തിരുവനന്തപുരം: ശബരിമല യുവതിപ്രവേശന വിഷയത്തില് വ്യാപക പ്രതിഷേധമായിരുന്നു തെരുവിലും പമ്പയിലും ഉണ്ടായത്. ഇതില് കെ.എസ്.ആര്.ടി.സി ബസുകളും പ്രതിഷേധക്കാര് തകര്ത്തിരുന്നു. തകര്ത്തവരില് നിന്നും നഷ്ടപരിഹാരം ഈടാക്കതെ ജാമ്യം കൊടുക്കരുതെന്നാവശ്യപ്പെട്ട് കെ.എസ്.ആര്.ടി.സി എംഡി ടോമിന് ജെ തച്ചങ്കരി ഡിജിപിക്ക് കത്തു നല്കി. നഷ്ടപരിഹാരം ഈടാക്കുന്നതാനായി, കെഎസ്ആര്ടിസിക്ക് ഉണ്ടായ നാശനഷ്ടത്തെപ്പറ്റി അന്വേഷണ ഉദ്യോഗസ്ഥര് ബന്ധപ്പെട്ട കോടതികളില് പരാതി സമര്പ്പിക്കാന് നിര്ദേശിക്കണമെന്നും കത്തില് പറഞ്ഞിട്ടുണ്ട്.
ശബരിമലയിലെ യുവതീപ്രവേശന വിഷയത്തിലുണ്ടായ പ്രതിഷേധത്തില് തകര്ന്നത് 49 കെഎസ്ആര്ടിസി ബസുകളാണ്. ബസുകള് തകര്ന്നതും ട്രിപ്പുകള് മുടങ്ങിയതും ഉള്പ്പെടെ 1.25 കോടി രൂപയുടെ നഷ്ടമാണ് കോര്പറേഷനുണ്ടായത്. പമ്പയില് ഉണ്ടായ പ്രതിഷേധത്തില് മാത്രം 23 ബസുകള്ക്കാണ് നാശനഷ്ടമുണ്ടായത്. ബസുകളുടെ ചില്ലുകളും ലൈറ്റും ഡിസ്പ്ലേ ബേര്ഡുകളും അക്രമികള് തകര്ത്തു. പമ്പയിലെ പ്രതിഷേധ സമരത്തിലുണ്ടായ നഷ്ടം 63,0500 ആണ്. മറ്റുള്ള സ്ഥലങ്ങളിലെ പ്രതിഷേധത്തില് 89,000 രൂപയുടെ നഷ്ടമുണ്ടായി. ബസുകള്ക്ക് തകരാന് സംഭവിച്ചതിലെ നഷ്ടം 7,19,500 രൂപ വരുമാനനഷ്ടം 46,00,000 രൂപയാണ്. ആകെ നഷ്ടം 54,19,500 രൂപയും.
സര്ക്കാരിന്റെയോ സര്ക്കാര് നിയന്ത്രണത്തിലുള്ള സ്ഥാപനങ്ങളുടെയോ വസ്തുവകകള് പ്രതിഷേധത്തിന്റെ ഭാഗമായി തകര്ക്കപ്പെട്ടാല് ആ നഷ്ടം ആക്രമണത്തിനു നേതൃത്വം നല്കിയ വ്യക്തികളില് നിന്നോ സംഘടനകളില് നിന്നോ ഈടാക്കണമെന്ന് 2003ല് സര്ക്കാര് ഉത്തരവിറക്കിയിരുന്നു. ഈ ഉത്തരവ് കര്ശനമായി നടപ്പിലാക്കണമെന്ന് ഹൈക്കോടതിയും സര്ക്കാരിനു നിര്ദേശം നല്കിയിരുന്നു. ഈ സാഹചര്യങ്ങള് പരിഗണിച്ചാണു നഷ്ടപരിഹാരം ഈടാക്കാതെ പ്രതികള്ക്ക് ജാമ്യം നല്കരുതെന്ന് കോര്പ്പറേഷന് ആവശ്യപ്പെട്ടിരിക്കുന്നത്.
