മലപ്പുറം : ലോകത്തിന്റെ വിവിധ ഭാഗങ്ങളിലേക്ക് വേണ്ട ഖുറാനുകള് അച്ചടിക്കുന്ന തിരൂരങ്ങാടിയില് വിളങ്ങുന്നത് മതസൗഹാര്ദ്ദത്തിന്റെ പൊന്നക്ഷരങ്ങള്. തിരൂരങ്ങാടിയില് വര്ഷം നാലുലക്ഷത്തോളം ഖുറാനാണ് തയാറാക്കുന്നത്. ഇതു തയാറാക്കുന്നവരില് പകുതിയോളംപേര് ഇതര മതസ്ഥര്. ചന്തപ്പടിയില് പ്രവര്ത്തിക്കുന്ന നാലു പ്രസുകളിലായാണു ഖുറാനുകള് അച്ചടിച്ച് വിദേശരാജ്യങ്ങളിലേക്കടക്കം കയറ്റിയയ്ക്കുന്നത്. ഇവിടെ ജോലിചെയ്യുന്ന നൂറിലധികം ജീവനക്കാരിലെ പകുതിയോളം പേര് ഹിന്ദു, ക്രിസ്ത്യന് വിശ്വാസികളായ സ്ത്രീകളും പുരുഷന്മാരുമാണ്.
ഇതര മതസ്ഥര് ഖുറാന് കൈകാര്യം ചെയ്യുന്നത് സംബന്ധിച്ച് വിവിധ മുസ്ലിം സംഘടനകള്ക്ക് വ്യത്യസ്ത അഭിപ്രായമാണുള്ളത്. ചില സംഘടനകള് മറ്റുള്ളവര് ഖുറാന് ഉപയോഗിക്കുന്നതിനെയും തൊടുന്നതിനെയും പോലും എതിര്ക്കുമ്പോള് മറ്റൊരു വിഭാഗത്തിന് അതില് ഒരെതിര്പ്പുമില്ല. എന്നാല്, തങ്ങളുടെ ജോലിയുടെ ഭാഗമായാണു ഖുറാന് സ്പര്ശിക്കുന്നതെന്നും ഖുറാന് പ്രസില് ജോലിചെയ്യുന്ന കെ.എം സജീഷ്, കെ.സി. സൂസന്, പി. ശോഭന, പി.പി. ബീന എന്നിവര് 'മംഗള'ത്തോട് പറഞ്ഞു. അഷ്റഫി പ്രിന്റേഴ്സ്, സി.എച്ച്. മുഹമ്മദ് ആന്ഡ് സണ്സ്, കോഹിനൂര് പ്രിന്റേഴ്സ്, വെന്നിയൂര് പ്രിന്റേഴ്സ് എന്നീ പ്രസുകളിലാണു ഖുറാന് അച്ചടി നടക്കുന്നത്.
ഇതില് അഷ്റഫി പ്രിന്റേഴ്സില് ജോലിചെയ്യുന്ന 40തൊഴിലാളികളില് 18പേരും ഇതര മതസ്ഥരാണ്. ഇത്തരത്തില്തന്നെയാണു മറ്റു പ്രസുകളിലും. മലബാറി, ഉസ്മാനി, ഹിന്ദുസ്ഥാനി എന്നീ മൂന്നു ലിപികളിലുള്ള ഖുറാനുകളാണു ഇവിടങ്ങളില് അച്ചടിക്കുന്നത്. കേരളത്തിനു പുറമെ വിവിധ സംസ്ഥാനങ്ങളിലേക്കും വിദേശരാജ്യങ്ങളിലേക്കും ഖുറാനുകള് കൊണ്ടുപോകുന്നത് ഇവിടെ നിന്നാണ്. ഇവിടെ അച്ചടിക്കുന്ന ഖുറാനുകളുടെ പകുതിയോളം വില്പന നടക്കുന്നത് റമദാന് മാസത്തിലാണ്. അതോടൊപ്പംതന്നെ മദ്രാസാപഠനങ്ങള്ക്കുള്ള ഖുറാനുകളും ഈ പ്രസുകളിലാണ് അച്ചടിക്കുന്നത്. ദുബായ്, ഒമാന്, ഖത്തര്, ബഹ്െറെന്, ശ്രീലങ്ക, ലക്ഷദ്വീപ്, അന്ഡമാന് എന്നിവിടങ്ങളിലേക്ക് ഇവിടെ നിന്നും ഖുറാനുകള് കയറ്റിയയ്ക്കുന്നുണ്ട്. അതോടൊപ്പം അസം, ഒഡീഷ, ബിഹാര്, പശ്ചിമ ബംഗാള്, ഗുജറാത്ത് സംസ്ഥാനങ്ങളിലേക്കും കൊണ്ടുപോകുന്നുണ്ട്.
ഖുറാന് വില്പനയില് ലാഭം ഈടാക്കുന്നില്ലെന്നും ചെലവ് തുക മാത്രംവാങ്ങിയാണു വില്പനയെന്നും അച്ചടി നടത്തുന്ന അഷ്റഫി ബുക്ക് സ്റ്റാളിലെ കൂര്മ്മത്ത് നൗഷാദ് മംഗളത്തോട് പറഞ്ഞു. ഖുറാന് അച്ചടിയില് ഏറെ പെരുമയുള്ള നാടാണ് തിരൂരങ്ങാടി. തിരുരങ്ങാടിയില് ഖുറാന് അച്ചടി തുടങ്ങിയതു ഒരുനൂറ്റാണ്ടുമുമ്പാണ്.1883ല് ചാലിലകത്ത് അഹമ്മദ് സാഹിബ് സ്ഥാപിച്ച ആമിറുല് ഇസ്ലാം ഫീമ്ദിനുല് ഉലൂം എന്ന അച്ചടിശാലയാണ് ഈ പെരുമയുണ്ടാക്കിയത്.
കേരളത്തിലെ ദര്സുകളിലെ പഠനത്തിനായുള്ള ഗ്രന്ഥങ്ങള്, മാസികകള്, ഇസ്ലാമിക കര്മശാസ്ത്രഗ്രന്ഥങ്ങള്, ഹദീസ് ഗ്രന്ഥങ്ങള്, മാലമൗലീദുകള്, ഏടുകള്, ഖിസ്സപ്പാട്ടുകള് തുടങ്ങി ഇസ്ലാംമത വിശ്വാസികള് ഉപയോഗിക്കുന്ന ഗ്രന്ഥങ്ങള് അച്ചടിക്കുന്നത് തിരൂരങ്ങാടിയില്നിന്നാണ്.
