ഇന്ത്യന്‍ ഭൂപടത്തെ അടിവസ്ത്രമാക്കിയും കശ്മീരില്ലാത്ത ഭൂപടം ട്വീറ്റ് ചെയ്തും ഓസീസ് മാധ്യമപ്രവര്‍ത്തകന്‍

മുംബൈ: ലോക ഇലവന്‍ പാക് പര്യടനം നടത്തിയതു മുതലാണ് ഓസീസ് മാധ്യമപ്രവര്‍ത്തകന്‍ ഡെന്നീസും ഇന്ത്യന്‍ ആരാധകരും തമ്മിലുള്ള അടി ആരംഭിക്കുന്നത്. ഇന്ത്യയെ അപമാനിച്ച് ഡെന്നീസ് വീണ്ടും രംഗത്തെത്തിയിരിക്കുകയാണ്. ഇത്തവണ ഇന്ത്യന്‍ ഭൂപടത്തെയാണ് ഡെന്നീസ് അപമാനിച്ചിരിക്കുന്നത്.

ഡെന്നീസ് കാശ്മീരില്ലാത്ത ഇന്ത്യയുടെ ഭൂപടമാണ് ട്വീറ്റ് ചെയ്തത്. അടിവസ്ത്രത്തിന്റെ ആകൃതിയിലുള്ള ഭൂപടമായിരുന്നു അദ്ദേഹം പോസ്റ്റ് ചെയ്തത്. ഭൂപടം ഇന്ത്യയുടെ ത്രിവര്‍ണ്ണത്തിലുള്ളതായിരുന്നു.
മുന്‍പ് ഡെന്നീസിന്റെ ട്വീറ്റുകളെ തമാശയായി മാത്രം കണ്ടിരുന്നവര്‍ പോലും ഇതിനെതിരെ രംഗത്തെത്തിയിട്ടുണ്ട്. നിരവധി പേര്‍ ഇയാള്‍ക്കെതിരെ ട്വീറ്റ് ചെയ്തിട്ടുണ്ട്.

ഇന്ത്യന്‍ താരങ്ങള്‍ ലോക ഇലവനില്‍ ഇല്ലാതിരുന്നതിനെ വിമര്‍ശിച്ചു കൊണ്ടായിരുന്നു ഡെന്നീസ് അടിയ്ക്ക് തുടക്കം കുറിച്ചത്. ഇന്ത്യന്‍ താരങ്ങളെ തൂപ്പുകരായാണ് ഡെന്നീസ് പരിഹസിച്ചത്. ഇതോടെ പിന്നെയത് ആരാധകരും ഡെന്നീസും തമ്മിലുള്ള വാക് പോരായി.