ന്യൂഡല്ഹി: ഇന്ത്യന് ക്രിക്കറ്റിലെ പടല പിണക്കത്തില് ആറു മാസമായി ഇന്ത്യന് നായകന് വിരാട് കോഹ്ലിയും പരിശീലകന് അനില് കുംബ്ളേയും തമ്മില് മിണ്ടുക പോലുമില്ലായിരുന്നെന്ന് റിപ്പോര്ട്ട്. അതുകൊണ്ടു തന്നെ കുംബ്ളേയുടെ കാലാവധി നീട്ടുന്ന കാര്യത്തില് സച്ചിന്, ഗാംഗുലി, ലക്ഷ്മണ് ഉള്പ്പെട്ട ക്രിക്കറ്റ് ഉപദേശക സമിതി നേരിട്ട് പച്ചക്കൊടി കാണിച്ചിരുന്നുമില്ലെന്നും റിപ്പോര്ട്ടുകളില് പറയുന്നുണ്ട്.
കുംബ്ളേയുടെ കാലാവധി നീട്ടിക്കൊടുക്കാന് ക്രിക്കറ്റ് ഉപദേശക സമിതി നിര്ദേശിച്ചിരുന്നതായി നേരത്തേ റിപ്പോര്ട്ടുകള് പുറത്തു വന്നിരുന്നെങ്കിലും അത് നായകനും പരിശീലകനും തമ്മിലുള്ള ബന്ധത്തെ ആശ്രയിച്ചായിരിക്കണം എന്നായിരുന്നു ഉപദേശക സമിതിയുടെ നിലപാട്. നായകനും കോച്ചും തമ്മില് നില നില്ക്കുന്ന പ്രശ്നങ്ങള് മുഴുവനും പരിഹരിച്ചാല് മാത്രമേ കരാര് നീട്ടേണ്ടതുള്ളൂ എന്നായിരുന്നു ഉപദേശക സമിതിയുടെ നിലപാടെന്നാണ് ഇംഗ്ളണ്ടില് ടീമിനൊപ്പം ഉണ്ടായിരുന്ന ബിസിസിഐ ഉന്നതന് പറയുന്നത്.
ചാമ്പ്യന്സ്ട്രോഫി ടൂര്ണമെന്റിന് പിന്നാലെ പ്രശ്നം പരിഹരിക്കാന് വേവ്വേറെ മൂന്ന് മീറ്റിംഗാണ് ഇന്ത്യന് ടീം താമസിച്ചിരുന്ന ഹോട്ടലില് നടന്നത്. ഇതില് ആദ്യത്തേത് കുംബ്ളേയും ബിസിസിഐ ഉന്നതരുമായി സംസാരിച്ചതാണ്. പിന്നാലെ സിഎസി കോഹ്ലിയുമായും കൂടിക്കാഴ്ച നടത്തി. കോഹ്ലിയെയും കുംബ്ളേയെയും ഇരുത്തി ബിസിസിസിഐയും സിഎസിയും തമ്മില് നടത്തിയതായിരുന്നു അവസാനത്തേത്. എന്നാല് ആറുമാസമായി നായകനും പരിശീലകനും തമ്മില് ഒരു ബന്ധവും ഇല്ലാതിരിക്കെ ഒരു തരത്തിലുമുള്ള ചര്ച്ചകള് ഗുണം ചെയ്തില്ലെന്ന് മാത്രം.
ഡിസംബറില് ഇംഗ്ളണ്ട് ടെസ്റ്റ് കഴിഞ്ഞത് മുതല് ഇരുവരും തമ്മില് സംസാരിച്ചിട്ടില്ല. ഇരുവരും തമ്മില് പരസ്പര ബന്ധമില്ല എന്നറിയാമായിരുന്നെങ്കിലും ആറു മാസമായി അകല്ച്ചയിലായിരുന്നു എന്ന വിവരം ബിസിസസിഐ യേയും ക്രിക്കറ്റ് ഉപദേശക സമിതിയെയും ഒരുപോലെയാണ് ഞെട്ടിച്ചത്. ഞായറാഴ്ച പാകിസ്താനോട് ഫൈനല് തോറ്റ ശേഷം എല്ലാവരും ഉള്പ്പെട്ട യോഗത്തില് ഒരുമിച്ചു നീങ്ങാന് കഴിയില്ലെന്ന് ഇരുവരും വ്യക്തമാക്കുകയും ചെയ്തു.
വിരാട് കോഹ്ലിയുമായി എന്താണ് പ്രശ്നമെന്ന് ചോദിച്ചപ്പോള് ഒരു പ്രശ്നവുമില്ല എന്നായിരുന്നു മറുപടി. എന്നാല് ചില കാര്യങ്ങള് വിരാട് കോഹ്ലി സ്വന്തം ഇഷ്ടം അനുസരിച്ച് തയ്യാറാക്കിയിരിക്കുകയാണെന്നും പറഞ്ഞു. ബാര്ബഡോസിലേക്ക് അനില് കുംബ്ളേയുടെ ടിക്കറ്റ് ബുക്ക് ചെയ്തിട്ടുണ്ടെന്നും ചിലപ്പോള് ഭാര്യയും അദ്ദേഹത്തിനൊപ്പം ഉണ്ടായിരിക്കുമെന്നുമായിരുന്നു ബിസിസിഐ പറഞ്ഞത്. പക്ഷേ ലണ്ടനില് നിന്നും ടീം വെസ്റ്റിന്ഡീസിലേക്ക് പോയപ്പോള് കുംബ്ളേ ഇല്ലായിരുന്നു എന്ന് മാത്രം. തൊട്ടു പിന്നാലെ താരം പരിശീലക സ്ഥാനം രാജി വെയ്ക്കുകയൂം ചെയ്തു.
