ന്യൂഡല്ഹി : രാജ്യത്തെ ഏറ്റവും വലിയ കാര്ഡ് പെയ്മെന്റ് ശൃംഖലയായ 'വിസ'അവരുടെ ഡെബിറ്റ് കാര്ഡ് ഉപയോഗിച്ചുള്ള പണമിടപാടുകള്ക്ക് ഈടാക്കിയിരുന്ന ഫീസില് 95 ശതമാനം വരെ ഇളവുമായി രംഗത്ത്. ഈ നീക്കത്തിലൂടെ കൂടുതല് ഉപഭോക്താക്കളേയും ചെറുകിട വ്യാപാരികളെയും ഡിജിറ്റല് പേയ്മെന്റ് പ്ലാറ്റ്ഫോമിലേക്ക് കൊണ്ടുവരാന് കഴിയുമെന്നാണ് വിസ അവകാശപ്പെടുന്നത്.
ബാങ്കുകള്ക്ക് ഔദ്യോഗികമായി നല്കിയിട്ടുള്ള അറിയിപ്പിലാണ് 2000 രൂപ വരെയുള്ള ഇടപാടുകള്ക്ക് ഫീസ് കുത്തനെ കുറച്ചതായി പറയുന്നത്. ഇതുപ്രകാരം 2000 രൂപ വരെയുള്ള ഡെബിറ്റ് കാര്ഡ് ഇടപാടുകള്ക്ക് 15 പൈസയും അതിനു മുകളിലുള്ള ഇടപാടുകള്ക്ക് 1.50 രൂപയുമായിരിക്കും ഈടാക്കുക.
ഇടപാടുകള്ക്കുള്ള ഫീസ് നിരക്ക് കുറയുന്നത് ഡെബിറ്റ്കാര്ഡ് ഉപയോഗിച്ച് പണമിടപാട് നടത്തുവാന് ഉപഭോക്താവിനെ പ്രോത്സാഹിക്കുന്നതോടൊപ്പം വ്യാപാരികള്ക്ക് ഡിജിറ്റല് പേയ്മെന്റ് സൗകര്യമൊരുക്കാന് പ്രചോദനമാവുമെന്ന് വിസ പറയുന്നു. ഔദ്യോഗിക കണക്കുകള് അനുസരിച്ച് രാജ്യത്ത് നടക്കുന്ന കാര്ഡ് ഇടപാടുകളില് 40 ശതമാനത്തിലധികം വിപണി വിഹിതം വിസയ്ക്ക് മാത്രമായിട്ടുണ്ട്.
