അടിമുടി കട്ടും വെട്ടുമായി പദ്മാവത്! ചിത്രീകരണം ആരംഭിച്ചപ്പോള് മുതല് വിവാദത്തിലായ സഞ്ജയ് ലീലാ ബന്സാലിയുടെ ബോളിവുഡ് ചിത്രം പദ്മാവത് ഒടുവില് തിയറ്ററുകളില് എത്തിയത് വ്യാപകമായ മുറിച്ചു മാറ്റലുകള്ക്കുശേഷം. കഥയുടെ ഒഴുക്കിനെ ഇത് പലയിടത്തും ബാധിക്കുന്നുണ്ടെന്നും ചിത്രം ആദ്യം കണ്ടവര് അഭിപ്രായപ്പെട്ടു. രജപുത്ര രാജ്ഞി റാണി പദ്മിനിയായി വേഷമിടുന്ന ദീപികാ പദുകോണിന്റെ ശരീരഭാഗങ്ങള് ഗ്രാഫിക്സ് ഉപയോഗിച്ച് മറച്ച രീതിയിലാണ് ചിത്രത്തിലുള്പ്പെടുത്തിയിരിക്കുന്നത്.
യുദ്ധ രംഗങ്ങള് ഉദ്ദേശിച്ച നിലവാരം പുലര്ത്തിയില്ലെന്ന ആക്ഷേപവുമുണ്ട്. 16 ാം നൂറ്റാണ്ടിലെ സൂഫി കവി മാലിക് മുഹമ്മദ് ജയാസി രചിച്ച പദ്മാവത് എന്ന കാവ്യത്തെ ആസ്പദമാക്കിയാണ് ആദ്യം പദ്മാവതി എന്നു പേരിട്ട ചിത്രം ഒരുക്കിയിരിക്കുന്നത്. പദ്മാവതിനെതിരായ പ്രതിഷേധം അവസാനിക്കാത്ത സാഹചര്യത്തില് രാജസ്ഥാന്, ഗുജറാത്ത്, മധ്യപ്രദേശ്, ഗോവ എന്നിവിടങ്ങളില് ചിത്രം പ്രദര്ശിപ്പിക്കില്ലെന്നു മള്ട്ടി പ്ലക്സ് അസോസിയേഷന് ഓഫ് ഇന്ത്യ ഭാരവാഹികള് അറിയിച്ചു.
വിവാദങ്ങള്ക്കൊടുവില് സഞ്ജയ് ലീലാ ബന്സാലിയുടെ പത്മാവത് തിയറ്ററുകളിലെത്തി. ഇന്നലെ െവെകിട്ട് ആറരയ്ക്കായിരുന്നു സിനിമയുടെ ആദ്യ പ്രദര്ശനം. സിനിമ പ്രദര്ശനത്തിനെത്തിയ കേരളത്തിലെ തിയറ്ററുകളില് പോലീസ് സംരക്ഷണം ഏര്പ്പെടുത്തിയിരുന്നു. സെന്സര് ബോര്ഡിന്റെ നിര്ദ്ദേശമനുസരിച്ച് ചില രംഗങ്ങള് നീക്കിയശേഷമാണു തിയറ്ററുകളിലെത്തിയത്. സെന്സര് ബോര്ഡിന്റെ നിര്ദ്ദേശപ്രകാരമാണു പത്മാവതിയെന്ന പേര് പത്മാവത് എന്നാക്കിയത്.
തെരഞ്ഞെടുത്ത തിയറ്ററുകളില്മാത്രം ഇന്നലെ െവെകിട്ടും രാത്രിയുമായി രണ്ടു പ്രദര്ശനം കഴിഞ്ഞ സിനിമ ഇന്നുമുതല് ലോക വ്യാപകമായി പ്രദര്ശനത്തിനെത്തും. സഞ്ജയ് ലീല ബെന്സാലി അണിയിച്ചൊരുക്കിയ പത്മാവതില് റാണി പത്മിനി എന്ന രാജകുമാരിയായാണ് ദീപിക വേഷമിടുന്നത്. പതിമൂന്നാം നൂറ്റാണ്ടിലെ രജപുത്ര രാജാവായിരുന്ന രത്തന്സെന്നിന്റെ ഭാര്യയാണ് റാണി പത്മിനി. ഡല്ഹി സുല്ത്താനായിരുന്ന അലാവുദ്ദീന് ഖില്ജി, റാണി പത്മിനിയുടെ സൗന്ദര്യത്തില് ആകൃഷ്ടനാകുകയും അവരെ സ്വന്തമാക്കാന് ശ്രമിക്കുന്നതുമാണ് ചിത്രത്തിന്റെ ഇതിവൃത്തം. ഇതു ചരിത്രത്തെ വളച്ചൊടിച്ച് വികൃതമാക്കുകയാണെന്നാണ് രജപുത്രസമൂഹത്തിന്റെ ആക്ഷേപം.
കോട്ടയത്തെ രണ്ടു തിയറ്ററുകളില് നിറഞ്ഞ സദസിലാണ് പത്മാവത് പ്രദര്ശിപ്പിച്ചത്. ധന്യ, രമ്യാ തിയറ്ററുകളില് ഇന്നലെ നാലു ഷോയാണ് നടന്നത്. കാര്യമായ പ്രതിഷേധങ്ങളൊന്നും തിയറ്ററുകളില് ഉണ്ടായില്ല. ഭീഷണി കണക്കിലെടുത്ത് തിയറ്ററിനു പോലീസ് സുരക്ഷ ഏര്പ്പെടുത്തിയിരുന്നു.
