ന്യൂഡല്ഹി: ഇന്ത്യന് ക്രിക്കറ്റ് ടീം പരിശീലകനായി 2005 ല് ഓസ്ട്രേലിയന് ഗ്രെഗ് ചാപ്പലിനെ നിയമിക്കാനുള്ള തീരുമാനത്തെ സഹോദരന് ഇയാന് ചാപ്പല് പോലും എതിര്ത്തിരുന്നതായി മുന് ഇന്ത്യന് നായകന് സൗരവ് ഗാംഗുലി. ഇയാന് ചാപ്പലിനെയും സുനില് ഗാവസ്ക്കറിനെയും പോലെയുള്ള മഹാരഥന്മാരുടെ മുന്നറിയിപ്പിനെ പോലും അവഗണിച്ചാണ് താന് ഗ്രെഗ് ചാപ്പലിന് വേണ്ടി വാദിച്ചതെന്നും അത് പിന്നീട് തനിക്ക് വിനയായി മാറിയതും ആത്മകഥയിലാണ് ഗാംഗുലി കുറിച്ചത്.
പരിശീലക സ്ഥാനത്തേക്ക് ഗ്രെഗ് ചാപ്പലിന് താന് മുന്ഗണന കൊടുക്കാന് ഉണ്ടായ കാരണം 2003 ലെ ഒരു രഹസ്യ കൂടിക്കാഴ്ചയായിരുന്നു. ഇന്ത്യയുടെ ഓസ്ട്രേലിയന് പര്യടനത്തിന് തൊട്ടു മുമ്പായി ചാപ്പലിനെ ഗാംഗുലി സന്ദര്ശിച്ചിരുന്നു. ഓസ്ട്രേലിയന് സാഹചര്യത്തില് തന്നെ സഹായിക്കാന് ഏറ്റവും മികച്ച ആളാണ് ഗ്രെഗ് എന്ന് ഗാംഗുലി കരുതി. അതിന് മുമ്പ് നടന്നിരുന്ന കൂടിക്കാഴ്ചകളിലെല്ലാം ക്രിക്കറ്റില് നല്ല അവബോധമുള്ള ഗ്രെഗ് തന്നെ വിസ്മയിപ്പിച്ചിരുന്നതായിരുന്നു കാരണമെന്ന് ' എ സെഞ്ച്വറി ഈസ് നോട്ട് ഇനഫ്' എന്ന തന്റെ ആത്മകഥയില് ഗാംഗുലി പറയുന്നു.
എന്നാല് ഇീ കൂട്ടുകെട്ട് തന്റെ ജീവിതത്തിലെ തന്നെ ഏറ്റവും വലിയ വിവാദവുമായി ബന്ധപ്പെട്ടതായി മാറുകയായിരുന്നു. 2004 ല് ജോണ് റൈറ്റിന്റെ കാലം പൂര്ത്തിയായ ഘട്ടത്തില് പുതിയ പരിശീലകനെക്കുറിച്ച് ചിന്തിച്ചപ്പോള് ആദ്യം മനസ്സില് മിന്നിയ പേര് ഗ്രെഗ് ചാപ്പലിന്റേതായിരുന്നു. സ്ഥാനത്തേക്ക് പറ്റിയ ആള് ഗ്രെഗ് ചാപ്പലാണെന്ന് തോന്നിയപ്പോള് തന്നെ പുതിയ പരിശീലകനെ തേടുകയായിരുന്ന ഇന്ത്യന് മാനേജ്മെന്റിലെ ജഗ്മോഹന് ഡാല്മിയയെ വ്യക്തിപരമായ തീരുമാനം അറിയിക്കുകയും ചെയ്തു. എന്നാല് ഈ നീക്കത്തിനെതിരേ ഒട്ടേറെ പേര് ഗാംഗുലിക്ക് മുന്നറിയിപ്പ് നല്കി. അവരില് ഒരാള് സുനില് ഗാവസ്ക്കറായിരുന്നു.
അദ്ദേഹത്തിന്റെ പരിശീലക റെക്കോഡ് മികച്ചതല്ലെന്നും ടീം മുന്നോട്ട് കൊണ്ടുപോകാന് താങ്കള്ക്ക് അയാള് കൂടുതല് പ്രശ്നം സൃഷ്ടിക്കുമെന്നും അക്കാര്യം ഒന്നുകൂടി ആലോചിക്കാനും സുനില് ഗാവസ്ക്കര് തന്നോട് പറഞ്ഞതായി ഗാംഗുലി പറയുന്നു. ഒരു ദിവസം രാവിലെ അത്യാവശ്യമായി ഒരു കാര്യം സംസാരിക്കാന് ഉണ്ടെന്ന് പറഞ്ഞ് ഡാല്മിയ തന്നെ വീട്ടിലേക്ക് ക്ഷണിച്ചു. ഗ്രെഗ് ഇന്ത്യയ്ക്ക് അനുയോജ്യനാണെന്ന് താന് കരുതുന്നില്ലെന്ന് ഇയാന് ചാപ്പല് പോലും പറയുന്നതായി ഡാല്മിയ ഗാംഗുലിയോട് പറഞ്ഞെങ്കിലും അതെല്ലാം താന് അവഗണിക്കുകയായിരുന്നെന്ന് ഗാംഗുലി എഴുതി. ബാക്കിയെല്ലാം ചരിത്രമാണ്. 2005 വര്ഷം തന്റെ ജീവിതം തന്നെ മാറിമറിഞ്ഞ അധ്യായമായിരുന്നു.
തന്നില് നിന്നും നായകസ്ഥാനം പെട്ടെന്ന് എടുത്തുമാറ്റപ്പെട്ടു എന്ന് മാത്രമല്ല കാരണമില്ലാതെ ടീമില് നിന്നും ഒഴിവാക്കപ്പെട്ടു. ഇതെഴുതുമ്പോള് പോലും കോപം നിയന്ത്രിക്കാന് കഴിയുന്നില്ലെന്നും ഒരിക്കലും ചിന്തിക്കാനോ സ്വീകരിക്കാനോ മാപ്പു കൊടുക്കാനോ കഴിയാത്ത കാര്യമായിരുന്നു അതെന്നും ഗാംഗുലി കുറിക്കുന്നു. ഇന്ത്യന് ടീമില് ഏറെ വിവാദങ്ങള് സൃഷ്ടിച്ച പരിശീലകനായിരുന്നു ഗ്രെഗ് ചാപ്പല്. നായകന് ഗാംഗുലിയുമായുള്ള ഉടക്കായിരുന്നു ഇതില് ഏറെ ചര്ച്ച ചെയ്യപ്പെട്ടത്. ഗാംഗുലിയെ നായക സ്ഥാനത്തു നിന്നും മാറ്റിയതിന് പിന്നാലെ സീനിയര് താരങ്ങളായ സച്ചിന്, കുംബ്ളേ, ഗാംഗുലി, ദ്രാവിഡ് എന്നിവരെ ടീമില് നിന്നും മാറ്റി നിര്ത്താന് ശ്രമിച്ചതിന്റെ പേരിലും ചാപ്പല് ഏറെ പഴി കേട്ടിരുന്നു.
