തിരുവനന്തപുരം: കേന്ദ്രസര്ക്കാരിന്റെ കന്നുകാലി കശാപ്പ് നിയന്ത്രണ വിജ്ഞാപനത്തില് പ്രതിഷേധിച്ച് കൂടിയ പ്രത്യേക നിയമസഭാ സമ്മേളനത്തോട് അനുബന്ധിച്ച് എം.എല്.എമാര് നടത്തിയ പ്രതിഷേധം കൗതുകമായി. ഇന്നലെ നിയമസഭാ കാന്റീനില് പ്രഭാത ഭക്ഷണം കഴിക്കാനെത്തിയ എം.എല്.എമാരുടെ സ്പെഷല് വിഭവം ബീഫ് റോസ്റ്റ് ആയിരുന്നു.
രാവിലെ ഒമ്പതിനായിരുന്നു കന്നുകാലി കശാപ്പ് നിയന്ത്രണ വിജ്ഞാപനത്തിനെതിരേ നിയമസഭയുടെ പ്രത്യേക സമ്മേളനം ആരംഭിച്ചത്. എന്നാല് ഒരു മണിക്കൂര് മുമ്പേ നിയമസഭാ കാന്റീനിലെത്തിയ എം.എല്.എമാര് ബീഫ് റോസ്റ്റ് ഉള്പ്പെടെയുള്ള വിഭവങ്ങളാണ് പ്രഭാതഭക്ഷണത്തിന് ഓര്ഡര് ചെയ്തത്. ബീഫിന് ഐക്യദാര്ഢ്യം പ്രഖ്യാപിച്ച് ഇന്നത്തെ ഭക്ഷണം ഇങ്ങനെയാക്കിയെന്നായിരുന്നു എം.എല്.എമാരുടെ മറുപടി.
സാധാരണ നിലയില് രാവിലെ 11നു ശേഷമാണ് നിയമസഭാ കാന്റീനില് ബീഫ് വിഭവങ്ങള് വിളമ്പുക. പക്ഷെ ഇന്നലെ രാവിലെ തന്നെ ബീഫ് റോസ്റ്റ് റെഡിയായിരുന്നു. മാത്രമല്ല, ബീഫ് റോസ്റ്റ് ഉണ്ടെന്ന അറിയിപ്പ് ബോര്ഡും രാവിലെ തന്നെ കാന്റീനില് ഇടംപിടിച്ചു.
ബീഫ് വിഷയത്തില് സഭയ്ക്കുള്ളില് ചര്ച്ച നടക്കുന്നതിനാല് പത്തുകിലോ ബീഫ് വാങ്ങി രാവിലെ തന്നെ വിഭവങ്ങള് തയാറാക്കുകയായിരുന്നുവെന്ന് ജീവനക്കാര് പറഞ്ഞു. ദേവികുളം എം.എല്.എ എസ് രാജേന്ദ്രനായിരുന്നു ആദ്യം കാന്റീനിലെത്തി ബീഫ് ഓര്ഡര് ചെയ്തത്.
തൊട്ടുപിന്നാലെയെത്തി ബീഫ് കഴിച്ചു മടങ്ങിയ പ്രതിഭാ ഹരിയും സി.കെ. ആശയും കാന്റീനിലെ സ്പെഷ്യല് വിഭവത്തെക്കുറിച്ച് പുറത്തറിയിച്ചതോടെ മറ്റുള്ള എം.എല്.എമാരും ബീഫ് ഫെസ്റ്റിനായി കാന്റീനിലെത്തി. നോമ്പ് തുറന്ന ശേഷമായിരുന്നെങ്കില് ബീഫ് കഴിച്ചുള്ള പ്രതിഷേധത്തില് ഞങ്ങളും കൂടിയേനെയെന്നായിരുന്നു മുസ്ലീംലീഗ് എം.എല്.എമാരുടെ പ്രതികരണം.
