വാരാപ്പുഴ: പോലീസ് കസ്റ്റഡിയില് എടുത്തതിന് പിന്നാലെ മരണമടഞ്ഞ ശ്രീജിത്ത് ആശുപത്രിയില് പോകണമെന്ന് പറഞ്ഞപ്പോള് പോലീസുകാര് മര്ദ്ദനത്തിന്റെ തോത് കൂട്ടിയെന്ന് കുടുംബത്തിന്റെ വെളിപ്പെടുത്തല്. ആശുപത്രിയില് പോകണം എന്ന് പറഞ്ഞപ്പോള് ഇപ്പോ ശരിയാക്കിത്തരാം എന്ന് പറഞ്ഞ് എസ്ഐ ഇടിക്കുക ആയിരുന്നെന്നും തുള്ളി വെള്ളം കൊടുക്കാന് പോലും പോലീസുകാര് സമ്മതിച്ചില്ലെന്നും മാതാപിതാക്കള് ആരോപിച്ചു.
വെള്ളം കൊടുക്കാന് കൊണ്ടു ചെന്നപ്പോള് പോലീസ് ആട്ടിപ്പായിച്ചു. അമ്മേ വെള്ളം വേണമെന്ന് ശ്രീജിത്ത് കെഞ്ചിപ്പറഞ്ഞിട്ടും പോലീസുകാരന് തുള്ളി പോലും കൊടുക്കാന് അനുവദിച്ചില്ല. അപ്പനേയും അമ്മയേയും ഓടിക്കുകയും ചെയ്തു. വീടു മുതല് പോലീസ് ഉദ്യോഗസ്ഥര് മര്ദ്ദനം തുടങ്ങിയിരുന്നെന്ന് സഹോദരന് ആരോപിച്ചു. കസ്റ്റഡിയില് എടുപ്പോള് മുതല് തുടങ്ങിയ ക്രൂരമര്ദ്ദനം പിന്നീട് ജംഗ്ഷനില് എത്തിയപ്പോഴും ജീപ്പിലിട്ടും പിന്നീട് സ്റ്റേഷനില് വെച്ചും തുടര്ന്നു.
വീട്ടില് നിന്നും ഇറക്കിക്കൊണ്ടു പോയപ്പോഴും ജീപ്പില് വെച്ചും മര്ദ്ദിച്ചത് പോലീസുകാര് ആയിരുന്നു. ജംഗ്ഷനില് എത്തിയപ്പോഴായിരുന്നു നന്നായി മര്ദ്ദിച്ചത്. സ്റ്റേഷനില് ഇട്ട് ഇടിച്ചത് എസ്ഐ ദീപക്കാണെന്നും വീട്ടുകാര് ആരോപിക്കുന്നു. ഇടി സ്റ്റേഷനില് ചെന്നിട്ടും നിര്ത്തിയില്ല. ഇടിക്കുകയും നിലത്തിട്ടു ചവിട്ടുകയും ചെയ്തു. മാധ്യമങ്ങള്ക്ക് മുന്നില് പോയാല് ഇനിയും തല്ലുമെന്നും പോലീസ് ഭീഷണിപ്പെടുത്തിയതായി സഹോദരന് സജിത്ത് വെളിപ്പെടുത്തി. വാസുദേവന്റെ വീട്ടില് ആക്രമണം നടക്കുമ്പോള് താന് പറവൂരും ശ്രീജിത്ത് വീട്ടില് കിടന്നുറങ്ങുകയുമായിരുന്നന്നും മൂന്ന് ദിവസത്തെ ജാമ്യത്തില് ഇറങ്ങിയിരിക്കുന്ന സജിത് പറഞ്ഞു.
സംഭവത്തില് പോലീസിനെ പ്രതികൂട്ടിലാക്കുന്നതാണ് പോസ്റ്റുമാര്ട്ടം റിപ്പോര്ട്ടും. ശ്രീജിത്തിന്റെ നെഞ്ചിലും അടിവയറ്റിലും ആയുധങ്ങള് ഉപയോഗിക്കാതെ മര്ദ്ദിച്ചതിന്റെ അടയാളം ഉണ്ടായിരുന്നു. പരിക്കുകള്ക്ക് രണ്ടു ദിവസത്തെ പഴക്കമുണ്ട്. ആന്തരീകാവയവങ്ങള്ക്ക് ഏറ്റ പരിക്കായിരുന്നു മരണകാരണം. നെഞ്ചിലും അടിവയറ്റിലും ഏറ്റ പരിക്കുകള്ക്ക് രണ്ടു ദിവസത്തെ പഴക്കമുണ്ടായിരുന്നു. ചെറുകുടല് മുറിഞ്ഞ് ആഹാരം പുറത്തു വന്ന അണുബാധയുണ്ടായ നിലയിലായിരുന്നു. അടിവയറ്റില് മുറിവേറ്റിരുന്നു.
രക്തത്തില് അണുബാധയുണ്ടായിരുന്നു. കുടലിലും മറ്റും ചതവുണ്ടായി. രക്തസമ്മര്ദ്ദം അപകടകരമായ നിലയിലായിരുന്നു. വൃക്കയുടെയും കരളിന്റെയും പ്രവര്ത്തനവും ദോഷകരമായി ബാധിക്കുകയും ഹൃദയത്തിന്റെ പ്രവര്ത്തനം അപകടകരമായ നിലയിലുമായിരുന്നു. രണ്ടു ദിവസം ഐസിയുവില് കിടന്ന ശേഷം തിങ്കളാഴ്ച വൈകിട്ടോടെ ഹൃദയാഘാതത്തെ തുടര്ന്നായിരുന്നു മരണം.
