ഗുയാന: വനിത ട്വന്റിട്വന്റി ലോകകപ്പ് ഇന്നലെ ആരംഭിച്ചു. അരങ്ങേറ്റ മത്സരത്തില് ന്യൂസിലാന്ഡിനെ പഞ്ഞിക്കിട്ടാണ് ഇന്ത്യയുടെ തുടക്കം. 34 റണ്സിനാണ് ഇന്ത്യന് വനിതകള് കിവീസ് പടയെ തകര്ത്തത്. ഇന്ത്യന് നായിക ഹര്മന്പ്രീത് കൗറിന്റെ തകര്പ്പന് സെഞ്ചുറിയലൂടെ ഇന്ത്യ നിശ്ചിത ഓവറില് 194 റണ്സാണ് നേടിയത്. രാജ്യാന്തര ടി20 മത്സരങ്ങളില് സെഞ്ചുറി നേടുന്ന ആദ്യ ഇന്ത്യന് വനിതയായിരിക്കുകയാണ് ഹര്മന്പ്രീത്.
51 പന്തില് 103 റണ്സാണ് താരം അടിച്ചുകൂട്ടിയത്. ഏഴ് ഫോറും എട്ട് സിക്സറുകളും ഉള്പ്പെടെയായിരുന്നു ഹര്മന്പ്രീതിന്റെ ഇന്നിംഗ്സ്. ടോസ് നേടിയ ഇന്ത്യ ബാറ്റിംഗ് തിരഞ്ഞെടുക്കുകയായിരുന്നു. എന്നാല് തുടക്കം പാളി. ഓപ്പണര്മാരായ ഭാട്ടിയ(9), സ്മൃതി മന്ദാന(2) എന്നിവര് പെട്ടെന്നു തന്നെ കൂടാരം കയറി. പിന്നാലെ എത്തിയ റോഡ്രിഗസ് അര്ദ്ധസെഞ്ചുറി(59) നേടി. ഹേമലത(15)യ്ക്ക് പിന്നാലെ ഹര്മന്പ്രീത് ക്രീസിലെത്തിയതോടെ ഇന്ത്യയുടെ ബാറ്റിംഗ് ശൈലി മാറുകയായിരുന്നു.
കിവീസ് ബൗളര്മാര് തലങ്ങും വിലങ്ങും അടിവാങ്ങി. ഒടുവില് 21 പന്തില് 103 റണ് നേടി 19.5 -ാം പന്തില് ഹര്മന്പ്രീത് പുറത്താകുമ്പോള് ഇന്ത്യ ശക്തമായ സ്കോറില് എത്തിയിരുന്നു. ഇന്ത്യ നേടിയ 194 ടി20 ലോകകപ്പിലെ ഉയര്ന്ന സ്കോറാണ്. ഇന്ത്യ ഉയര്ത്തിയ 195 റണ്സ് വിജയലക്ഷ്യം പിന്തുടര്ന്ന ന്യൂസീലന്ഡിന് നിശ്ചിത ഓവറില് ഒന്പത് വിക്കറ്റ് നഷ്ടത്തില് 160 റണ്സ് നേടാനെ സാധിച്ചൊള്ളു. പൂനം യാദവും ഹേമലതയും മൂന്ന് വിക്കറ്റ് വീതം വീഴ്ത്തി.
