മലപ്പുറം: വേങ്ങര ഉപതെരഞ്ഞെടുപ്പിന്റെ പരസ്യപ്രചാരണം ഇന്നു കൊട്ടിക്കലാശിക്കും. 11-നാണു വോട്ടെടുപ്പ്. 15-നു ഫലപ്രഖ്യാപനം. മണ്ഡലത്തില് 1,70,009 വോട്ടര്മാരാണുള്ളത്. ഇതില് 87,750 പുരുഷന്മാരും 82,259 സ്ത്രീകളുമുണ്ട്. മുഴുവന് ബൂത്തുകളിലും വി.വി. പാറ്റ് വോട്ടിങ് യന്ത്രങ്ങളാണ് ഉപയോഗിക്കുന്നത്.
കഴിഞ്ഞ നിയമസഭാ തെരഞ്ഞെടുപ്പില് 38,057 വോട്ട് ഭൂരിപക്ഷത്തിനാണ് മുസ്ലിം ലീഗിലെ പി.കെ. കുഞ്ഞാലിക്കുട്ടി ജയിച്ചത്. ഉപതെരഞ്ഞെടുപ്പിലൂടെ ലോക്സഭാംഗമായ അദ്ദേഹം രാജിവച്ച ഒഴിവിലേക്കാണ് നിയമസഭാ ഉപതെരഞ്ഞെടുപ്പ് നടക്കുന്നത്.
നിയമസഭാ മണ്ഡലത്തിലെ ഓരോ പോളിങ് ബൂത്തിലും 120 മുതല് 130 വരെ പ്രവാസികള്. 1200 മുതല് 1300 വരെ വോട്ടര്മാരുള്ള 148 പോളിങ് ബൂത്തുകളിലെ കണക്കാണിത്. മലപ്പുറം ലോക്സഭാ ഉപതെരഞ്ഞെടുപ്പ് കഴിഞ്ഞ് മാസങ്ങള്ക്കുള്ളില് മറ്റൊരു തെരഞ്ഞെടുപ്പ് വരുമ്പോഴും പ്രവാസി വോട്ടര്മാരുടെ ആവേശം ചോരുന്നില്ല.
തെരഞ്ഞെടുപ്പില് സജീവമാകാന് മുസ്ലിംലീഗിന്റെ പ്രവാസി സംഘടനയായ കെ.എം.സി.സിക്കു കീഴില് ഗള്ഫ് രാജ്യങ്ങളില്നിന്ന് നൂറുകണക്കിനു പ്രവര്ത്തകരാണ് വേങ്ങരയിലെത്തിയത്. ദുബായില്നിന്നുള്ള നൂറോളം കെ.എം.സി.സി ഭാരവാഹികള് വേങ്ങരയില് തെരഞ്ഞെടുപ്പ് പ്രവര്ത്തനങ്ങള്ക്കു നേതൃത്വം നല്കുന്നുണ്ട്. അബൂദാബിയില്നിന്നെത്തിയ 55വോട്ടര്മാരും പ്രചാരണ പരിപാടികളില് സജീവമാണ്. ഇതിനു സമാനമായാണു മറ്റു ഗള്ഫ് രാജ്യങ്ങളില്നിന്നും വോട്ടുചെയ്യാനെത്തിയവരുടെ കണക്ക്.
പ്രവാസിവോട്ടര്മാര് കൂടുതലുള്ള മണ്ഡലത്തിലെ പ്രവാസി കുടുംബങ്ങളെ നേരിട്ടുകണ്ടു വോട്ടഭ്യര്ഥിക്കുകയാണ് കെ.എം.സി.സി. പ്രവര്ത്തകര്. ഓരോ ബൂത്തിലുമുള്ള പ്രവാസി വോട്ടര്മാരെക്കുറിച്ചുള്ള കണക്കെടുപ്പും നടന്നു. ഓരോ ബൂത്തിലും 120 വരെ പ്രവാസികളുണ്ടെന്ന് സ്ക്വാഡ് പ്രവര്ത്തനങ്ങളില് വ്യക്തമായതായി വോട്ട് ചെയ്യാനായി അബുദാബിയില്നിന്നെത്തിയ ചേറൂര് സ്വദേശി എം.കെ. മൂപ്പന് പറഞ്ഞു.
ദുബായില്നിന്നെത്തിയ കെ.എം.സി.സി. ഭാരവാഹി മുസ്തഫയുടെ നേതൃത്വത്തിലും സജീവമായ തെരഞ്ഞെടുപ്പ് പ്രവര്ത്തനമാണു നടക്കുന്നത്. മുഖ്യമന്ത്രി പിണറായി വിജയന്റെ ഇടപെടല് മൂലം ഷാര്ജയിലുള്ള കുറ്റവാളികളെ ഷാര്ജ ഭരണാധികാരി മോചിതരാക്കിയെന്ന എല്.ഡി.എഫിന്റെ പ്രചാരണം തികച്ചും തെറ്റാണെന്നും യാഥാര്ഥ്യം വോട്ടര്മാരെ ബോധ്യപ്പെടുത്തുന്നുണ്ടെന്നും ദുബായ് കെ.എം.സി.സി. പ്രസിഡന്റ് പി.കെ. അന്വര് നഹ പറഞ്ഞു.
കഴിഞ്ഞ റമദാന് മാസത്തിലെ പ്രത്യേക സാഹചര്യം കണക്കിലെടുത്താണ് ഇവരുടെ മോചിതരാക്കിയതായി ഷാര്ജാ ഭരണാധികാരി പ്രഖ്യാപിച്ചതെന്നും ഇതിന്റെ നടപടികള് അന്നുതന്നെ ആരംഭിച്ചിരുന്നുവെന്നും അന്വര് നഹ പറഞ്ഞു. ഏറെ മുമ്പേ പ്രഖ്യാപനം നടത്തി വിദേശികളെ ജയില്മോചിതരാക്കുന്ന സംഭവത്തില് ഭരണാധികാരിയുടെ പ്രസ്താവന വളച്ചൊടിച്ചാണ് എല്.ഡി.എഫ്. പ്രചരണം നടത്തുന്നതെന്നും നഹ പറഞ്ഞു. പ്രവാസികളുടെ തെരഞ്ഞെടുപ്പ് പ്രചാരണാര്ഥം ഗള്ഫ് നാടുകളിലും തെരഞ്ഞെടുപ്പ് യോഗങ്ങള് ചേര്ന്നിരുന്നു.
