ആക്രമണങ്ങള് ഒരുപാട് നേരിടേണ്ടി വന്നിട്ടും എന്തൊക്കെ സംഭവിച്ചാലും, ആരൊക്കെ എന്തൊക്കെ പറഞ്ഞാലും പറയാനുള്ളത് പറയുക തന്നെ ചെയ്യുമെന്ന നിലപാടില് ഉറച്ചു നില്ക്കുന്ന നടിയാണ് പാര്വതി. അഭിപ്രായങ്ങള് മുന്പിന് നോക്കാതെ തൊടുത്തു വിട്ടതിന്റെ പേരില് പാര്വതിക്ക് നേരിടേണ്ടി വന്നിട്ടുള്ള പ്രശ്നങ്ങളും ചില്ലറയൊന്നുമല്ല. ഇപ്പോഴിതാ പ്രമുഖ ജീന്സ് നിര്മാതാക്കളായ ലെവിസിന്റെ 'ഐ ഷേപ്പ് മൈ വേള്ഡ്' എന്ന ടോക് ഷോയില് പങ്കെടുത്ത് സംസാരിക്കവെ തന്റെ നിലപാടുകള്ക്ക് വീണ്ടും അടിവരയിടുകയാണ് താരം.
അഭിപ്രായങ്ങള് മുഖം നോക്കാതെ തുറന്നു പറഞ്ഞതിന്റെ പേരില് താന് നേരിട്ടത് വെറും സൈബര് ആക്രമണമല്ലെന്നും ബലാത്സംഗ ഭീഷണിയും കൊലപാതക ഭീഷണിയും വരെ ഉണ്ടായിട്ടുണ്ടെന്നും പാര്വതി വ്യക്തമാക്കുന്നു.
മമ്മൂട്ടി ചിത്രം കസബയെ ആദ്യമായി വിമര്ശിച്ചത് ഞാന് അല്ല. എനിക്ക് മുന്പും ഒരുപാടു പേര് ചിത്രത്തെ വിമര്ശിച്ചിരുന്നു. എന്നാല്, വിമര്ശനങ്ങളെക്കാള് തന്നെ നോവിച്ചത് സ്ത്രീകളുടെ ചില നിലപാടുകളാണെന്നും താരം തുറന്നു പറയുന്നു. 'പുരുഷന് അടിച്ചാല് എന്താണ് കുഴപ്പം' എന്നു വരെ പല സ്ത്രീകളും പറയുന്നത് കേട്ടിരുന്നു. കമന്റുകള് വായിച്ച ശേഷം എന്താണ് താന് മേളയില് പറഞ്ഞതെന്ന് ഒന്നുകൂടി കേട്ടുനോക്കി. അതില് ആരെയും താന് വ്യക്തിപരമായി അധിക്ഷേപിച്ചിട്ടില്ലെന്നും പാര്വതി പറയുന്നു.
ഇതുസംബന്ധിച്ച വിവാദങ്ങള് കത്തിനില്ക്കേ കുറച്ച് മൗനം പാലിക്കാനും ഇത്തരം വിഷയങ്ങളില് നിന്നും ഇനിയെങ്കിലും ഒഴിഞ്ഞു നില്ക്കാനും നിരവധിപ്പേര് ഉപദേശിച്ചു. സിനിമയില് ഒരു ലോബി തന്നെ തനിക്കെതിരെ ഉണ്ടാകുമെന്നുവരെ പറഞ്ഞു. എന്നാല്, സിനിമയില് അവസരങ്ങ നഷ്ടപ്പെടുമെന്ന് ഓര്ത്ത് എനിക്ക് ഭയമില്ലെന്നും എനിക്ക് അവസരം തന്നില്ലെങ്കില് ഞാന് സിനിമ എടുക്കുമെന്നും പാര്വതി പറയുന്നു. ഇഷ്ടപ്പെട്ടാണ് സിനിമ എടുത്തത്. കഴിഞ്ഞ 12 വര്ഷമായി സിനിമയില് ഉണ്ടെന്നും പാര്വതി കൂട്ടിച്ചേര്ത്തു.
