ജയ്പൂര്: കഴിഞ്ഞ വര്ഷം രാജസ്ഥാനിലെ അല്വാറില് പശുക്കടത്ത് ആരോപിച്ചുണ്ടായ ആള്ക്കൂട്ടം തല്ലിക്കൊന്ന പെഹ്ലു ഖാന്റെ മുഖ്യസാക്ഷികള്ക്ക് നേരെ വെടിവയ്പ്പ്. മുഖ്യസാക്ഷികളില് ഒരാള് ഖാന്റെ മകന് തന്നെയായിരുന്നു. ശനിയാഴ്ച ദേശീയ പാത എട്ടില് ആള്വാറില് കോടതിയിലേക്ക് പോകും വഴിക്കാണ് ആക്രമണമുണ്ടായത്.
സംഭവത്തില് പോലീസ് കേസെടുത്ത് എഫ്ഐആര് രജിസ്റ്റര് ചെയ്തിട്ടുണ്ട്. ഇതിന് പുറമെ കോടതിയില് ഹാജരാകുന്നതിന് സാക്ഷികള്ക്ക് സുരക്ഷ ഒരുക്കുന്നുണ്ട്. നമ്പര് പ്ലേറ്റില്ലാത്ത ഒരു കറുത്ത സ്കോര്പിയോയിയിലാണ് സംഘമെത്തിയതെന്ന് ഇവര്ക്കൊപ്പമുണ്ടായിരുന്ന മനുഷ്യാവകാശ പ്രവര്ത്തകനായ ആസാദ് ഹയാത്ത് പറഞ്ഞു.
കേസില് സാക്ഷി പറയരുതെന്ന് ആവശ്യപ്പെട്ട് ആക്രോശിച്ചെത്തിയ സംഘം കാര് നിര്ത്താന് ആവശ്യപ്പെടുകയും തുടര്ന്ന് കാര് മുന്നോട്ടെടുത്തപ്പോള് വെടിയുതിര്ക്കുകയുമായിരുന്നുവെന്ന് മകന് ഇര്ഷാദ് പറഞ്ഞു. ഈ സംഘത്തെ വെട്ടിച്ച് മറ്റ് വഴികളിലൂടെ തങ്ങള് രക്ഷപെടുകയായിരുന്നുവെന്നും ഇയാള് പറഞ്ഞു. സംഭവസമയത്ത് സാക്ഷികളായ അസ്മത്, റഫീഖ്, പെവ്ളുവിന്റെ മകന് ഇര്ഷാദ്, ആരിഫ്, ഇവര്ക്ക് പുറമെ കാര് ഡ്രൈവര് അംജദ് എന്നിവരാണ് കാറിലുണ്ടായിരുന്നത്.
