മുംബൈ: വായ്പാ വിവാദത്തില് കുടുങ്ങിയ ഐ.സി.ഐ.സി.ഐ ബാങ്ക് മേധാവി ചന്ദ കൊച്ചാറും ഭര്ത്താവ് ദീപക് കൊച്ചാറുമായി ബന്ധമില്ലെന്ന് വ്യക്തമാക്കി വീഡിയോകോണ് ഗ്രൂപ്പ് ചെയര്മാന് വേണുഗോപാല് ദൂത്. കൊച്ചാറിന്റെ നുപവര് റിനൈവബിള്സ് എന്ന കമ്പനിക്ക് വീഡിയോകോണ് 64 കോടി വായ്പ നല്കിയെന്ന വര്ത്ത തികച്ചും അടിസ്ഥാന രഹിതമാണ്. ഇതിലൂടെ കമ്പനിയുടെ പൂര്ണ ഉടമസ്ഥാവകാശം തനിക്ക് ലഭിച്ചുവെന്ന വാര്ത്ത തെറ്റാണെന്നും അദ്ദേഹം പ്രതികരിച്ചു.
കഴിഞ്ഞ ദിവസം ഐസിഐസിഐ ബാങ്ക് വീഡിയോകോണ് ഗ്രൂപ്പിന് വഴിവിട്ട് 3,250 കോടിയുടെ വായ്പ അനുവദിച്ചു കൊടുത്തുവെന്ന ആരോപണത്തില് സിബിഐ പ്രാഥമീക അന്വേഷണം ആരംഭിച്ചു. വീഡിയോകോണ് പ്രമോട്ടര് വേണുഗോപാല് ദൂത്, ചന്ദാ കൊച്ചാര്, ഇവരുടെ ഭര്ത്താവ് ദീപക് കൊച്ചാര് എന്നിവര്ക്കെതിരെയായിരുന്നു ആരോപണം ഉയര്ന്നിരിക്കുന്നത്.
തങ്ങളുടെ ഇടപാടുകളെല്ലാം സുതാര്യമാണ്. ഇതുവരെ വ്യാപാരത്തില് തെറ്റൊന്നും ചെയ്തിട്ടില്ല. ചെയ്യുകയുമില്ല. അതേസമയം ദീപക് കൊച്ചാറിന്റെ കമ്പനിയില് വീഡിയോകോണ് നിക്ഷേപം നടത്തിയതായും അദ്ദേഹം വ്യക്തമാക്കി. ഒരു മറാത്തി ചാനലിന് നല്കിയ അഭിമുഖത്തിലാണ് ഇക്കാര്യം വ്യക്തമാക്കിയത്.
