മറക്കാന് ആഗ്രഹിക്കുന്ന ഓര്മ്മകളുമായി ഒരു സീസണ് പൂര്ത്തിയാക്കുന്ന ഇംഗ്ളീഷ് പ്രീമിയര് ലീഗ് ക്ളബ്ബ് ആഴ്സണല് ഒടുവില് ആശാന് വിജയം നല്കി മടക്കി. ആഴ്സണല് ടീമിന്റെ പരിശീലകനായി 7,876 ദിവസം പൂര്ത്തിയാക്കി ഗണ്ണേഴ്സിന്റെ പടിയിറങ്ങുന്ന വെംഗര്ക്ക് ബേണ്ലിക്കെതിരേ 5-0 ന്റെ വിജയം നല്കിയാണ് ശിഷ്യന്മാര് വിട നല്കിയത്. പ്രീമിയര് ലീഗില് ആറാം സ്ഥാനത്താണ് ആഴ്സണല്.
ഔബമ്യാംഗിന്റെ ഇരട്ടഗോളുകള്ക്ക് പുറമേ ലാക്കാസേറ്റ്, കൊളാസിനാക്, ഇവോബി എന്നിവര് ആഴ്സണലിനായി സ്കോര് ചെയ്തു. 1996 ല് എവൂഡ് പാര്ക്കില് 2-0 ന്റെ വിജയവുമായി തുടങ്ങിയ വെംഗര്ക്ക് ഈ സീസണ് ഗുണകരമായില്ല. പ്രീമിയര് ലീഗില് ആറാം സ്ഥാനത്തായി ചാമ്പ്യന്സ് ലീഗ് സാധ്യതകള്ക്ക് മങ്ങലേറ്റതിന് പിന്നാലെ കഴിഞ്ഞ ദിവസം യൂറോപ്പാ ലീഗില് സെമിയില് അത്ലറ്റിക്കോ മാഡ്രിഡിനോട് തോറ്റ് ടീം പുറത്താകുകയും ചെയ്തിരുന്നു. ഈ സീസണില് മോശം ഫോം തുടരുന്ന ടീം ഇന്നലെ പക്ഷേ ആശ്വാസ വിജയം നേടാനായത് വെംഗറിന് ഗുണമായി.
പ്രീമിയര് ലീഗിലെ മികച്ച പരിശീലകരുടെ ഗണത്തില് പെടുന്ന വെംഗര് 826 മത്സരങ്ങളില് ടീമിനെ പരിശീലിപ്പിച്ചതില് 475 വിജയം ടീമിന് നേടാനായി. ആഴ്സണലിന്റെ കുപ്പായത്തില് 6000 ആരാധകരാണ് വെംഗര്ക്ക് യാത്രാ മംഗളവുമായി എത്തിയത്.
1997 ലും 1998 ലും 2001-2002 സീസണുകളില് പ്രീമിയര് ലീഗ്, എഫ്എ കപ്പും അടിച്ച് രണ്ടു തവണ ഡബിള് നേടിയ ആഴ്സണല് 2003-04 ല് 38 മത്സരങ്ങളാണ് തോല്വി അറിയാതെ പൂര്ത്തിയാക്കിയത്. ഏഴ് എഫ്ഐ കപ്പുകളും പേരിലുണ്ട്. ആഴ്സണ് വെംഗറിന് കീഴില് ആഴ്സണല് പ്രീമിയര് ലീഗിലെ 606 ാം ഹോം മാച്ചില് 27 ാം തവണയാണ് അഞ്ചുഗോള് വിജയം നേടുന്നത്.
