കിളിമാനൂര്: റേഡിയോജോക്കി രാജേഷ് ഭവനില് രാജേഷിനെ കൊലപ്പെടുത്തിയ കേസില് മുഖ്യസൂത്രധാരനും മൂന്നാം പ്രതിയുമായ അപ്പുണ്ണിയെ ഒളിവില് കഴിയാന് സഹായിച്ചത് എറണാകുളം സ്വദേശിനിയായ സെബല്ലാ ബോണി എന്ന യുവതി. രാജേഷിനെ കൊലപ്പെടുത്താനുള്ള പദ്ധതി തയ്യാറാക്കി ബംഗളുരുവില് നിന്നും കേരളത്തില് എത്തിയ അപ്പുണ്ണിയ്ക്കും അലിഭായി എന്ന മൊഹമ്മദ് സാലിഹിനും എറണാകുളത്ത് സ്വന്തംപേരില് മുറിയെടുത്തു നല്കിയത് സെബല്ലയായിരുന്നു.
സംഭവത്തിന് ശേഷം ഒളിവില് പോയ അപ്പുണ്ണി 38 കാരി സെബല്ലയെ മാത്രമാണ് പതിവായി വിളിച്ചു കൊണ്ടിരുന്നത്. മൊബൈലില് വിളിച്ചാല് നമ്പര് പിടിക്കും എന്നതിനാല് ലാന്റ് ഫോണിലായിരുന്നു ബന്ധപ്പെട്ടിരുന്നത്. പോലീസിന്റെ നീക്കങ്ങള് സംബന്ധിച്ച വിവരങ്ങള് നല്കിക്കൊണ്ടിരുന്നത് സെബല്ലയായിരുന്നു. പോലീസ് തന്നെത്തേടി ചെന്നൈയിലും എത്തിയതായി മനസ്സിലാക്കിയതോടെയാണ് അപ്പുണ്ണി മൊബൈല് ഉപേക്ഷിച്ചത്. സെബല്ലയെ അറസ്റ്റ് ചെയ്ത പോലീസ് അവരെ ഉപയോഗിച്ച് തന്നെയാണ് അപ്പുണ്ണിയെ കുടുക്കിയതും.
കൊലപാതകത്തിന് ശേഷം തമിഴ്നാട്ടിലേക്ക് മുങ്ങിയ അപ്പുണ്ണി ആദ്യം ചെയ്തത് മൊബൈല് ഉപേക്ഷിക്കുകയായിരുന്നു. പിന്നീട് ലാന്റ് ഫോണില് നിന്നുമായിരുന്നു കാമുകിയേയും വിദേശത്തുള്ള സത്താറിനെയും ബന്ധപ്പെട്ടിരുന്നത്. അപ്പുണ്ണിക്കായി ഇതിനിടയില് മാതാവുമായി ബന്ധപ്പെട്ട് പണമിടപാടുകള് നടത്തുകയും അഭിഭാഷകനെ ബന്ധപ്പെടുകയുമെല്ലാം സെബല്ല ചെയ്തിരുന്നു. അപ്പുണ്ണി ഉപേക്ഷിച്ച ഫോണ് കണ്ടെത്തിയ പോലീസ് ഈ മൊബൈലില് നിന്നും അവസാനം വിളിച്ച നമ്പര് വഴിയാണ് സെബല്ലയില് എത്തിയത്.
സെബല്ലയെ ട്രാക്ക് ചെയ്ത പോലീസ് അവരെ വിളിക്കാനുള്ള അപ്പുണ്ണിയുടെ രാത്രിയിലുള്ള ലാന്റ് ഫോണ് കോളിനായി കാത്തിരുന്നു. കൊല്ലം, കായംകുളം പ്രദേശങ്ങള് പോലീസ് നിരീക്ഷണത്തിലാണെന്നും അതിനാല് തിരുവനന്തപുരത്ത് എത്താനും സെബല്ലയെക്കൊണ്ട് പോലീസ് പറയിച്ചു. തിരുവനന്തപുരത്ത് എത്തി തമ്പാനൂരില് നിന്നും ഓട്ടോയില് സഞ്ചരിക്കുമ്പോഴാണ് അപ്പുണ്ണി പിടിയലാകുന്നത്.
അപ്പുണ്ണിയെ സഹായിച്ചതിന്റെ പേരില് സഹോദരിയും രാജേഷ് വധക്കേസിലെ അപ്പുണ്ണിയുടെ കൂട്ടുപ്രതിയുമായ സുമിത്തിന്റെ ഭാര്യയുമായ ഭാഗ്യശ്രീ എന്ന 29 കാരിയേയും പോലീസ് അറസ്റ്റ് ചെയ്തു. ചെന്നൈ മതിയഴകന് നഗര് അണ്ണാ സ്ട്രീറ്റ് നമ്പര് 18 ല് താമസിക്കുന്ന ഭാഗ്യശ്രീയും അപ്പുണ്ണിയെ ഒളിപ്പിച്ചതിനാണ് പിടിയിലായത്. അപ്പുണ്ണിയെ സഹായിക്കാനായി ഭര്ത്താവിനെ ഭാഗ്യശ്രീ ചുമതലപ്പെടുത്തുകയും പിന്നീട് അത് മറച്ചു വെയ്ക്കുകയുമായിരുന്നു. ഇരുവര്ക്കുമെതിരേ ഗൂഡാലോചനക്കുറ്റത്തിലാണ് അറസ്റ്റ് ചെയ്തിരിക്കുന്നത്.
