ന്യൂഡല്ഹി: ചൈനയ്ക്കെതിരേ അവരുടെ നാട്ടില് കളി കണ്ടതിന് ശേഷം ഇന്ത്യന് ഫുട്ബോള് ആരാധകര് പ്രതീക്ഷ വെച്ചു തുടങ്ങിയിട്ടുണ്ട്. എതിരാളികളുടെ മൈതാനത്ത് അവരെ ഗോളടിക്കാന് വിടാതെ ടീം കളിച്ച രീതിയും മത്സരഫലവും ഏറെ പ്രശംസ പിടിച്ചു പറ്റുകയും ചെയ്തു. എന്നാല് ഇന്ത്യന് ടീമില് കളത്തിനകത്തെ ഒത്തിണക്കം പുറത്തില്ലെന്നും ടീമിലെ പടലപിണക്കമാണ് സുനില്ഛേത്രി കളിക്കുമ്പോള് തന്നെ സന്ദേശ് ജിങ്കന് നായകന്റെ ആം ബാന്ഡ് കിട്ടാന് കാരണമായതെന്നും റിപ്പോര്ട്ടുകള് പുറത്തുവരുന്നു.
രണ്ടു ദശകങ്ങള്ക്ക് ശേഷം ഇന്ത്യന് ടീം ചൈനയ്ക്കെതിരേ കളിച്ചപ്പോള് ടീമിനെ നയിച്ചത് കേരള ബ്ലാസ്റ്റേഴ്സ് താരവും പ്രതിരോധത്തിലെ ഉരുക്കു കോട്ടയുമായ സന്ദേശ് ജിങ്കാനായിരുന്നു. സുനില്ഛേത്രിയേയും ജിങ്കാനെയും ഗോളി ഗുര്പ്രീത് സന്ധുവിനെയും മാറ്റിമാറ്റി റൊട്ടേഷന് കോച്ച് പരീക്ഷിക്കാറുണ്ടെങ്കിലും ഇത്തവണ ജിങ്കാന് ആംബാന്ഡ് നല്കിയതിന് പിന്നില് ടീമിലെ സൂപ്പര്താരം സുനില് ഛേത്രിയും പരിശീലകന് സ്റ്റീഫന് കോണ്സ്റ്റന്റൈനും തമ്മിലുള്ള പിണക്കമായിരുന്നെന്നാണ് സ്ഥിരീകരിക്കാത്ത റിപ്പോര്ട്ടുകള്.
ഇക്കഴിഞ്ഞ 13-ാം തീയതിയാണ് ചൈനയെ അവരുടെ നാട്ടില് ഇന്ത്യ ഗോള്രഹിത സമനിലയില് തളച്ചത്. എല്ലാവരും ഛേത്രിയെ നായകസ്ഥാനത്ത് പ്രതീക്ഷിച്ചിരുന്നപ്പോഴാണ്, അപ്രതീക്ഷിതമായ കോണ്സ്റ്റന്റൈന്റെ തീരുമാനം വന്നത്.ടീമിലെ ഒഴിവാക്കാന് കഴിയാത്ത ആളായതിനാല് ആദ്യ ഇലവനില് സുനില്ഛേത്രിക്ക് സ്റ്റീഫന് സ്ഥാനം നല്കിയെന്നു മാത്രമേയുള്ളൂ. അടുത്ത ജനുവരിയില് ഏഷ്യന് കപ്പ് കളിക്കാന് തയ്യാറെടുക്കുന്ന ഇന്ത്യന് ടീമില് ഇനി സ്റ്റീഫന് കോണ്സ്റ്റന്റൈന്റെ ഛേത്രിക്ക് നായക സ്ഥാനം കൊടുക്കുമോ എന്ന് പോലും സംശയമാണ്.
സ്റ്റീഫന് കോണ്സ്റ്റന്റൈന്റെ പരിശീലനത്തിന് കീഴില് സുനില്ഛേത്രി ഉള്പ്പെടെയുള്ളവര്ക്കുള്ള താല്പ്പര്യക്കുറവാണ് കാരണം. സ്റ്റീഫന്റെ തന്ത്രങ്ങള് കാലപ്പഴക്കം ചെന്നെന്നും ഇനി പുതിയ തന്ത്രമാണ് ടീമിന് ആവശ്യമെന്നുമാണ് ഛേത്രി അടക്കമുള്ളവരുടെ ആവശ്യം. സ്റ്റീഫന്റെ സ്ഥാനത്ത് ബാംഗ്ലൂര് എഫ് സിയുടെ മുന് പരിശീലകന് സ്പെയിന്കാരന് ആല്ബര്ട്ട് റോക്കയെയാണ് ഛേത്രിക്ക് താല്പ്പര്യം. ഇക്കാര്യം അഖിലേന്ത്യാ ഫുട്ബോള് ഫെഡറേഷനെ ഛേത്രി അറിയിക്കുകയും ചെയ്തിരുന്നു. ഇത് സ്റ്റീഫന് കോണ്സ്റ്റന്റൈന്റെ അതൃപ്തിക്ക് കാരണമായിട്ടുണ്ട്.
ഇതിനിടയിലായിരുന്നു ചൈനീസ് പര്യടനം വന്നത്. പരിശീലകന്റെ ആശയം കളത്തില് അതേപോലെ പ്രകടിപ്പിക്കുന്നയാളാണ് നായകനാവേണ്ടതെന്നായിരുന്നു ജിങ്കനെ നായകനാക്കിയതിന് സ്റ്റീഫന് കോണ്സ്റ്റന്റൈന്റെ പ്രതികരണം. അതേസമയം പരിശീലക സ്ഥാനത്തു നിന്നും സ്റ്റീഫന് കോണ്സ്റ്റന്റൈനെ മാറ്റാനുള്ള ഛേത്രിയുടെയും സംഘത്തിന്റെയും ആവശ്യം എഐഎഫ്എഫ് നിരസിച്ചിട്ടുണ്ട്. അടുത്ത ഫെബ്രുവരി വരെ കാലാവധിയുള്ള സ്റ്റീഫന് കോണ്സ്റ്റന്റൈനെ നില നിര്ത്തുമെന്നും എഎഫ്സി കപ്പ് കഴിയട്ടെയെന്നുമാണ് അവര് പറയുന്നത്. അതിന് മുമ്പ് പരിശീലകനെ പുറത്താക്കുന്നത് ശരിയല്ലെന്നാണ് ഫെഡറേഷന്റെ നിലപാട്.
