ചെങ്ങന്നൂര്: ശക്തമായ ത്രികോണ മത്സരം നടക്കുമെന്നും സര്ക്കാരിന്റെ വിലയിരുത്തലാകുമെന്നും പ്രതീക്ഷിക്കപ്പെട്ട ചെങ്ങന്നൂര് ഉപ തെരഞ്ഞെടുപ്പില് എല്ഡിഎഫിന് മിന്നും വിജയം. മണ്ഡലത്തില് ഭൂരിപക്ഷത്തിന്റെ കാര്യത്തില് റെക്കോഡിട്ട് എല്ഡിഎഫ് സ്ഥാനാര്ത്ഥി സജി ചെറിയാന് ഇരുപതിനായിരം വോട്ടുകളുടെ ഭൂരിപക്ഷത്തില് സീറ്റ് നിലനിര്ത്തി. കഴിഞ്ഞ നടന്ന തെരഞ്ഞെടുപ്പില് വിജയിച്ച കെ കെ രാമചന്ദ്രന് നായര് നേടിയ ഭൂരിപക്ഷത്തിന്റെ മൂന്നിരട്ടി ഭൂരിപക്ഷത്തിലായിരുന്നു ഇത്തവണ സജിചെറിയാന് വിജയിച്ചുയകറിയത്.
മണ്ഡലത്തിലെ എല്ലാ ബൂത്തുകളിലൂം കൃത്യമായി മേല്ക്കോയ്മ നേടിക്കൊണ്ട് 20,956 വോട്ടിന്റെ ഭൂരിപക്ഷത്തിലായിരുന്നു സജി ചെറിയാന്റെ വിജയം. 67,303 വോട്ടുകള് സജി ചെറിയാന് ലഭിച്ചപ്പോള് ഡി വിജയകുമാറിന് 46,347 വോട്ടുകളും ശ്രീധരന്പിള്ളയ്ക്ക് 35,270 വോട്ടുകളും ലഭിച്ചു. എല്ഡിഎഫ് മേല്ക്കോയ്മയില് മണ്ഡലത്തിലെ യുഡിഎഫ് ഭരണം നടത്തുന്ന പഞ്ചായത്തുകള് പോലും കടപുഴകി. പത്തു പഞ്ചായത്തുകളിലും ഒരു നഗരസഭയിലും എല്ഡിഎഫ് നേട്ടമുണ്ടാക്കി. ജന്മനാടായ മുളക്കുഴയില് 3,637 വോട്ടിന്റെ ഭൂരിപക്ഷമാണ് സജി ചെറിയാന് കിട്ടിയത്.
യുഡിഎഫ് പശ്ചാത്തലമുള്ള മാന്നാറും പാണ്ടനാടും എല്ഡിഎഫിനൊപ്പം നിന്നു. 2629 വോട്ടിന്റെ ഭൂരിപക്ഷം മാന്നാറ് കിട്ടിയപ്പോള് പാണ്ടനാട്ട് 548 വോട്ടുകളുടെ ഭൂരിപക്ഷം കിട്ടി. ബിജെപി ആഭിമുഖ്യമുള്ള കേരളാകോണ്ഗ്രസ് ഭരിക്കുന്ന തിരുവന് വണ്ടൂരില് 10 വോട്ടുകളുടെ ഭൂരിപക്ഷമാണ് കിട്ടിയത്. ഇവിടെ യുഡിഎഫ് മൂന്നാമതായി. കോണ്ഗ്രസിന് ശക്തമായ മേല്ക്കൈയുള്ള ചെങ്ങന്നൂര് മുനിസിപ്പാലിറ്റിയില് 753 വോട്ടുകളുടെ ഭൂരിപക്ഷാേണ് കിട്ടിയത്. ആലയില് 866, പുലിയൂരില് 637 എന്നിങ്ങനെയായിരുന്നു ഭൂരിപക്ഷം.
അതേസമയം ബുധനൂര്, ചെന്നിത്തല, ചെറിയനാട്, വെണ്മണി എന്നിവിടങ്ങള് സജി ചെറിയാന് നല്കിയത് രണ്ടായിരത്തിലേറെ വോട്ടുകളുടെ ഭൂരിപക്ഷമായിരുന്നു. ബുധനൂരില് 2,646, ചെന്നിത്തലയില് 2353, ചെറിയനാട്ട് 2485, വെണ്മണിയില് നിന്നും 3203 എന്നതുമായിരുന്നു സജി ചെറിയാന് മറ്റ് പഞ്ചായത്തുകളില് നിന്നും കിട്ടിയ ഭൂരിപക്ഷം. ലീഡ് 15,000 കടന്നപ്പോള് തന്നെ മണ്ഡലത്തില് ഇതുവരെയുള്ള ഭൂരിപക്ഷത്തിന്റെ റെക്കോഡ് തകര്ന്നു. 1985 ല് മാമ്മന് ഐപ്പ് നേടിയ 15,000 വോട്ടിന്റെ ഭൂരിപക്ഷത്തിന്റെ റെക്കോഡാണ് സജി ചെറിയാന് മറികടന്നത്്. ഇതിലൂടെ 2006 ല് പിസി വിഷ്ണുനാഥിനോട് 5000 വോട്ടിന് പരാജയപ്പെട്ടത് തിരുത്തി അതിശക്തമായി തിരിച്ചുവരാന് സജി ചെറിയാനായി.
ബിജെപി മാര്ക്സിസ്റ്റ് ഐക്യമെന്നാണ് ഡി വിജയകുമാര് പ്രതികരിച്ചത്. ബിജെപി സിപിഎമ്മിന് വോട്ടുകള് മറിച്ചുകൊടുത്തതായി വിജയുമാര് ആരോപിച്ചു. അസാധാരണമായ രാഷ്ട്രീയ അടിയൊഴുക്കുകള് ഉണ്ടായതായി കെഎം മാണി വിലയിരുത്തിയപ്പോള് വര്ഗ്ഗീയത പ്രചരിപ്പിച്ചുള്ള വിജയം എന്നായിരുന്നു പ്രതിപക്ഷ നേതാവ് രമേശ് ചെന്നിത്തല ചോദിച്ചത്. കെഎം മാണി വന്നിട്ടെന്തായി എന്ന് വിഎസ് അച്യുതാനന്ദന് പരിഹസിച്ചു. സിപിഎമ്മിന് കോണ്ഗ്രസ് വോട്ടു മറിച്ചെന്നാണ് ബിജെപി സ്ഥാനാര്ത്ഥി ശ്രീധരന് പിള്ളയുടെ ആരോപണം. നോട്ടയ്ക്ക് 728 വോട്ടുകള് ലഭിച്ചു.
