ജീവിതപങ്കാളിയെ കണ്ടെത്താനായി ആര്യ നടത്തുന്ന റിയാലിറ്റി ഷോ 'എങ്ക വീട്ടു മാപ്പിളയില് വീണ്ടും വിവാദം. അഞ്ച് മത്സരാര്ത്ഥികളുടെയും വീട്ടില് ആര്യ പെണ്ണുകാണാന് പോയതാണ് വീണ്ടും വിവാദത്തിരി തെളിച്ചിരിക്കുന്നത്.
അഞ്ച് പേര് മാത്രമാണ് ഇനി അവശേഷിക്കുന്നത്. അബര്നദി, മലയാളിയായ സീതാ ലക്ഷ്മി, സൂസാന, അഗത, ശ്വേത എന്നിവരാണ് ഇനി മത്സരത്തിനുള്ളത്. ഈ അഞ്ചുപേരില് നിന്നാണ് ഇനി മൂന്ന് പേരെ തിരഞ്ഞെടുക്കുക.
പതിനാറ് മത്സരാര്ത്ഥികളുണ്ടായിരുന്ന പരിപാടിയില് നിരവധി ടാസ്കുകളാണ് ഉണ്ടായിരുന്നത്. ഇതിലെ വിജയികളില് നിന്നാണ് അവസാനത്തെ അഞ്ച് പേരെ തിരഞ്ഞെടുത്തിരിക്കുന്നത്. തുടക്കം മുതല് തന്നെ വിവാദങ്ങളിലകപ്പെട്ട പരിപാടിയായിരുന്നു എങ്ക വീട്ടു മാപ്പിളൈ. തനിക്ക് ജീവിത പങ്കാളിയെ കണ്ടെത്തുവാന് ഷോ നടത്തുന്നുവെന്ന് ആര്യ പ്രഖ്യാപിച്ചപ്പോള് ഏഴായിരത്തിലധികം അപേക്ഷകളും ഒരുലക്ഷത്തോളം ഫോണ്കോളുകളുമാണ് ആര്യയെ തേടിയെത്തിയത്.
മുസ്ലിം ആയ ആര്യയുടെ വധുവാകാന് മതം മാറാന് തയ്യാറാകുമോ എന്ന് ഷോയിലെ മത്സരാര്ഥികളോട് പരിപാടിയില് അതിഥിയായി എത്തിയ വരലക്ഷ്മി ചോദിച്ചത് വലിയ വിവാദമായിരുന്നു. പരിപാടി ലൗ ജിഹാദാണോ എന്ന് ചോദിച്ച് തമിഴ്നാട്ടിലെ ബി.ജെ.പി നേതൃത്വം രംഗത്ത് വരികയും ചെയ്തു.
ഒരു ഘട്ടത്തില് കടുത്ത പ്രതിഷേധത്തെ തുടര്ന്ന് ആര്യയും സംഘവും ചെന്നൈയിലേക്ക് തന്നെ തിരിച്ചു പോരേണ്ടി വന്നിരുന്നു. സാമൂഹിക മാധ്യമങ്ങളിലും ആര്യയ്ക്ക് നേരെ ശക്തമായ വിമര്ശനങ്ങളാണ് ഉയരുന്നത്. ഇങ്ങനെയല്ല ഭാവി വധുവിനെ കണ്ടു പിടിക്കേണ്ടത് എന്നും പെണ്കുട്ടികളുടെ മനസ്സ് വച്ച് കളിക്കരുതെന്നും അഭിപ്രായങ്ങളുണ്ട്.
