അന്ധവിശ്വാസങ്ങള്‍ മാറ്റിവെച്ച് കണ്‍തുറന്നു കാണൂ... ഇനി ഈ ജന്മത്ത് ഇത്തരമൊരു ചാന്ദ്രവിസ്മയം കാണാനാകില്ല

ഇന്നത്തെ ദിവസം കടന്നുപോയാല്‍ ഇനി ഈ ജന്മത്ത് മറ്റൊരു ചാന്ദ്രവിസ്മയം നമുക്ക് മുന്നില്‍ എത്തില്ല. അതുകൊണ്ടു തന്നെ കാത്തിരിപ്പിലാണ് ശാസ്ത്രലോകം. സൂപ്പര്‍മൂണും, ബ്ലൂമൂണും, പൂര്‍ണ്ണചന്ദ്രഗ്രഹണവും ഒന്നിച്ചു വരുന്നു എന്നതാണ് ഈ അപൂര്‍വ പ്രതിഭാസത്തിന്റെ പ്രത്യേകത.

പതിവിനെക്കാള്‍ കൂടുതല്‍ വലിപ്പത്തിലും തിളക്കത്തിലും ചന്ദ്രനെ കാണാം എന്നതാണ് സൂപ്പര്‍മൂണ്‍. ചന്ദ്രന്‍ ഭൂമിക്ക് ഏറ്റവും അടുത്ത് വരുന്നതാണ് ഈ തിളക്കത്തിനും വലിപ്പത്തിനും കാരണം. അപൂര്‍വമായി ചന്ദ്രന്‍ ഭൂമിയുടെ തൊട്ടടുത്ത് കൂടി പോകുമ്പോള്‍ പൗര്‍ണ്ണമി സംഭവിക്കുന്നതിനെയാണ് സൂപ്പര്‍മൂണെന്ന് വിളിക്കുന്നത്. ഈ സമയത്ത് ചന്ദ്രന്റെ വലിപ്പം 14 ശതമാനം കൂടുതലായിരിക്കും.

1982 ഡിസംബര്‍ 30 നാണ് ഏഷ്യയില്‍ മുന്‍പ് ഈ വിസ്മയം കാണാന്‍ കഴിഞ്ഞത്. 152 വര്‍ഷങ്ങള്‍ക്ക് മുന്‍പാണ് അമേരിക്കയില്‍ ഇത് കാണാന്‍ കഴിഞ്ഞത്. സൂപ്പര്‍മൂണ്‍ , ബ്ലൂമൂണ്‍ പ്രതിഭാസത്തോടൊപ്പം ചന്ദ്രഗ്രഹണവും വരുന്ന ഇന്നത്തെ ദിവസം പോലൊരു ദിവസം ഈ തലമുറയ്ക്ക് ഇനി കാണാനാവില്ലെന്നാണ് പ്രത്യേകത.

ഇന്ന് വൈകീട്ട് 5.18 ന് ആരംഭിക്കുന്ന ചന്ദ്രഗ്രഹണം രാത്രി 8.49 ന് പൂര്‍ത്തിയാകും. കണ്ണടയില്ലാതെ നഗ്‌ന നേത്രങ്ങളാല്‍ ഇത് കാണാനാകും. ചന്ദ്രഗ്രഹണസമയത്ത് ഗര്‍ഭിണികള്‍ പുറത്തിറങ്ങരുതെന്നും കുഞ്ഞിനെ ദോഷമാണെന്നും പറയുന്നത് വെറും കെട്ടുകഥകളാണ്. ഈ സമയത്ത് പാകം ചെയ്യുന്ന ഭക്ഷണം കഴിക്കുന്നത് ശരീരത്തിന് കേടാണെന്നും പറയുന്നത് അന്ധവിശ്വാസം മാത്രമാണ്. അത്തരം വിശ്വാസങ്ങളൊക്കെ മാറ്റി വെച്ച് ഇനി ഈ ജന്മത്ത് കാണാന്‍ കഴിയാത്ത ആകാശക്കാഴ്ചയെ കണ്‍നിറയെ കാണൂ...