കോലഞ്ചേരി: ഊരും പേരുമായി ബന്ധപ്പെട്ട് കൃത്യമായ രേഖകളുടെയും റജിസ്ട്രേഷന് നടപടികളുടെയും അഭാവത്തില് കേരളം തീവ്രവാദികള്ക്ക് പ്രിയപ്പെട്ട ഒളിത്താവളമായി മാറുന്നു. എണ്ണമറ്റ അന്യസംസ്ഥാന തൊഴിലാളികളുടെ മറവില് ഇന്ത്യയുടെ കിഴക്കന് അതിരില് നിന്നും അനേകം തീവ്രവാദികള് കുറ്റകൃത്യം നടത്തി മുങ്ങി കേരളത്തില് തൊഴിലാളികളെന്ന വ്യാജേനെ ഒളിവില് താമസിക്കുന്നതായിട്ടാണ് സംശയം.
പ്ലൈവുഡ് കമ്പനിയില് തൊഴില് ചെയ്തുവരികയായിരുന്ന മൂന്ന് ബോഡോ തീവ്രവാദികളെയാണ് ഇന്നലെ തന്ത്രപരമായി പോലീസിന്റെ പ്രത്യേക സ്ക്വാഡ് പിടികൂടിയതോടെ സംസ്ഥാനത്തിന്റെ വിവിധ ഇടങ്ങളില് ഇങ്ങിനെ ഒളിവില് പാര്ക്കുന്ന കുറ്റവാളികള് ഏറെയുണ്ടെന്നാണ് വിലയിരുത്തല്. കുന്നത്തുനാട് പോലീസ് സ്റ്റേഷന് അതിര്ത്തിയിലുള്ള മണ്ണൂരിലെ പ്ലൈവുഡ് കമ്പനിയില് നിന്നുമാണ് ഇന്നലെ രാവിലെ അസം സ്വദേശികളായ മൂന്നുപേരെ പിടികൂടിയത്.
കോക്രജാര് ജില്ലയില് വില് ബാമ്യാഗുരി മനു ബസുമട്ടരി(ബി. മേഹര്25), വെസ്റ്റ് ബത്താബരി ആഫ്ളയോന് ബി. പ്രീതംബസുമട്ടാരി(24), ഗാസിഹോന് ജില്ലയില് ചാക്കുമ ദുമ്കേതു ബ്രഹ്മ(ബി. ദലഞ്ജ്35) എന്നിവരെയാണ് ആലുവ റൂറല് എസ്.പിയുടെ ചാര്ജുള്ള ഡോ. ജെ. ഹിമേന്ദ്രനാഥിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. അസമില് കോക്രജാര് ജില്ലയിലെ ഗാസിഗോണ് പോലീസ് സ്റ്റേഷനില് ഇവര്ക്കെതിരേ യു.എ.പി.എ നിയമപ്രകാരവും ആയുധ നിയമ പ്രകാരവും വധശ്രമത്തിനും കേസ് നിലവിലുണ്ട്.
നിരോധിക്കപ്പെട്ട ഭീകരസംഘടനയായ ബോഡോ തീവ്രവാദ ഗ്രൂപ്പില്പ്പെട്ടവരാണ് പിടിയിലായവരെന്ന് പോലീസ് പറഞ്ഞു. ഇവര്ക്ക് ആയുധ പരിശീലനവും ലഭിച്ചിട്ടുണ്ടെന്ന് കണ്ടെത്തിയിട്ടുണ്ട്. ആയുധങ്ങള് കൈവശമുണ്ടെന്ന നിഗമനത്തില് ഇവരെ പിടികൂടാന് ഏറെ ജാഗ്രത പുലര്ത്തിയിരുന്നു. ഇവരുടെ തിരിച്ചറിയല് രേഖകളും പരിശോധിച്ചുവരികയാണ്. കൂടുതല് ആളുകള് ഉണ്ടോയെന്നുള്ള അന്വേഷണവും നടക്കുന്നുണ്ട്. പ്രതികളെ ഇന്നലെ രാത്രിയോടെ അസം പോലീസിന് കൈമാറി.
