മാഡ്രിഡ്: യുവേഫാ ചാമ്പ്യന്മാരും യോറോപ്പാ ലീഗ് ചാമ്പ്യന്മാരും തമ്മില് ഏറ്റുമുട്ടുന്ന സൂപ്പര്കപ്പില് ക്രിസ്ത്യാനോ റൊണാള്ഡോയില്ലാതെ ആദ്യമായി ഇറങ്ങിയ റയലിന് തോല്വിയോടെ സീസണ് തുടക്കം. യൂറോപ്പാ ചാമ്പ്യന്മാരായ അത്ലറ്റിക്കോയോട് 3-2 ന് റയല് തോറ്റു. മാഡ്രിഡുകാരുടെ നാട്ടങ്കത്തില് ഡിയാഗോ കോസ്റ്റ ഇരട്ട ഗോളുകളുമായും സോള് നിഗ്വേസ്, കോക്കേ എന്നിവരുടെ വകയായിരുന്നു അത്ലറ്റിക്കോയുടെ ഗോളുകള്. ബെന്സേമയും നായകന് റാമോസും റയലിന്റെ ഗോളുകള് കണ്ടെത്തി. അധികസമത്തിലേക്ക് മത്സരം നീണ്ടിരുന്നു.
ഒന്നാം മിനിറ്റില് തന്നെ ഗോള് കണ്ടുകൊണ്ടായിരുന്നു മത്സരം തുടങ്ങിയത്. സ്പാനിഷ് താരം ഡിയാഗോ കോസ്റ്റയുടേതായിരുന്നു ഗോള്. എന്നാല് 27 ാം മിനിറ്റില് കരീം ബെന്സേമ ഗോള് മടക്കി. ഒരു മണിക്കൂര് പിന്നിട്ടപ്പോള് കളിയുടെ നിയന്ത്രണം റയല് ഏറ്റെടുത്തു. 63 ാം മിനിറ്റിലെ പെനാല്റ്റി മുതലാക്കി റാമോസ് ടീമിനെ വീണ്ടും മുന്നില് കടത്തി. എന്നാല് പതിനഞ്ച് മിനിറ്റ് കഴിഞ്ഞപ്പോള് കോസ്റ്റയിലൂടെ മറുപടി പറഞ്ഞ അത്ലറ്റിക്കോ യുവേഫാ ചാമ്പ്യന്മാരെ സമനിലയില് കുരുക്കി. റയല് ബോക്സിലെ കൂട്ടപ്പൊരിച്ചില് മുതലാക്കുകയായിരുന്നു കോസ്റ്റ. തുടര്ന്ന് കളി സമനിലയിലും അധിക സമയത്തേക്കും നീണ്ടതോടെ മത്സരം അത്ലറ്റിക്കോ പിടിക്കുകയായിരുന്നു.
98 ാം മിനിറ്റില് സോള് നിഗ്വെസിലൂടെ അധികസമയത്ത് മുന്നിലെത്തിയ അത്ലറ്റിക്കോ ആറു മിനിറ്റ് കഴിഞ്ഞപ്പോള് കൊക്കേയിലൂടെ ജയവും പിടിച്ചെടുത്തു. യുവേഫാ ചാമ്പ്യന്സ് ലീഗില് ഹാട്രിക് കുറിച്ച ശേഷം ആദ്യമായിട്ടായിരുന്നു റയല് പോര്ച്ചുഗല് സൂപ്പര്താരം ക്രിസ്ത്യാനോ റൊണാള്ഡോ ഇല്ലാതെ കളത്തില് ഇറങ്ങിയത്. സിഡാന് മാഡ്രിഡ് വിട്ട ശേഷം എത്തിയ പരിശീലകന് ലാപ്പെറ്റെഗ്യുയിക്കും ഇതോടെ സീസണില് മോശം തുടക്കമാണ് കിട്ടിയിരിക്കുന്നത്.
ആദ്യ മത്സരത്തില് തന്നെ നാലു ഗോള് വഴങ്ങുന്ന ആദ്യ റയല് പരിശീലകന് എന്ന പദവിയാണ് ലെപെറ്റെഗ്യുയിക്ക് കിട്ടുന്നത്. 2012 ല് ചെല്സി ജയിച്ച ശേഷം യൂറോപ്പാ ലീഗ് ജേതാക്കള് സൂപ്പര്കപ്പ് നേടുന്ന ആദ്യ ടീമായും ഇതോടെ അത്ലറ്റിക്കോ മാഡ്രിഡ് മാറുകയും ചെയ്തു. 2015 ല് ബാഴ്സിലോണയില് നിന്നും ലാലിഗയില് നേരിട്ട ശേഷം റയല് നാലു ഗോള് വഴങ്ങുന്ന ആദ്യ മത്സരവും ഇതായിരുന്നു. സൂപ്പര്കപ്പിലെ ഏറ്റവും വേഗതയേറിയ ഗോളുകളില് ഒന്ന് കണ്ട മത്സരം കൂടിയായിരുന്നു. 49 ാം സെക്കന്റില് കോസ്റ്റ ഗോള് സ്കോര് ചെയ്തു.
