ഐഎസ്എല് നാലാം സീസണില് ആരാധകര് ഏറെ പ്രതീക്ഷ അര്പ്പിച്ച സൂപ്പര്താരമായിരുന്നു ദിമിറ്റര് ബെര്ബറ്റോവ്. എന്നാല് കളത്തിലിറങ്ങിയാല് അലസമായ കളികൊണ്ട് ആരാധകരെ വെറുപ്പിക്കാനും വമ്പന് പ്രതീക്ഷ ഉണര്ത്തിയ ്താരം മത്സരിച്ചു. സീസണില് ഉടനീളം നിരാശജനകമായ പ്രകടനം കാഴ്ചവെച്ച താരം സൂപ്പര് കപ്പിനു മുമ്പ് ടീം വിടുകയും കോച്ച് ഡേവിജ് ജെയിംസിനെതിരെ ആഞ്ഞടിക്കുകയും ചെയ്തിരുന്നു.
താന് കണ്ടതില് വെച്ച് ഏറ്റവും മോശം പരിശീലകനാണ് ഡേവിഡ് ജെയിംസ് എന്നായിരുന്നു കോച്ചിനെതിരെ ബെര്ബറ്റോവിന്റെ പ്രയോഗം. ബള്ഗേറിയന് താരത്തിന്റെ വിമര്ശനത്തിന് അതേ നാണയത്തില് തന്നെയാണ് ഡേവിഡ് ജെയിംസ് മറുപടി നല്കിയിരിക്കുന്നത്.
ബ്ലാസ്റ്റേഴ്സിനു വേണ്ടി കളിക്കാ നാണ് താരങ്ങളെ ടീമിലെത്തിക്കുന്നത്. അല്ലാതെ ഇന്ത്യയിലെത്തി അവധിക്കാലം ആഘോഷിക്കാനല്ല. കരാര് ഒപ്പിടുന്നതിനു മുമ്പു തന്നെ കളിക്കാര്ക്ക് ഇന്ത്യയിലേക്ക് വരാന് താല്പര്യമുണ്ടോ എന്ന കാര്യം അറിഞ്ഞശേഷം മാത്രം താരങ്ങളെ ടീമിലെടുക്കുകയാകും നല്ലതെന്നും ജെയിംസ് പറഞ്ഞു. അതേസമയം, ബെര്ബറ്റോവ് ഇന്ത്യയിലെത്തിയത് എന്തിനാണെന്ന് തനിക്ക റിയാമെന്നും എന്നാല് അതിനെക്കുറിച്ച് കൂടുതല് താന് പറയുന്നില്ലെന്നും ജെയിംസ് വ്യക്തമാക്കി. ബെര്ബറ്റോവിന്റെ വിമര്ശനം തന്നെ ബാധിക്കുന്നില്ലെന്നും സൂപ്പര് താരത്തെ ടീമിലെത്തിച്ചത് താനല്ലെന്നും ജെയിംസ് കൂട്ടിച്ചേര്ത്തു.
അതേസമയം,വിദേശതാരം വെസ് ബ്രൗണിനെ പ്രശംസകൊണ്ട് മൂടാനും കോച്ച് മറന്നില്ല. ട്രെയിനിങ്ങിലും, കളത്തിലും പ്രൊഫഷണല് സമീപനമാണ് താരത്തിനെന്നും കോച്ച് കൂട്ടിച്ചേര്ത്തു. ദേശീയ മാധ്യമത്തിന് നല്കിയ അഭിമുഖത്തിലാണ് ഇക്കാര്യം ഡേവിഡ് ജെയിംസ് വെളിപ്പെടുത്തിയത്.
