ഏറെ വിവാദങ്ങള് താണ്ടിയ സഞ്ജയ് ലീലാ ബന്സാലി ചിത്രം പദ്മാവതില് സെന്സറിങിന് ശേഷം ഉണ്ടായിരിക്കുന്നത് ശ്രദ്ധേയങ്ങളായ മാറ്റങ്ങള്. പദ്മാവതി എന്ന പേരില് നിന്നും പദ്മാവത് എന്ന പേരിലേയ്ക്ക് സിനിമയെ മാറ്റിയതിന് പുറമേ ദീപികയുടെ വസ്ത്രങ്ങള്ക്ക് കംപ്യൂട്ടര് സംവിധാനങ്ങള് ഉപയോഗിച്ച് മാറ്റം വരുത്തിയാണ് വീഡിയോ പുറത്തെത്തിച്ചിരിക്കുന്നത്.
വയറിന് ഭാഗത്തെ ശരീരം പൂര്ണമായും മറച്ചുകൊണ്ടുള്ളതാണ് പുതിയ വീഡിയോ. യാതൊരു മുന്നറിയിപ്പും കൂടാതെയാണ് വീഡിയോ യൂട്യൂബിലൂടെ റിലീസ് ചെയ്തത്. ആദ്യ പുറത്തിറങ്ങിയ വീഡിയോയില്നിന്ന് ഏറെ വ്യത്യസ്തമായാണിത്.
വിവാദ ബോളിവുഡ് ചിത്രം പദ്മാവത് 25-ന് രാജ്യവ്യാപകമായി റിലീസ് ചെയ്യാമെന്ന് സുപ്രീംകോടതി ഇന്നലെ ഉത്തരവിറക്കിയിരുന്നു. ക്രമസമാധാന പ്രശ്നമുന്നയിച്ച് രാജസ്ഥാന്, ഗുജറാത്ത് സംസ്ഥാനങ്ങള് റിലീസ് നിരോധിച്ചത് സുപ്രീംകോടതി സ്റ്റേ ചെയ്തിരുന്നു. ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചിന്റേതാണ് നടപടി.
ഇതിനിടെ, പദ്മാവതിന്റെ പ്രദര്ശനം തടഞ്ഞ് ഉത്തരവോ വിജ്ഞാപനമോ ഇറക്കുന്നതില്നിന്ന് മറ്റു സംസ്ഥാനങ്ങളെ സുപ്രീംകോടതി വിലക്കി. ക്രമസമാധാനം ഉറപ്പുവരുത്തേണ്ടത് സംസ്ഥാനങ്ങളുടെ ചുമതലയാണെന്ന് ബെഞ്ച് ചൂണ്ടിക്കാട്ടി. കേസ് തുടര്ന്ന് പരിഗണിക്കുന്നത് മാര്ച്ചിലേക്കു മാറ്റിയിരിക്കുകയാണ്.
