കൊച്ചി: എസ്.എന്.ഡി.പി. യോഗം ജനറല് സെക്രട്ടറി വെള്ളാപ്പള്ളി നടേശന് എതിരായ മൈക്രോ ഫൈനാന്സ് തട്ടിപ്പ് കേസില് സര്ക്കാരിനും വിജിലന്സും ഹൈക്കോടതിയുടെ രൂക്ഷ വിമര്ശനം. കേസില് ഹാജരായ വിജിലന്സ് ഉദ്യോഗസ്ഥന് കേസിന്റെ അടിസ്ഥാന വിവരങ്ങള് പോലും അറിയില്ലെന്ന് കോടതി വിമര്ശിച്ചു. ഫണ്ട് എങ്ങോട്ടാണ് വകമാറ്റിയതെന്ന് പറയാന് ഉദ്യോഗസ്ഥന് സാധിക്കുന്നില്ല. കേസ് ഡയറിയുമായി ഹാജരായ ഉദ്യോഗസ്ഥനെയാണ് കോടതി വിമര്ശിച്ചത്. കേസില് അടുത്ത തിങ്കളാഴ്ച ഡയറക്ടര് ജനറല് ഓഫ് പ്രോസിക്യുഷന് നേരിട്ട് ഹാജരാകണമെന്നും ഹൈക്കോടതി നിര്ദേശിച്ചു.
കേസ് റദ്ദാക്കണമെന്ന് ആവശ്യപ്പെട്ട് വെള്ളാപ്പള്ളി നടേശന് അടക്കമുള്ള എസ്.എന്.ഡി.പി യോഗം ഭാരവാഹികള് സമര്പ്പിച്ച ഹര്ജിയിലാണ് വിജിലന്സിനെ കോടതി കുടഞ്ഞത്. വിജിലന്സ് എസ്.പി റാങ്കില് കുറയാത്ത ഉദ്യോഗസ്ഥന് കേസ് വിശദമായി പഠിച്ച് നേരിട്ട് ഹാജരാകണമെന്ന് ആദ്യം നിര്ദേശിച്ചുവെങ്കിലും പിന്നീട് വേണ്ടെന്നു വച്ചു. കേസ് ഡയറി പിടിച്ചുവച്ച കോടതി കേസിലെ മുഴുവന് രേഖകളും ഹാജരാക്കണമെന്നും നിര്ദേശിച്ചു.
കേസ് റദ്ദാക്കരുതെന്നാണ് സര്ക്കാര് കോടതിയില് നിലപാട് സ്വീകരിച്ചത്. വ്യാജരേഖകള് ചമച്ച് 15 കോടി രൂപയുടെ തട്ടിപ്പ് നടത്തിയെന്ന ആരോപണത്തിലാണ് എസ്.എന്.ഡി.പി നേതൃത്വം അന്വേഷണം നേരിടുന്നത്. അഴിമതി അന്വേഷിക്കണമെന്ന് ആവശ്യപ്പെട്ട് ഭരണപരിഷ്കരണ കമ്മീഷന് ചെയര്മാന് വി.എസ് അച്യുതാനന്ദനാണ് വിജിലന്സിനെ സമീപിച്ചത്.
