ബ്യൂണസ് ഐറിസ്: ബൊംബോനേറയില് വേണ്ടതെല്ലാം കയ്യിലുണ്ടായിട്ടും പലതവണ കിണഞ്ഞു ശ്രമിച്ചിട്ടും ദൗര്ഭാഗ്യത്തിന്റെ പ്രതിരോധപ്പൂട്ട് പൊളിക്കാനാകാതെ അര്ജന്റീനയ്ക്ക് വീണ്ടും സമനില. ലോകകപ്പ് യോഗ്യതയുടെ ദക്ഷിണ അമേരിക്കന് മത്സരത്തില് പെറു ഗോള് രഹിതമാക്കി അര്ജന്റീനയെ പിടിച്ചു നിര്ത്തി. ബ്യൂണസ് ഐറിസിലെ അലറി വിളിക്കുന്ന സ്വന്തം കാണികള്ക്ക് മുന്നില് കളിച്ചിട്ടും ഒന്നും സംഭവിച്ചില്ല. ലാറ്റിനമേരിക്കന് ഗ്രൂപ്പില് ഗോളില്ലാ കളികളുടെതായിരുന്നു എല്ലാ മത്സരവും. ബ്രസീലും ഉറുഗ്വേയുമെല്ലാം ഗോള്രഹിത സമനിലയില് കുരുങ്ങി.
ഏറെ നിര്ണ്ണായകമായ മത്സരത്തില് ഇരു പകുതികളിലുമായി മെസിയും സംഘവും തകര്ത്ത് കളിച്ച് ഒട്ടേറെ അവസരങ്ങള് ഒരുക്കിയെടുത്തെങ്കിലും പെറുവിയന് ഗോളിയും നിര്ഭാഗ്യവും തടസ്സമായി മാറുകയായിരുന്നു. ഇതോടെ കഴിഞ്ഞ റണ്ണറപ്പുകളായ അര്ജന്റീനയ്ക്ക് യോഗ്യത കിട്ടുമോയെന്ന കാര്യം തന്നെ സംശയമായി. ആദ്യ നാലു ടീമുകള്ക്കാണ് നേരിട്ട് യോഗ്യത എന്നിരിക്കെ ഒരു മത്സരം ബാക്കി നില്ക്കുമ്പോള് ഇനി അവര്ക്ക് മുന്നിലുള്ള സാധ്യത പ്ളേ ഓഫ് ഒപ്പിച്ചെടുക്കുക എന്നതാകും. ഇരുടീമുകളും ഓരോ പോയിന്റ് പങ്കുവെച്ചപ്പോള് നാലാം സ്ഥാനത്തുള്ള പെറുവിനും അഞ്ചാമതുള്ള അര്ജന്റീനയ്ക്കും 25 പോയിന്റ് വീതമായി. 23 പോയിന്റുമായി ആറാമതുള്ള ചിലിയ്ക്ക് അടുത്ത മത്സരം ജയിക്കാനായാല് പെറുവിന് മുകളില് നാലാം സ്ഥാനത്തേക്ക് കയറി വരാനാകും.
അതേസമയം ഇന്ന് നടന്ന ലോകകപ്പ് യോഗ്യതാമത്സരങ്ങള് എല്ലാം തന്നെ ഗോള്രഹിതമായി അവസാനിക്കുകയായിരുന്നു. ഒന്നാമതുള്ള ബ്രസീല് യോഗ്യത ഉറപ്പിച്ചതിനാല് അപ്രധാനമായിരുന്നെങ്കിലും ഒമ്പതാം സ്ഥാനത്തുള്ള ബൊളീവിയയുമായി നടന്ന മത്സരവും തൊട്ടുപിന്നാലെ വെനസ്വേലയും ഉറുഗ്വേയും തമ്മിലുള്ള മത്സരവും ഗോള്രഹിത സമനിലയില് കലാശിക്കുകയായിരുന്നു. ബ്രസീലിന് പിന്നിലായി രണ്ടും മൂന്നും സ്ഥാനങ്ങളില് ഇരിപ്പുറപ്പിച്ച് ഉറുഗ്വേയും കൊളംബിയയുമാണ് ലോകകപ്പ് ഫൈനല് റൗണ്ടിലേക്ക് യോഗ്യത ഉറപ്പാക്കിയിരിക്കുന്നത്.
