ഛണ്ഡിഗഡ്: രാജ്യത്ത് ഇസഡ് കാറ്റഗറി സുരക്ഷ കിട്ടിയിരുന്ന അപൂര്വ്വം ചിലരില് പെടുന്ന വിവാദ നായകന് ദേരാ സച്ചാ സൗദാ തലവന് ഗുര്മീത് രാം റഹീം സിംഗിന്റെ വീടും ബുള്ളറ്റ് പ്രൂഫായിരുന്നതായി റിപ്പോര്ട്ട്. 'തേരാവാസ്' എന്ന് പേരിട്ടിരിക്കുന്ന സിര്സയിലെ മൂന്ന് നില ആഡംബര കെട്ടിടത്തിലെ വാതിലുകളും ജനാലകളും ശൗചാലയം പോലും ബുള്ളറ്റ്പ്രൂഫായിരുന്നു. ഡ്രസ്സിംഗ് റൂമില് 14 അടി ഉയരത്തില് 29 പടുകൂറ്റന് തടിറാക്കുകളിലായിരുന്നു വസ്ത്രങ്ങള് സൂക്ഷിച്ചിരുന്നത്.
മുഴുവന് എയര്കണ്ടീഷന് ചെയ്തിരുന്ന വീട്ടില് പടുകൂറ്റന് സ്ക്രീനിലുള്ള ടെലിവിഷനും വിലകൂടിയ അലങ്കാരപ്പാത്രങ്ങളും ഉണ്ടായിരുന്നു. പഞ്ചാബ്, ഹരിയാന ഹൈക്കോടതിയില് സമര്പ്പിച്ച പട്ടികയിലാണ് ഇക്കാര്യം പറയുന്നത്. ഇവയ്ക്കെല്ലാം പുറമേ ഇറക്കുമതി ചെയ്ത വെള്ളം, മസാജ് ഓയിലുകള്, സുഗന്ധ്യദ്രവ്യങ്ങള്, കോസ്മെറ്റിക് ഉല്പ്പന്നങ്ങള്, നൂറുകണക്കിന് ഷൂസുകള്, തൊപ്പികള്, വന്തോതില് ഡിസൈനര് വസ്ത്രങ്ങള് എന്നിവയും ഉണ്ടായിരുന്നു.
ഭിവാനി സൂപ്രണ്ടിന്റെ നേതൃത്വത്തിലായിരുന്നു വീട്ടില് തെരച്ചില് നടത്തിയത്. ബുള്ളറ്റ് പ്രൂഫ് കാറ്, രണ്ടു ബ്രീഫ് കെയ്സുകളിലായി 56 ഹാര്ഡ് ഡിസ്ക്കുകള്, ആറ് പ്രൊജക്ടറുകള്, പെന്ഡ്രൈവ്, വോക്കിടോക്കി എന്നിവയും കിട്ടി. സാധ്വികളെ ബലാത്സംഗം ചെയ്യപ്പെട്ട കേസില് ജയിലില് കിടക്കുന്ന രാം റഹീമിന് വലിയ ഒരു സ്റ്റുഡിയോയും ഡ്രസ്സിംഗ് റൂമും മ്യൂസിയവും കൂടിക്കാഴ്ചാ മുറിയും ഉണ്ടായിരുന്നു. അതേസമയം മുറിയില് നിന്നും ഏതെങ്കിലും തരത്തിലുള്ള സ്ഫോടക വസ്തുക്കള് കണ്ടെത്തിയിട്ടില്ല.
എന്നിരുന്നാലും കെട്ടിടത്തിന്റെ ആദ്യ നിലയില് രാം റഹീമിന്റെ മുറിയില് നിന്നും വേലക്കാരുടെ മുറിയിലേക്ക് എളുപ്പം പോകാവുന്ന ഒരു ഇടനാഴിയും ഉണ്ടായിരുന്നു. മുറിയിലെ ഒരു ജനാല തടി അലമാരകൊണ്ടു മറച്ചിരുന്നു. സാധ്വിയുടെ ഹോസ്റ്റലുമായി രാംറഹീമിന്റെ മുറിയെ ഒരു ഭിത്തി കൊണ്ടു വേര് തിരിച്ചിരുന്നു. ഒന്നാം നിലയില് ഒരു പുന്തോട്ടവും ഒരു തുരങ്കവും ഉണ്ടായിരുന്നതായി തെരച്ചിലില് പങ്കെടുത്ത ഒരു അംഗം വ്യക്തമാക്കി.
