഗണിക്കാനാകില്ലെന്നും മറുപടി നല്കുകയായിരുന്നു.
ഇന്ത്യ ഒരു മതനിരപേക്ഷ രാജ്യമാണെന്നും മതേതരരാജ്യമെന്ന നിലയില് ഒരു മതാനുശാസിയായ ആചാരം പിന്തുടരുന്നതിനെ തടയുന്നത് സ്വാതന്ത്ര്യത്തിന് മേലുള്ള കടന്നുകയറ്റമായി പരിഗണിക്കണമെന്നാണ് ബദാദേ ഹര്ജിയില് ആവശ്യപ്പെട്ടിരുന്നത്. വിവിധ മതങ്ങളില് പെട്ടവര്ക്ക് തുല്യ നീതി നല്കണമെന്നും ആവശ്യപ്പെട്ടു. ഇന്ത്യന് ഭരണഘടനയുടെ 25 ാം അനുചേ്ഛദം ഏതു മതവും വിശ്വസിക്കാനും പിന്തുടരാനും സ്വാതന്ത്ര്യം അനുശാസിക്കുന്നുണ്ടെന്നും പറഞ്ഞു.
