തൃശൂര്: കസ്റ്റസ് പിടിച്ചെടുക്കുന്ന കള്ളക്കടത്ത് സ്വര്ണം പാതിവിലയ്ക്കു വാങ്ങിത്തരാമെന്നു പറഞ്ഞ് ജുവലറി ഉടമകളെയടക്കം പറ്റിച്ചെന്ന പരാതിയില് പിടിയിലായ സിനി ലാലു എന്ന പൂമ്പാറ്റ സിനിക്കെതിരേ കൊച്ചിയിലും പരാതി. സിനിയെ കൊച്ചി പോലീസും ചോദ്യംചെയ്യും.
സിനി ഒന്നരക്കോടി രൂപ തട്ടിയെടുത്തെന്നാണു പരാതികളെങ്കിലും മൊത്തം തട്ടിപ്പ് നാലു കോടിയെങ്കിലും വരുമെന്നു പോലീസ് കരുതുന്നു. വിവിധ സ്ഥലങ്ങളില് നിന്നുള്ള പരാതികള് ശേഖരിച്ചശേഷം പുതിയ കേസുകള് രജിസ്റ്റര് ചെയ്യും. രണ്ടുലക്ഷം രൂപയ്ക്ക് ഒരു കിലോ സ്വര്ണം എന്നായിരുന്നു ഇവരുടെ വാഗ്ദാനം. എറണാകുളം കുമ്പളങ്ങി തണ്ടാശേി വീട്ടില് സിനിയുടെ ഭര്ത്താവായി അഭിനയിച്ച ഗോപകുമാര് വഴിയാണ് തുടക്കത്തില് വ്യാപാരികളെ സമീപിച്ചത്. മുടക്കുന്ന തുക കൂടുന്നതനുസരിച്ച് ലാഭം കൂടുമെന്നായിരുന്നു വാഗ്ദാനം.
സ്വര്ണക്കച്ചവടത്തില് പങ്കാളിയാക്കാമെന്നു പറഞ്ഞ് പാലപ്പിള്ളി സ്വദേശികളായ രണ്ടു പേരില്നിന്ന് സിനി ഒന്നരക്കോടിയോളം രൂപയാണു തട്ടിയത്. പൂന്തല സെയ്തലവയില്നിന്നു പലപ്പോഴായി 43 ലക്ഷം വാങ്ങിയെടുത്തു.
വിശ്വാസം പിടിച്ചുപറ്റാനായി ''രാഷ്ട്രീയ നേതാക്കളെ''ക്കൊണ്ടും ഇടപാടുകാരെ വിളിപ്പിച്ചിരുന്നു. സിനിക്കു െധെര്യമായി പണം നല്കാമെന്നും തങ്ങള് ഗ്യാരന്റിയാണെന്നും രാഷ്ട്രീയക്കാരുടെ ശബ്ദം അനുകരിച്ച മിമിക്രിക്കാര് ഉറപ്പുനല്കി. കൂടുതല് വിശ്വാസ്യതയ്ക്കായി ഫോണ്നമ്പറും നല്കി. സിനിക്കെതിരേ പതിനെട്ടോളം കേസുകളുണ്ടെങ്കിലും ഒന്നില്പ്പോലും ശിക്ഷിക്കപ്പെട്ടിട്ടില്ല.
വാഴപ്പിള്ളി സ്വദേശി സെയ്തലവിയുടെ ഉടമസ്ഥതയില് ചൊക്കാന-തൃശൂര് റൂട്ടില് ഓടിയിരുന്ന ''പ്രവാസി'' ബസ് താല്ക്കാലിക കരാറെഴുതി തട്ടിയെടുത്തതായും പരാതിയുണ്ട്. ബസ് പിടിച്ചെടുത്തതു ചോദ്യംചെയ്തപ്പോള് ഗുണ്ടകളാണു മറുപടി നല്കാനെത്തിയത്. പഴയ ബസും 10 ലക്ഷം രൂപയും നല്കിയാല് പുതിയ ബസ് നല്കുമെന്നായിരുന്നു കരാര്. പഴയ ബസ് വില്ക്കുന്നതായി രേഖകള് ഒപ്പിട്ടു വാങ്ങി. ഗോപകുമാറിന്റെ പേരില് വാങ്ങിയെന്ന രേഖയുണ്ടാക്കി ബസ് സിനി തട്ടിയെടുത്തു.
പാലപ്പിള്ളിയില് റബര്വെട്ട് നടത്തിയിരുന്നയാളില്നിന്ന് 25 ലക്ഷം തട്ടിയെടുത്തു. കോടികള് വിലമതിക്കുന്നതാണെന്നു പറഞ്ഞ് സ്വര്ണം പൂശിയ വിഗ്രഹം നല്കി തലോറില് രണ്ടുപേരില് നിന്ന് 60 ലക്ഷം രൂപ തട്ടിയെടുത്തതായും പരാതിയുണ്ടായിരുന്നു. െഹെറോഡിലെ സ്വര്ണക്കടയില് നിന്ന് 22 ലക്ഷം രൂപയാണ് അവസാനമായി തട്ടിയത്.
ട്രെയിന് യാത്രയ്ക്കിടെ പരിചയപ്പെട്ട സ്ത്രീയുടെ വിശദാംശങ്ങള് തേടിയശേഷം പിന്നീടു ഭീഷണിപ്പെടുത്തി 10 പവന്റെ മാല തട്ടിയെടുത്ത് 2012-ലായയിരുന്നു സിനിയുടെ അരങ്ങേറ്റം. സ്വകാര്യദൃശ്യങ്ങള് പകര്ത്തിയ ശേഷം ഭീഷണിപ്പെടുത്തിയതിനെത്തുടര്ന്ന് ഇര ജീവനൊടുക്കിയ സംഭവവുമുണ്ടായി.
